ನವದೆಹಲಿ: ತಮಿಳುನಾಡಿನ ಕಲಾವಿದನೋರ್ವ ಕಲ್ಲಂಗಡಿ ಹಣ್ಣಿನ ಮೇಲೆ ಪ್ರಧಾನಿ ನರೇಂದ್ರ ಮೋದಿ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ತಾಜ್ ಮಹಲ್ ಚಿತ್ರವನ್ನು ಸುಂದರವಾಗಿ ಕೆತ್ತನೆ ಮಾಡಿದ್ದು, ಫೋಟೋ ಇಂಟರ್ನೆಟ್ನಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿದೆ.
ಎಂ. ಎಲಾಂಚೆಜಿಯಾನ್ ಅವರು ಹಣ್ಣು ಮತ್ತು ತರಕಾರಿಗಳ ಮೇಲೆ ಚಿತ್ರವನ್ನು ಕೆತ್ತುವ ಕಲಾವಿದರು. ಅಮೆರಿಕ ಅಧ್ಯಕ್ಷರು ತಾಜ್ಮಹಲ್ಗೆ ಭೇಟಿ ನೀಡುತ್ತಿರುವ ಹಿನ್ನೆಲೆಯಲ್ಲಿ ಅವರಿಗೆ ಸ್ವಾಗತ ಕೋರುವ ಸಲುವಾಗಿ ಈ ಸುಂದರ ಚಿತ್ರವನ್ನು ಕೆತ್ತನೆ ಮಾಡಿದ್ದಾರೆ. ಮೋದಿ ಹಾಗೂ ಟ್ರಂಪ್ ಅವರನ್ನು ಅಕ್ಕಪಕ್ಕ ಚಿತ್ರಿಸಿ, ಅವರ ತಲೆಯ ಮೇಲ್ಭಾಗದಲ್ಲಿ ತಾಜ್ ಮಹಲ್ನ್ನು ರೂಪಿಸಿದ್ದಾರೆ.
31 ವರ್ಷದ ಎಂ. ಎಲಾಂಚೆಜಿಯಾನ್ ಅವರು ಥೇಣಿ ಜಿಲ್ಲೆಯ ಗುಡಲೂರಿನವರು. 5 ಕೆಜಿ ತೂಕದ ಕಲ್ಲಂಗಡಿ ಹಣ್ಣಿನ ಮೇಲೆ ಟ್ರಂಪ್, ಮೋದಿ ಹಾಗೂ ತಾಜ್ಮಹಲ್ ಚಿತ್ರವನ್ನು ಕೆತ್ತನೆ ಮಾಡಿದ್ದಾರೆ.
ಕಳೆದ ವರ್ಷ ಚೀನಾದ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಭಾರತ ಭೇಟಿಯ ವೇಳೆ ನಾಲ್ಕು ಕೆಜಿ ಕಲ್ಲಂಗಡಿ ಹಣ್ಣಿನ ಮೇಲೆ ಮೋದಿ ಹಾಗೂ ಚೀನಾ ಅಧ್ಯಕ್ಷರ ಚಿತ್ರ ಬರೆದಿದ್ದರು.
ಈ ಬಾರಿ ಮೂರು ಚಿತ್ರಗಳನ್ನು ಕೆತ್ತನೆ ಮಾಡಬೇಕಾಗಿರುವುದರಿಂದ ಇನ್ನೂ ದೊಡ್ಡ ಹಣ್ಣನ್ನು ಆಯ್ಕೆ ಮಾಡಿಕೊಂಡಿದ್ದಾಗಿ ಎಲಾಂಚೆಜಿಯಾನ್ ತಿಳಿಸಿದ್ದಾರೆ. (ಏಜೆನ್ಸೀಸ್)
