Amit Mishra: ಟೀಮ್ ಇಂಡಿಯಾದ ಹಿರಿಯ ಸ್ಪಿನ್ನರ್ ಅಮಿತ್ ಮಿಶ್ರಾ ತಮ್ಮ ಅಂತರರಾಷ್ಟ್ರೀಯ ಕ್ರಿಕೆಟ್ ವೃತ್ತಿಜೀವನದ ಅನಿರೀಕ್ಷಿತ ಅಂತ್ಯದ ಕುರಿತು ಇತ್ತೀಚೆಗೆ ನೀಡಿರುವ ಹೇಳಿಕೆ ಕ್ರಿಕೆಟ್ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (BCCI) ವ್ಯವಸ್ಥೆ ಹಾಗೂ ಅಂದಿನ ನಾಯಕ-ಕೋಚ್ ನಡವಳಿಕೆಯ ಬಗ್ಗೆ ಅವರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ನಡೆಸಿಕೊಟ್ಟ ಪಾಡ್‌ಕಾಸ್ಟ್ ಬೈತ್ & ಬೋಲ್ (Baith & Bol) ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಅಮಿತ್ ಮಿಶ್ರಾ, ತಮ್ಮ ಅಂತರಾಷ್ಟ್ರೀಯ ವೃತ್ತಿಜೀವನ ಹೇಗೆ ಅಂತ್ಯವಾಯ್ತು ಎನ್ನುವುದರ ಸಂಪೂರ್ಣ ವಿವರಗಳನ್ನು ಹಂಚಿಕೊಂಡಿದ್ದಾರೆ.
2017ರಲ್ಲಿ ಬೆಂಗಳೂರಿನಲ್ಲಿ ಇಂಗ್ಲೆಂಡ್ ವಿರುದ್ಧ ನಡೆದ ಟಿ20 ಪಂದ್ಯವು ತಮ್ಮ ಅಂತರರಾಷ್ಟ್ರೀಯ ಕ್ರಿಕೆಟ್ ವೃತ್ತಿಜೀವನದ ಕೊನೆಯ ಪಂದ್ಯವಾಗಲಿದೆ ಎಂದು ಅವರು ಆ ಸಂದರ್ಭದಲ್ಲಿ ಕಲ್ಪಿಸಿರಲಿಲ್ಲ. ಪಂದ್ಯದ ವೇಳೆ ತಮಗೆ ಕಾಲಿನ ಗಾಯವಾಗಿತ್ತು ಎಂದು ವಿವರಿಸಿರುವ ಮಿಶ್ರಾ, ಆ ಗಾಯವೇ ತಮ್ಮ ಕ್ರಿಕೆಟ್ ಬದುಕಿಗೆ ಬ್ರೇಕ್ ಹಾಕಿತು ಎಂದು ಬೇಸರ ಹೊರಹಾಕಿದ್ದಾರೆ. ತಂಡದಿಂದ ಹೊರನಡೆಯುವ ನಿರ್ಣಾಯಕ ಘಟ್ಟದಲ್ಲಿ ಅಂದಿನ ಕೋಚ್ ಅನಿಲ್ ಕುಂಬ್ಳೆ ಹಾಗೂ ನಾಯಕ ವಿರಾಟ್ ಕೊಹ್ಲಿ ಇಬ್ಬರೂ ತಮಗೆ ಧೈರ್ಯತುಂಬುವ ಭರವಸೆಗಳನ್ನು ನೀಡಿದ್ದರು ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ:'ವೈಭವ'ಯುತ ಆಟ ನೋಡಲು ಕೊನೆಗೂ ಕೂಡಿಬಂತು ಕಾಲ...ಸೂರ್ಯವಂಶಿ ಎಂಟ್ರಿ ಬಗ್ಗೆ ಮಹತ್ವದ ಸುಳಿವು ನೀಡಿದ ಬ್ಯಾಟಿಂಗ್ ಕೋಚ್! | Vaibhav Sooryavanshi
ನೀನು ಯೋಚ್ನೆ ಮಾಡಬೇಡ ನಾವಿದ್ದೀವಿ!
ನಾನು ಗಾಯಗೊಂಡು ಬೆಂಗಳೂರಿನಿಂದ ಹೊರಡುವಾಗ ಅನಿಲ್ ಭಾಯ್ ಕೋಚ್ ಆಗಿದ್ದರು. ನಾನು ಅವರಿಗೆ ವಿಷಯ ತಿಳಿಸಿದಾಗ, ಯಾವುದೇ ಚಿಂತೆ ಮಾಡಬೇಡ ಅಮಿತ್, ನೀನು ಸಂಪೂರ್ಣವಾಗಿ ಫಿಟ್ ಆಗಿ ವಾಪಸ್ ಬಂದ ಕೂಡಲೇ ತಂಡಕ್ಕೆ ಮರಳುತ್ತೀಯ ಎಂದು ಧೈರ್ಯ ತುಂಬಿದರು ಎಂದು ಮಿಶ್ರಾ ಆ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ, ನಾಯಕರಾಗಿದ್ದ ವಿರಾಟ್ ಕೊಹ್ಲಿ ಕೂಡ ತಮಗೆ ಅದೇ ರೀತಿಯ ಭರವಸೆಯನ್ನು ಪುನರುಚ್ಚರಿಸಿದ್ದರು ಎಂದು ಮಿಶ್ರಾ ತಿಳಿಸಿದ್ದಾರೆ. ನಾನು ವಿರಾಟ್ ಕೊಹ್ಲಿ ಅವರ ಬಳಿಯೂ ಮುಂದಿನ ಹಾದಿಯ ಬಗ್ಗೆ ಕೇಳಿದೆ. ಅದಕ್ಕೆ ಅವರು, ನೀವು ಯಾವುದೇ ಆತಂಕಪಡಬೇಡಿ, ಮೊದಲು ಸಂಪೂರ್ಣವಾಗಿ ಫಿಟ್ ಮತ್ತು ಆರಾಮದಾಯಕವಾಗಿರಿ, ತಂಡದಲ್ಲಿ ನಿಮ್ಮ ಸ್ಥಾನ ಖಚಿತವಿದೆ ಎಂದು ಭರವಸೆ ನೀಡಿದ್ದರು ಎಂದು ಮಿಶ್ರಾ ಪಾಡ್‌ಕಾಸ್ಟ್‌ನಲ್ಲಿ ವಿವರಿಸಿದ್ದಾರೆ.
