Tilak Varma: ನ್ಯೂಜಿಲೆಂಡ್ ವಿರುದ್ಧ ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆದ ದ್ವಿತೀಯ ಟಿ20 ಪಂದ್ಯದಲ್ಲಿ ಅತ್ಯಂತ ಒತ್ತಡದ ಪರಿಸ್ಥಿತಿಯಲ್ಲೂ ಅದ್ಭುತವಾಗಿ ಬ್ಯಾಟ್ ಬೀಸಿ ಭಾರತ ತಂಡಕ್ಕೆ ರೋಮಾಂಚಕ ಗೆಲುವು ತಂದಿತ್ತ ಉಪನಾಯಕ ತಿಲಕ್ ವರ್ಮಾರ ಬ್ಯಾಟಿಂಗ್ ನೈಪುಣ್ಯತೆ ಮತ್ತು ಮಾನಸಿಕ ಸ್ಥೈರ್ಯವನ್ನು ಮಾಜಿ ಆಲ್ರೌಂಡರ್ ಇರ್ಫಾನ್ ಪಠಾನ್ ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ತಿಲಕ್ ವರ್ಮಾರಲ್ಲಿ ನಾಯಕನಿಗೆ ಇರಬೇಕಾದ ಎಲ್ಲಾ ಗುಣಗಳೂ ಇದ್ದು, ಭವಿಷ್ಯದಲ್ಲಿ ಅವರು ಟೀಮ್ ಇಂಡಿಯಾವನ್ನು ಅತ್ಯಂತ ಯಶಸ್ವಿಯಾಗಿ ಮುನ್ನಡೆಸುವ ಎಲ್ಲಾ ಸಾಮರ್ಥ್ಯವನ್ನು ಹೊಂದಿದ್ದಾರೆ ಎಂದು ಪಠಾನ್ ಭವಿಷ್ಯ ನುಡಿದಿದ್ದಾರೆ.
ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆದ ಈ ಕಠಿಣ ಪಂದ್ಯದಲ್ಲಿ ನ್ಯೂಜಿಲೆಂಡ್ ನೀಡಿದ್ದ 181 ರನ್‌ಗಳ ಬೃಹತ್ ಹಾಗೂ ಸವಾಲಿನ ಗುರಿಯನ್ನು ಬೆನ್ನಟ್ಟಿದ ಭಾರತ ತಂಡಕ್ಕೆ ಆರಂಭದಲ್ಲೇ ಆಘಾತ ಎದುರಾಗಿತ್ತು. ಆತಿಥೇಯ ಪಡೆಯ ನಾಯಕ ಮಿಚೆಲ್ ಸ್ಯಾಂಟ್ನರ್ ಕೇವಲ 21 ರನ್ನಿಗೆ 4 ವಿಕೆಟ್ ಕಬಳಿಸಿ ಭಾರತದ ಮಧ್ಯಮ ಕ್ರಮಾಂಕವನ್ನು ಧ್ವಂಸಗೊಳಿಸಿದ್ದರು. ಇದರಿಂದಾಗಿ ಭಾರತ ತಂಡವು ಕೇವಲ 70 ರನ್‌ಗಳಿಗೆ ತನ್ನ ಪ್ರಮುಖ 5 ವಿಕೆಟ್‌ಗಳನ್ನು ಕಳೆದುಕೊಂಡು ತೀವ್ರ ಸಂಕಷ್ಟಕ್ಕೆ ಸಿಲುಕಿತ್ತು. ಸೋಲಿನ ಅಂಚಿನಲ್ಲಿದ್ದ ಭಾರತೀಯ ಇನಿಂಗ್ಸ್‌ಗೆ ಜೀವ ತುಂಬಿದ ತಿಲಕ್ ವರ್ಮಾ, ಕೇವಲ 26 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ ಅಪರಾಜಿತ 51 ರನ್ ಚಚ್ಚಿದರು.
ಇದನ್ನೂ ಓದಿ:ಆಟಗಾರನಾಗಿ ಕಪ್‌ಗಳನ್ನು ಗೆದ್ದುಕೊಟ್ಟಿದ್ದ ದೈತ್ಯ ಈಗ ಅದೇ ತಂಡಕ್ಕೆ ಗುರು!...ಮುಂಬೈ ಇಂಡಿಯನ್ಸ್ ಹೆಡ್‌ ಕೋಚ್ ಆದ ಖ್ಯಾತ ಆಲ್ರೌಂಡರ್! | MI Head Coach
ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಈ ಪಂದ್ಯದ ಬಗ್ಗೆ ಮಾತನಾಡಿದ ಇರ್ಫಾನ್ ಪಠಾನ್, ತಿಲಕ್ ವರ್ಮಾರ ಬ್ಯಾಟಿಂಗ್ ಸಾಮರ್ಥ್ಯ ಮತ್ತು ಸವಾಲುಗಳನ್ನು ಸ್ವೀಕರಿಸುವ ಮನೋಭಾವವನ್ನು ಕೊಂಡಾಡಿದ್ದಾರೆ. ತಿಲಕ್ ವರ್ಮಾ 3ನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಿ ಭಾರತದ ಪರ ಈಗಾಗಲೇ 2 ಅಂತಾರಾಷ್ಟ್ರೀಯ ಶತಕಗಳನ್ನು ಸಿಡಿಸಿದ್ದಾರೆ. ಆದರೆ ಈಗ ತಂಡದ ಅಗತ್ಯಕ್ಕೆ ತಕ್ಕಂತೆ ಕೆಳಕ್ರಮಾಂಕದಲ್ಲೂ ಕ್ರೀಸ್‌ಗೆ ಬಂದು ಪಂದ್ಯಗಳನ್ನು ಗೆಲ್ಲಿಸುವ ಸಾಮರ್ಥ್ಯ ತೋರಿಸುತ್ತಿದ್ದಾರೆ. ಹಿಂದಿನ ಪಂದ್ಯದಲ್ಲಿ 3ನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡುವಾಗ ಬೇಗನೆ ವಿಕೆಟ್ ಕಳೆದುಕೊಂಡಿದ್ದರೂ, ಆ ಹಿನ್ನಡೆಯನ್ನು ತಕ್ಷಣವೇ ಮರೆತು ಮುಂದಿನ ಪಂದ್ಯದಲ್ಲಿ ಇಂತಹ ಸವಾಲಿನ ಚೇಸಿಂಗ್ ನಡೆಸಿ ಗೆಲುವು ತಂದುಕೊಡುವುದು ಸಾಮಾನ್ಯ ವಿಷಯವಲ್ಲ. ಇದು ಅವರ ಮಾನಸಿಕ ಶಕ್ತಿ ಎಷ್ಟು ಬಲವಾಗಿದೆ ಎಂಬುದನ್ನು ತೋರಿಸುತ್ತದೆ ಎಂದು ಪಠಾಣ್ ವಿವರಿಸಿದ್ದಾರೆ.
ತಂಡವು ಬಯಸಿದ ಯಾವುದೇ ಕ್ರಮಾಂಕದಲ್ಲಾದರೂ ಬ್ಯಾಟ್ ಮಾಡಲು ಸಿದ್ಧವಿರುವ ಮನೋಭಾವವೇ ಒಬ್ಬ ನಿಜವಾದ ನಾಯಕನ ಲಕ್ಷಣ ಎಂದು ಹೇಳಿದ ಪಠಾಣ್, ತಿಲಕ್ ವರ್ಮಾ 3ನೇ ಕ್ರಮಾಂಕದಲ್ಲೂ ಆಡಬಲ್ಲರು, 5, 6 ಹಾಗೂ 7ನೇ ಕ್ರಮಾಂಕಗಳಲ್ಲೂ ಬ್ಯಾಟ್ ಮಾಡಬಲ್ಲರು. ತಮ್ಮ ಆಟದ ಸಂಪೂರ್ಣ ಅರಿವಿರುವ ಅವರು ತಂಡಕ್ಕಾಗಿ ಯಾವುದೇ ಪಾತ್ರವನ್ನು ನಿರ್ವಹಿಸಲು ಸದಾ ಸಿದ್ಧರಿರುತ್ತಾರೆ. ಆದ್ದರಿಂದಲೇ ಅವರನ್ನು ನಾನು ಭವಿಷ್ಯದ ನಾಯಕ ಎಂದು ಕರೆಯುತ್ತೇನೆ ಎಂದು ಇರ್ಫಾನ್ ಪಠಾಣ್ ಶ್ಲಾಘಿಸಿದ್ದಾರೆ.
