ಇನ್ನೊಂದೆಡೆ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ಅವರ ಅದ್ಭುತ ಫಾರ್ಮ್‌ನಿಂದಾಗಿ, ಸಂಜು ಸ್ಥಾನದ ಬಗ್ಗೆ ಗಂಭೀರ ಚರ್ಚೆಗಳು ಹಾಗೂ ಕಳಪೆ ಪ್ರದರ್ಶನದ ಕಾರಣದಿಂದ ಸಂಜು ಅವರನ್ನು ಹೊರಗಿಡುವ ಒತ್ತಡಗಳು ಹೆಚ್ಚಾಗಿದ್ದವು. ತಂಡದಲ್ಲಿ ಸಿಗುವ ಅವಕಾಶಗಳ ಅನಿಶ್ಚಿತತೆಯು ಸ್ಯಾಮ್ಸನ್ ಅವರನ್ನು ಹೊಸ ರಣತಂತ್ರ ರೂಪಿಸಿಕೊಳ್ಳುವಂತೆ ಪ್ರೇರೆಪಿಸಿತು.
ಹಿಂದೆಲ್ಲಾ ಕ್ರೀಸ್‌ನಲ್ಲಿ ಸ್ವಲ್ಪ ಸಮಯಾವಕಾಶ ತೆಗೆದುಕೊಂಡು, ಪವರ್‌ಪ್ಲೇನಲ್ಲಿ ನಿಧಾನವಾಗಿ ಆಡಿ ನಂತರ ಸ್ಫೋಟಕ ಬ್ಯಾಟಿಂಗ್‌ಗೆ ಮುಂದಾಗುತ್ತಿದ್ದ ಸಂಜು, ಈಗ ಮೊದಲ ಓವರ್‌ನಿಂದಲೇ ಗೇರ್ ಬದಲಾಯಿಸುತ್ತಿದ್ದಾರೆ. ಬೌಲರ್ ಯಾರೇ ಆಗಿರಲಿ, ಸಿಕ್ಕ ಅವಕಾಶವನ್ನು ಬೌಂಡರಿಗಟ್ಟುವ ಧೈರ್ಯವಿರುವ ಆಟವನ್ನು ಕಳೆದ ಕೆಲವು ಟಿ20 ಪಂದ್ಯಗಳಲ್ಲಿ ಸ್ಪಷ್ಟವಾಗಿ ಕಾಣಬಹುದು. ತಮ್ಮ ಸ್ಥಾನಕ್ಕೆ ಎದುರಾಗಿರುವ ತೀವ್ರ ಸ್ಪರ್ಧೆಯನ್ನು ಅರಿತುಕೊಂಡಿರುವ ಅವರು, ತಂಡದಲ್ಲಿ ತಮ್ಮ ಸ್ಥಾನ ಭದ್ರಪಡಿಸಿಕೊಳ್ಳಲು ಹಿಂದೆಂದಿಗಿಂತಲೂ ಹೆಚ್ಚು ಆಕ್ರಮಣಕಾರಿ ಹಾಗೂ ಸ್ಥಿರ ಆಟವನ್ನು ಪ್ರದರ್ಶಿಸಬೇಕಾದ ಅನಿವಾರ್ಯತೆಯಲ್ಲಿದ್ದಾರೆ.
ಡಗೌಟ್‌ನಲ್ಲಿ ಅವಕಾಶಕ್ಕಾಗಿ ಕಾದುಕುಳಿತಿರುವ ಯುವ ಆಟಗಾರನ ನೆರಳು ಆಡುವ ಬಳಗದಲ್ಲಿರುವ ಸಂಜು ಮೇಲೆ ಪ್ರಭಾವ ಬೀರಿದೆ ಎನ್ನಬಹುದು. ವೈಭವ್ ಸೂರ್ಯವಂಶಿಯಂತಹ ಪ್ರತಿಭೆಗಳು ಬೆಂಚ್ ಕಾಯುತ್ತಿರುವಾಗ, ಆಡುವ ಹನ್ನೊಂದರ ಬಳಗದಲ್ಲಿರುವ ಆಟಗಾರ ತನ್ನ ಅತ್ಯುತ್ತಮ ವೇಗವನ್ನು ಕಾಯ್ದುಕೊಳ್ಳುವುದು ಅತಿಮುಖ್ಯವಾಗಿದೆ. ಸ್ಯಾಮ್ಸನ್ ಕೂಡ ಪ್ರಸ್ತುತ ಇದೇ ಹಾದಿಯನ್ನು ಹಿಡಿದಿದ್ದು, ನ್ಯೂಜಿಲೆಂಡ್ ವಿರುದ್ಧದ ಮೊದಲ ಟಿ20 ಪಂದ್ಯದಲ್ಲಿ ಪವರ್‌ಪ್ಲೇ ಓವರ್‌ಗಳಲ್ಲಿ ಬೌಲರ್‌ಗಳ ಮೇಲೆ ಅಕ್ಷರಶಃ ಸವಾರಿ ಮಾಡಿದರು.
