ನವದೆಹಲಿ: ಸಾಮಾಜಿಕ ಜಾಲತಾಣಗಳಲ್ಲಿ ಆ್ಯಕ್ಟಿವ್ ಆಗಿರುವ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಇಂದು ಮುಂಜಾನೆ ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ವೀಡಿಯೋವೊಂದನ್ನು ಶೇರ್ ಮಾಡಿದ್ದಾರೆ. ಹೆಣ್ಣು ಗಂಡಿನಂತೆಯೇ ಯಾವ ಕೆಲಸವನ್ನಾದರೂ ಮಾಡಬಲ್ಲಳು ಎನ್ನುವುದಕ್ಕೆ ನಿದರ್ಶನದಂತಿರುವ ಆ ವೀಡಿಯೋ ಇದೀಗ ಮತ್ತೊಮ್ಮೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಸ್ಮೃತಿ ಇರಾನಿ ಶೇರ್ ಮಾಡಿರುವ ವೀಡಿಯೋ 2019ರಲ್ಲಿ ಬಿಡುಗಡೆಗೊಂಡಿರುವುದು. ಉತ್ತರ ಪ್ರದೇಶದ ಬನ್ವಾರಿ ತೋಲಾ ಹೆಸರಿನ ಹಳ್ಳಿಯೊಂದರಲ್ಲಿ ಚಿತ್ರೀಕರಿಸಿರುವ ಈ ವೀಡಿಯೋ ಸತ್ಯ ಕಥೆಯೊಂದನ್ನು ಆಧರಿಸಿದ್ದಾಗಿದೆ. 2 ನಿಮಿಷ 19 ಸೆಕೆಂಡುಗಳ ವೀಡಿಯೋದಲ್ಲಿ ಬಡ ಕುಟುಂಬದ ಇಬ್ಬರು ಹೆಣ್ಣು ಮಕ್ಕಳು ಕ್ಷೌರದಂಗಡಿಯಲ್ಲಿ ಕ್ಷೌರ ಮಾಡಿ ಬದುಕು ಸಾಗಿಸುವ ಮನಮುಟ್ಟುವ ಕಥೆಯಿದೆ. ಆ ಹಳ್ಳಿಯಲ್ಲಿರುವ ಕ್ಷೌರದಂಗಡಿಯ ಮಾಲಿಕನಿಗೆ ನೇಹಾ ಮತ್ತು ಜ್ಯೋತಿ ಹೆಸರಿನ ಇಬ್ಬರು ಹೆಣ್ಣು ಮಕ್ಕಳಿದ್ದು, ಮನೆಯಲ್ಲಿರುವ ಕಡುಬಡತನದಲ್ಲಿ ಜೀವನ ನಡೆಸಲೆಂದು ಆ ಇಬ್ಬರೂ ಹೆಣ್ಣು ಮಕ್ಕಳು ಕ್ಷೌರದಂಗಡಿಯಲ್ಲಿ ಗಂಡಿನಂತೆ ದುಡಿಯುವುದನ್ನು ವೀಡಿಯೋದಲ್ಲಿ ತೋರಿಸಲಾಗಿದೆ.
ಈ ವೀಡಿಯೋ ಕಳೆದ ವರ್ಷ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಟಗೊಂಡು ಸಾಕಷ್ಟು ವೈರಲ್ ಆಗಿತ್ತು. ಇದೀಗ ಇದೇ ವೀಡಿಯೋವನ್ನು ಮತ್ತೊಮ್ಮೆ ಶೇರ್ ಮಾಡಿರುವ ಸ್ಮೃತಿ ಇರಾನಿ, ಕೆಲವು ಕಥೆಗಳನ್ನು ಮತ್ತೆ ಮತ್ತೆ ಹೇಳಲೇಬೇಕಾಗುತ್ತದೆ ಎಂದು ಕ್ಯಾಪ್ಷನ್ ಕೊಟ್ಟಿದ್ದಾರೆ.
ಸಚಿವೆ ಶೇರ್ ಮಾಡಿರುವ ವೀಡಿಯೋಕ್ಕೆ ಭಾರೀ ಪ್ರಮಾಣದ ಸ್ಪಂದನೆ ಸಿಗುತ್ತಿದ್ದು, ವೀಡಿಯೋ ಹಾಕಿದ 14 ಗಂಟೆಗಳೊಳಗಾಗಿ 50 ಸಾವಿರಕ್ಕೂ ಹೆಚ್ಚು ವೀಕ್ಷಣೆ ಪಡೆದುಕೊಂಡಿದೆ. ಸ್ಮೃತಿ ಅವರ ಆಪ್ತ ಮಿತ್ರೆ ಏಕ್ತಾ ಕಪೂರ್ ಸೇರಿದಂತೆ ಅನೇಕರು ಕಮೆಂಟ್ ಮಾಡುವ ಮೂಲಕ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. (ಏಜೆನ್ಸೀಸ್)