ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
“ಡೊಳ್ಳು’ ಚಿತ್ರದ ಯಶಸ್ಸಿನ ಬಳಿಕ ಸಾಗರ್ ಪುರಾಣಿಕ್ ನಿರ್ದೇಶನ ಮತ್ತು ಪವನ್ ಒಡೆಯರ್ ನಿರ್ಮಾಣದಲ್ಲಿ “ವೆಂಕ್ಯಾ’ ಸಿನಿಮಾ ಘೋಷಣೆಯಾಗಿರುವುದು ಗೊತ್ತಿದೆ. ಈಗಾಗಲೇ ಚಿತ್ರದ ಶೂಟಿಂಗ್ ಪ್ರಾರಂಭವಾಗಿದ್ದು, ಅದರ ನಡುವೆಯೇ ಚಿತ್ರತಂಡ ಹೊಸ ಪಾತ್ರವನ್ನು ಪರಿಚಯಿಸಿದೆ. ಶಿಮ್ಲಾ ಮೂಲದ ಮಾಡೆಲ್, ನಟಿ ರೂಪಾಲಿ ಸೂದ್ “ವೆಂಕ್ಯಾ’ ಟೀಂ ಸೇರಿಕೊಂಡಿದ್ದು, ಅವರ ಲುಕ್ ಕೂಡ ರಿವೀಲ್ ಆಗಿದೆ.
ಮಾಡೆಲಿಂಗ್ ಜತೆ ಖ್ಯಾತ ಗಾಯಕ ಹಾರ್ಡಿ ಸಂಧುಗೆ ಜೋಡಿಯಾಗಿ “ಹಾರ್ನ್ ಬ್ಲೋ’ ಸೇರಿ ಕೆಲವು ಮ್ಯೂಸಿಕ್ ವಿಡಿಯೋ ಆಲ್ಬಂ ಸಾಂಗ್ಗಳಲ್ಲಿ ಮಿಂಚಿರುವ ರೂಪಾಲಿಗೆ, “ವೆಂಕ್ಯಾ’ ಮೊದಲ ಕನ್ನಡ ಚಿತ್ರ. “ನನಗೆ ಬಾಲ್ಯದಿಂದಲೂ ನಟಿಯಾಗುವ ಆಸೆಯಿತ್ತು. ಐಟಿಯಲ್ಲಿ ಎಂಬಿಎ ಪದವಿ ಪಡೆದಿದ್ದೇನೆ. ಕಾಲೇಜು ದಿನಗಳಿಂದಲೇ ಮಾಡೆಲಿಂಗ್ ಮತ್ತು ಮ್ಯೂಸಿಕ್ ವಿಡಿಯೋಗಳಲ್ಲಿ ಕೆಲಸ ಮಾಡಿ ಅನುಭವ ಪಡೆದಿದ್ದೇನೆ. ಈ ಚಿತ್ರದಲ್ಲಿ ಹಿಮಾಚಲದ ಪಹಾಡಿ ಹುಡುಗಿಯಾಗಿ ಕಾಣಿಸಿಕೊಳ್ಳಲಿದ್ದೇನೆ. ಇತ್ತೀಚೆಗಷ್ಟೆ ಮನಾಲಿಯ ಕೈಲಾಂಗ್ನ ಪರ್ವತಗಳ ನಡುವೆ ಸುಂದರ ಸ್ಥಳಗಳಲ್ಲಿ ಶೂಟಿಂಗ್ ನಡೆಸಿದೆವು. ಕನ್ನಡ ಸಿನಿಮಾ ಮೂಲಕ ವೃತ್ತೀಜಿವನ ಆರಂಭಿಸಿರುವ ಖುಷಿಯಿದೆ’ ಎಂದು ಸಂತಸ ಹಂಚಿಕೊಳ್ಳುತ್ತಾರೆ ರೂಪಾಲಿ ಸೂದ್.
ಉತ್ತರ ಕರ್ನಾಟಕದ ಕಥಾಹಂದರ ಹೊಂದಿರುವ “ವೆಂಕ್ಯಾ’ ಚಿತ್ರಕ್ಕೆ ಶ್ರೀನಿಧಿ ಡಿ.ಎಸ್ ಸಂಭಾಷಣೆ, ಪ್ರಣವ್ ಮುಲೆ ಛಾಯಾಗ್ರಹಣ ಹಾಗೂ ಹೇಮಂತ್ ಜೋಯಿಸ್ ಸಂಗೀತವಿರಲಿದೆ.
