ಮುಂಬೈ: ಚೀನಾ ಮೂಲದ ಕೊರೊನಾ ವೈರಸ್ ಸೋಂಕಿನ ಆತಂಕ ಜಗತ್ತನ್ನುವ್ಯಾಪಿಸಿದ್ದು, ಕಳೆದ ಕೆಲವು ವಾರಗಳಿಂದ ಷೇರುಪೇಟೆ ವಿಪರೀತ ಏರಿಳಿತದೊಂದಿಗೆ ವಹಿವಾಟು ನಡೆಸುತ್ತಿದೆ. ಭಾರತೀಯ ಷೇರುಪೇಟೆಯ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ ಗುರುವಾರ ಬೆಳಗ್ಗೆ ವಹಿವಾಟು ಶುರುವಾಗುತ್ತಿದ್ದಂತೆ 300 ಅಂಶ ಏರಿಕೆ ದಾಖಲಿಸಿದರೆ, ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ 11,300 ತಲುಪಿ ವಹಿವಾಟು ಮುಂದುವರಿಸಿದೆ.
ಕೊರೊನಾ ವೈರಸ್ ಸೋಂಕು ತಡೆಗೆ 50 ಶತಕೋಟಿ ಡಾಲರ್ ಹಣವನ್ನು ಬಡ ಮತ್ತು ಪ್ರವರ್ಧಮಾನಕ್ಕೆ ಬರುತ್ತಿರುವ ಮಾರುಕಟ್ಟೆ ರಾಷ್ಟ್ರಗಳಿಗೆ ಯಾರಿಗೆ ಅಗತ್ಯ ಇದೆಯೋ ಅವರಿಗೆ ಕೂಡಲೇ ಬಿಡುಗಡೆ ಮಾಡುವುದಾಗಿ ಇಂಟರ್ನ್ಯಾಷನಲ್ ಮಾನಿಟರಿ ಫಂಡ್(ಐಎಂಎಫ್) ಬುಧವಾರ ಹೇಳಿತ್ತು. ಇದರ ಬೆನ್ನಲ್ಲೇ ಷೇರುಪೇಟೆಯಲ್ಲೂ ಚೇತರಿಕೆ ಗೋಚರಿಸಿದೆ.
ಗುರುವಾರ ಬೆಳಗ್ಗೆ ಸೆನ್ಸೆಕ್ಸ್ ಅರ್ಲಿ ಟ್ರೇಡ್ನಲ್ಲಿ 299 ಅಂಶ ಏರಿಕೆ ದಾಖಲಿಸಿ ಬಳಿಕ 191.75 ಅಂಶ (0.5%) ಲಾಭ ತೋರಿ 38,601.23ರಲ್ಲಿ ವಹಿವಾಟು ಮುಂದುವರಿಸಿತು. ನಿಫ್ಟಿ 49.25 ಅಂಶ (0.44%) ಏರಿಕೆಯೊಂದಿಗೆ 11,300.25ರಲ್ಲಿ ವಹಿವಾಟು ಶುರುಮಾಡಿದೆ.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಎಚ್ಯುಎಲ್, ಎಚ್ಸಿಎಲ್ ಟೆಕ್, ಟಾಟಾ ಸ್ಟೀಲ್, ನೆಸ್ಟ್ಲೆ ಇಂಡಿಯಾ, ಟಿಸಿಎಸ್, ಏಷ್ಯನ್ ಪೇಂಟ್ಸ್ ಷೇರುಗಳು ಟಾಪ್ ಗೇನರ್ಸ್ ಆಗಿ ಹೊರಹೊಮ್ಮಿವೆ. ಇದೇ ವೇಳೆ ಐಸಿಐಸಿಐ ಬ್ಯಾಂಕ್, ಎಲ್ಆ್ಯಂಡ್ ಟಿ, ಪವರ್ಗ್ರಿಡ್ಸ್, ಎನ್ಟಿಪಿಸಿ, ರಿಲಯನ್ಸ್ ಇಂಡಸ್ಟ್ರೀಸ್ ಕಂಪನಿಗಳ ಷೇರುಗಳು ನಷ್ಟ ಅನುಭವಿಸಿವೆ.
ಬುಧವಾರದ ವಹಿವಾಟಿನಲ್ಲಿ ಬಿಎಸ್ಇ ಸೂಚ್ಯಂಕ ಸೆನ್ಸೆಕ್ಸ್ 214.22 ಅಂಶ ಇಳಿಕೆಯೊಂದಿಗೆ 38,409.48ರಲ್ಲೂ ನಿಫ್ಟಿ 52.30 ಅಂಶ ಇಳಿಕೆಯೊಂದಿಗೆ 11,251ರಲ್ಲೂ ವಹಿವಾಟು ಕೊನೆಗೊಳಿಸಿದ್ದವು. (ಏಜೆನ್ಸೀಸ್)