ಮುಂಬೈ: ಜಾಗತಿಕ ಮಟ್ಟದಲ್ಲಿ ವಿವಿಧ ಷೇರುಪೇಟೆಗಳಲ್ಲಿ ಚೀನಾದ ಕೊರೊನಾ ವೈರಸ್ ಸೋಂಕಿನ ಆತಂಕ ಕಾಡಿ ಭಾರಿ ಪ್ರಮಾಣ ಷೇರು ಮಾರಾಟ ನಡೆದ ಪರಿಣಾಮ, ಭಾರತೀಯ ಷೇರುಪೇಟೆಯ ಮೇಲೂ ಆಗಿದೆ. ಶುಕ್ರವಾರ ದಿನದ ವಹಿವಾಟು ಆರಂಭವಾಗುತ್ತಿದ್ದಂತೆ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ 1,100ಕ್ಕೂ ಹೆಚ್ಚು ಅಂಶ ಕುಸಿತ ಕಂಡಿದೆ. ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ ಕೂಡ 329ಕ್ಕೂ ಹೆಚ್ಚು ಅಂಶ ಕುಸಿದಿದೆ. ಪರಿಣಾಮ ಹೂಡಿಕೆದಾರರು ಒಂದೇ ಸಲಕ್ಕೆ 5 ಲಕ್ಷ ಕೋಟಿ ರೂಪಾಯಿಗೂ ಅಧಿಕ ನಷ್ಟ ಅನುಭವಿಸಿದ್ದಾರೆ.
ಸೆನ್ಸೆಕ್ಸ್ ದಿನದ ವಹಿವಾಟು ಆರಂಭದಲ್ಲಿ ಶೇಕಡ 2.77 ಅಂದರೆ 1,100.27 ಅಂಶ ಕುಸಿದು 38,645.39ರಲ್ಲಿ ವಹಿವಾಟು ಶುರುಮಾಡಿಕೊಂಡಿದೆ. ಇದೇ ರೀತಿ ನಿಫ್ಟಿ ಶೇಕಡ 2.83 ಅಂದರೆ 329.50 ಅಂಶ ಕುಸಿದು 11,303.80ಯಲ್ಲಿ ವಹಿವಾಟು ಆರಂಭಿಸಿದೆ.
ಸೆನ್ಸೆಕ್ಸ್ನ 30 ಷೇರುಗಳ ಪಟ್ಟಿಯಲ್ಲಿ ಎಲ್ಲವೂ ಕೆಂಪು ಬಣ್ಣಕ್ಕೆ ತಿರುಗಿದ್ದು, ಟಾಟಾ ಸ್ಟೀಲ್, ಟೆಕ್ ಮಹಿಂದ್ರಾ, ಇನ್ಫೋಸಿಸ್, ಮಹಿಂದ್ರಾ ಆ್ಯಂಡ್ ಮಹಿಂದ್ರಾ, ಬಜಾಜ್ ಫಿನಾನ್ಸ್, ಎಚ್ಸಿಎಲ್ ಟೆಕ್, ರಿಲಯನ್ಸ್ ಇಂಡಸ್ಟ್ರೀಸ್ ಷೇರುಗಳು ಭಾರಿ ನಷ್ಟ ಅನುಭವಿಸಿವೆ.
ಗುರುವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್ 143.30 ಅಂಶ ಅಥವಾ 0.36% ಕುಸಿದು 39,745.66ರಲ್ಲೂ ನಿಫ್ಟಿ ಶೇಕಡ 0.39 ಅಥವಾ 45.20 ಅಂಶ ಕುಸಿದು 11,633.30ಯಲ್ಲಿ ವಹಿವಾಟು ಮುಗಿಸಿದ್ದವು. ನೆಟ್ ಬೇಸಿಸ್ ಮೇಲೆ ಹೇಳುವುದಾದರೆ, ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಗುರುವಾರ 3,127.36 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ.
ಇನ್ನು, ಶಾಂಘೈ, ಹಾಂಕಾಂಗ್, ಸಿಯೋಲ್, ಟೋಕಿಯೋ ಷೇರುಪೇಟೆಗಳು ಶುಕ್ರವಾರದ ಬೆಳಗ್ಗಿನ ವಹಿವಾಟಿನಲ್ಲಿ ಶೇಕಡ 4 ಕುಸಿತ ಕಂಡಿವೆ. ವಾಲ್ಸ್ಟ್ರೀಟ್ ನಲ್ಲಿ ಡೌ ಜೋನ್ಸ್ ಇಂಡಸ್ಟ್ಟಿಯಲ್ ಅವರೇಜ್ 1,190.95 ಅಂಶ ಕುಸಿತ ಕಂಡು, ಆ ಪೇಟೆಯ ಇತಿಹಾಸದಲ್ಲಿ ಒಂದೇ ದಿನದಲ್ಲಿ ಗರಿಷ್ಠ ಇಳಿಕೆಯನ್ನು ದಾಖಲಿಸಿದೆ. ವಾರದಲ್ಲಿ ಈ ಇಳಿಕೆ ಪ್ರಮಾಣ 3,225.77 ಅಂಶ ಅಥವಾ ಶೇಕಡ 11.1 ಆಗಿದೆ. ಇದೇ ರೀತಿ, S&P 500 ಕೂಡ ಶೇಕಡ 12 ಕುಸಿತ ಅಂದರೆ ವಾರದ ಹಿಂದೆ ಸಾರ್ವಕಾಲಿಕ ಗರಿಷ್ಠ ಮಟ್ಟದ ಇಳಿಕೆಯನ್ನು ದಾಖಲಿಸಿ ನಷ್ಟ ಅನುಭವಿಸಿದೆ. (ಏಜೆನ್ಸೀಸ್)