ಲಖನೌ: ಹ್ಯಾಟ್ರಿಕ್ ಗೆಲುವಿನ ಹಂಬಲದಲ್ಲಿರುವ ಲಖನೌ ಸೂಪರ್ಜೈಂಟ್ಸ್ ಮತ್ತು ಸ್ಥಿರ ನಿರ್ವಹಣೆ ತೋರುವ ತುಡಿತದಲ್ಲಿರುವ ಗುಜರಾತ್ ಟೈಟಾನ್ಸ್ ತಂಡಗಳು ಐಪಿಎಲ್-17ರಲ್ಲಿ ಭಾನುವಾರದ 2ನೇ ಪಂದ್ಯದಲ್ಲಿ ಮುಖಾಮುಖಿ ಆಗಲಿವೆ. ಗುಜರಾತ್ ವಿರುದ್ಧದ ಇದುವರೆಗಿನ 4 ಮುಖಾಮುಖಿಗಳಲ್ಲೂ ಸೋತಿರುವ ಕೆಎಲ್ ರಾಹುಲ್ ಪಡೆ, ಮೊದಲ ಬಾರಿ ಗೆದ್ದು ಬೀಗುವ ಹಂಬಲದಲ್ಲಿದೆ.
ಉಭಯ ತಂಡಗಳು 2022ರಲ್ಲಿ ಜತೆಯಾಗಿ ಐಪಿಎಲ್ಗೆ ಪದಾರ್ಪಣೆ ಮಾಡಿದ್ದವು. ಗುಜರಾತ್ ತಂಡ ಕಳೆದೆರಡೂ ಆವೃತ್ತಿಗಳಲ್ಲಿ ಫೈನಲ್ಗೇರಿದ್ದು, ಒಮ್ಮೆ ಚಾಂಪಿಯನ್ ಆಗಿದೆ. ಇತ್ತ ಲಖನೌ ತಂಡ ಎರಡೂ ಸಲ ಪ್ಲೇಆಫ್ಗೇರಿದ್ದರೂ, ಪ್ರಶಸ್ತಿ ಸನಿಹಕ್ಕೇರುವಲ್ಲಿ ಸಲವಾಗಿಲ್ಲ. ಲಖನೌ ಈ ಬಾರಿ ಟೂರ್ನಿಯಲ್ಲಿ ಸೋಲಿನ ಆರಂಭ ಪಡೆದರೂ, ನಂತರದ 2 ಪಂದ್ಯಗಳಲ್ಲಿ ಗೆಲುವು ದಾಖಲಿಸಿ ಆತ್ಮವಿಶ್ವಾಸದಲ್ಲಿದೆ. ಶುಭಮಾನ್ ಗಿಲ್ ಸಾರಥ್ಯದ ಗುಜರಾತ್ ತಂಡ ಇದುವರೆಗೆ ಆಡಿದ 4 ಪಂದ್ಯಗಳಲ್ಲಿ ತಲಾ 2 ಗೆಲುವು-ಸೋಲು ಕಂಡು ಅಸ್ಥಿರ ಫಾರ್ಮ್ ಪ್ರದರ್ಶಿಸಿದೆ. ಕಳೆದ ಪಂದ್ಯದಲ್ಲಿ ತವರಿನಲ್ಲೇ ಪಂಜಾಬ್ ಎದುರು ಸೋತಿದ್ದು ಗುಜರಾತ್ಗೆ ಹಿನ್ನಡೆ ತಂದಿದೆ.
ನಾಯಕ ಶುಭಮಾನ್ ಗಿಲ್ ಬ್ಯಾಟಿಂಗ್ ಲಯ ಕಂಡುಕೊಂಡಿದ್ದರೆ, ಸಾಯಿ ಸುದರ್ಶನ್ ಕೂಡ ಗಮನಸೆಳೆದಿದ್ದಾರೆ. ವೃದ್ಧಿಮಾನ್ ಸಾಹ, ವಿಜಯ್ ಶಂಕರ್ರಿಂದ ಸಮರ್ಥ ನಿರ್ವಹಣೆ ಬರಬೇಕಿದೆ. ಬೌಲಿಂಗ್ನಲ್ಲಿ ಅನುಭವಿ ವೇಗಿ ಮೋಹಿತ್ ಶರ್ಮ ಮಿಂಚುತ್ತಿದ್ದರೂ, ತಂಡದ ಇತರ ವೇಗಿಗಳು ನಿರಾಸೆ ಮೂಡಿಸುತ್ತಿದ್ದಾರೆ. ಸ್ಪಿನ್ನರ್ ರಶೀದ್ ಖಾನ್ ಕೂಡ ಇನ್ನಷ್ಟು ಪರಿಣಾಮಕಾರಿ ಆಗಬೇಕಿದೆ.
ಮತ್ತೆ ಮಯಾಂಕ್ ಮೇಲೆ ಗಮನ
ಟೂರ್ನಿಯಲ್ಲಿ ತನ್ನ ಉರಿವೇಗದ ದಾಳಿಯಿಂದ ಗಮನಸೆಳೆದಿರುವ ಯುವ ವೇಗದ ಬೌಲರ್ ಮಯಾಂಕ್ ಯಾದವ್ ಈ ಬಾರಿ ಮತ್ತೆ ಪಂದ್ಯದ ಕೇಂದ್ರಬಿಂದುವಾಗಿರಲಿದ್ದಾರೆ. ತನ್ನ ಆರಂಭಿಕ ಎರಡೂ ಪಂದ್ಯಗಳಲ್ಲಿ ತಲಾ 3 ವಿಕೆಟ್ ಕಬಳಿಸಿ ಎದುರಾಳಿ ಬ್ಯಾಟರ್ಗಳನ್ನು ಕಂಗೆಡಿಸಿರುವ 21 ವರ್ಷದ ಮಯಾಂಕ್ ಸತತ 2 ಪಂದ್ಯಶ್ರೇಷ್ಠ ಪ್ರಶಸ್ತಿಗೂ ಭಾಜನರಾಗಿದ್ದಾರೆ. ಈಗಾಗಲೆ ಟೀಮ್ ಇಂಡಿಯಾಗೂ ಎಂಟ್ರಿ ಪಡೆಯುವ ಚರ್ಚೆಯಲ್ಲಿರುವ ಮಯಾಂಕ್, ಈ ಬಾರಿ ಗುಜರಾತ್ ಬ್ಯಾಟರ್ಗಳಿಗೆ ಸವಾಲೊಡ್ಡುವ ನಿರೀಕ್ಷೆ ಇದೆ. ಮಯಾಂಕ್ಗೆ ತಂಡದ ಇತರ ಬೌಲರ್ಗಳಿಂದೂ ಉತ್ತಮ ಬೆಂಬಲ ಲಭಿಸಿದೆ.
ರಾಹುಲ್ ದೊಡ್ಡ ಇನಿಂಗ್ಸ್ ನಿರೀಕ್ಷೆ
ಟಿ20 ವಿಶ್ವಕಪ್ಗೆ ಟೀಮ್ ಇಂಡಿಯಾದ ವಿಕೆಟ್ ಕೀಪರ್&ಬ್ಯಾಟರ್ ಸ್ಥಾನ ತುಂಬುವ ಹಂಬಲದಲ್ಲಿರುವ ಕನ್ನಡಿಗ ಕೆಎಲ್ ರಾಹುಲ್, ಫಿಟ್ನೆಸ್ ಸಮಸ್ಯೆಯ ಜತೆಗೆ ಬಿರುಸಿನ ಬ್ಯಾಟಿಂಗ್ ನಿರ್ವಹಣೆ ತೋರದೆ ಪರದಾಡುತ್ತಿದ್ದಾರೆ. ಆಯ್ಕೆಗಾರರ ಗಮನಸೆಳೆಯಬೇಕಾದರೆ ಅವರು ದೊಡ್ಡ ಇನಿಂಗ್ಸ್ ಆಡುವ ಅಗತ್ಯವೂ ಇದೆ. ಪಂಜಾಬ್ ಎದುರು ಕೇವಲ ಬ್ಯಾಟರ್ ಆಗಿ ಆಡಿದ್ದ ರಾಹುಲ್, ಕಳೆದ ಪಂದ್ಯದಲ್ಲಿ ಆರ್ಸಿಬಿ ಎದುರು ಮತ್ತೆ ನಾಯಕತ್ವ-ಕೀಪಿಂಗ್ ಎರಡನ್ನೂ ನಿರ್ವಹಿಸಿದ್ದಾರೆ. ಇದರಿಂದ ಅವರ ಫಿಟ್ನೆಸ್ ಕಳವಳ ದೂರವಾದಂತಾಗಿದೆ. ಇದೇ ವೇಳೆ ಮತ್ತೋರ್ವ ಕನ್ನಡಿಗ ದೇವದತ್ ಪಡಿಕ್ಕಲ್ ಆಡಿದ ಮೊದಲ ಮೂರೂ ಪಂದ್ಯಗಳಲ್ಲಿ ಎರಡಂಕಿ ತಲುಪದೆ ನಿರಾಸೆ ಮೂಡಿಸಿದ್ದಾರೆ. ದೇಶೀಯ ಕ್ರಿಕೆಟ್ನಲ್ಲಿ ರನ್ಪ್ರವಾಹ ಹರಿಸಿದ್ದ ಎಡಗೈ ಬ್ಯಾಟರ್ ಪಡಿಕ್ಕಲ್ ಐಪಿಎಲ್ನಲ್ಲೂ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಳ್ಳಬೇಕಿದೆ.
*ಮುಖಾಮುಖಿ: 4
ಲಖನೌ: 0
ಗುಜರಾತ್: 4
ಆರಂಭ: ರಾತ್ರಿ 7.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋಸಿನಿಮಾ.
ವಿರಾಟ್ ಶತಕದ ನಡುವೆಯೂ ರಾಜಸ್ಥಾನಕ್ಕೆ ಮಣಿದ ಆರ್ಸಿಬಿ: ಅಬ್ಬರಿಸಿದ ಬಟ್ಲರ್