ಟೆಸ್ಟ್ ಕ್ರಿಕೆಟ್ನಲ್ಲಿ ಜೀವನಶ್ರೇಷ್ಠ ಬ್ಯಾಟಿಂಗ್ ನಿರ್ವಹಣೆ ತೋರುವ ಮೂಲಕ 33 ವರ್ಷದ ರವೀಂದ್ರ ಜಡೇಜಾ ಮೊಹಾಲಿಯಲ್ಲಿ ಶನಿವಾರ ವಿಜೃಂಭಿಸಿದರು. ಕ್ರಮವಾಗಿ 45 ಮತ್ತು 10 ರನ್ನಿಂದ ದಿನದಾಟ ಆರಂಭಿಸಿದ ಜಡೇಜಾ-ಅಶ್ವಿನ್ ಜೋಡಿ, 7ನೇ ವಿಕೆಟ್ ಜತೆಯಾಟವನ್ನು 130 ರನ್ಗಳಿಗೆ ವಿಸ್ತರಿಸುವ ಮೂಲಕ ಲಂಕಾ ಬೌಲರ್ಗಳಿಗೆ ಸವಾಲೊಡ್ಡಿತು. ಅರ್ಧಶತಕ ಬಾರಿಸಿದ ಅಶ್ವಿನ್ (61ರನ್, 82 ಎಸೆತ, 8 ಬೌಂಡರಿ) ಜಡೇಜಾ ಶತಕದಿಂದ ಕೇವಲ 1 ರನ್ ದೂರವಿದ್ದಾಗ ಲಕ್ಮಲ್ ಎಸೆತದಲ್ಲಿ ಔಟಾದರು. ಬಳಿಕ ಜಯಂತ್ ಯಾದವ್ ಬೆಂಬಲದೊಂದಿಗೆ ಜಡೇಜಾ ಭೋಜನ ವಿರಾಮಕ್ಕೂ ಮೊದಲೇ ಶತಕ ಪೂರೈಸಿದರು. ಎಂದಿನಂತೆ ಖಡ್ಗ ಝಳಪಿಸುವ ರೀತಿಯಲ್ಲಿ ಬ್ಯಾಟ್ ತಿರುಗಿಸಿ ಜಡೇಜಾ ಶತಕವನ್ನು ಸಂಭ್ರಮಿಸಿದರು. ಜಯಂತ್ ಯಾದವ್ (2) ಹೆಚ್ಚು ಹೊತ್ತು ನಿಲ್ಲದೆ ನಿರ್ಗಮಿಸಿದರು. ಬಳಿಕ ಮತ್ತಷ್ಟು ಬಿರುಸಿನ ಬ್ಯಾಟಿಂಗ್ಗೆ ಇಳಿದ ಜಡೇಜಾ, ಮೊಹಮದ್ ಶಮಿ ಜತೆಗೂಡಿ ಮುರಿಯದ 9ನೇ ವಿಕೆಟ್ಗೆ 94 ಎಸೆತಗಳಲ್ಲೇ 103 ರನ್ ಸೇರಿಸಿದರು. ಇದರಲ್ಲಿ 71 ರನ್ ಜಡೇಜಾ ಬ್ಯಾಟ್ನಿಂದಲೇ ಸಿಡಿಯಿತು. ಐದೂವರೆ ಗಂಟೆಗಳ ಕಾಲ ಬ್ಯಾಟಿಂಗ್ ಮಾಡಿದ ಜಡೇಜಾ, ಲಂಕಾ ಬೌಲರ್ಗಳಿಗೆ ಕಗ್ಗಂಟಾಗಿಯೇ ಉಳಿದರು. ಮೊದಲ ದಿನ ಸ್ವಲ್ಪ ಹರಿತವಾಗಿದ್ದ ಲಂಕಾ ದಾಳಿ 2ನೇ ದಿನ ಸಂಪೂರ್ಣ ಮಂಕಾಗಿತ್ತು.
