ನವದೆಹಲಿ: ದೇಶದಲ್ಲಿನ ಕರೊನಾ ಪರಿಸ್ಥಿತಿ ನಿಭಾಯಿಸುವ ಸಲುವಾಗಿ ಎನ್-95 ಮಾಸ್ಕ್ಗಳ ರಫ್ತು ಮೇಲೆ ನಿರ್ಬಂಧ ವಿಧಿಸಿದ್ದ ಕೇಂದ್ರ ಸರ್ಕಾರ ಈಗ ಅದನ್ನು ತೆರವುಗೊಳಿಸಿದೆ. ಡೈರೆಕ್ಟೊರೇಟ್ ಜನರಲ್ ಆಫ್ ಫಾರಿನ್ ಟ್ರೇಡ್ ಈ ಕುರಿತು ಆದೇಶವನ್ನು ಹೊರಡಿಸಿದೆ.
ದೇಶದೊಳಗಿನ ಕರೊನಾ ಪ್ರಕರಣ ನಿಯಂತ್ರಣದಲ್ಲಿಡುವ ಸಲುವಾಗಿ ಸರ್ಕಾರ ಮಾಸ್ಕ್ಗಳ ರಫ್ತಿನ ಮೇಲೆ ಸಂಪೂರ್ಣ ನಿರ್ಬಂಧ ಹೇರಿತ್ತು. ಬಳಿಕ ಆಗಸ್ಟ್ನಲ್ಲಿ ಎನ್-95 ಮಾಸ್ಕ್ಗಳನ್ನು ತಿಂಗಳಿಗೆ 50 ಲಕ್ಷಕ್ಕೆ ಮೀರದಂತೆ ರಫ್ತು ಮಾಡಬಹುದು ಎಂದು ಸರ್ಕಾರ ಹೇಳಿತ್ತು.
ಇದೀಗ ಎನ್-95 ಮಾಸ್ಕ್ಗಳ ರಫ್ತು ಮೇಲೆ ಇದ್ದ ನಿರ್ಬಂಧವನ್ನು ಸರ್ಕಾರ ಸಂಪೂರ್ಣವಾಗಿ ತೆರವುಗೊಳಿಸಿದೆ. ಮಾತ್ರವಲ್ಲ ಎನ್-95 ಸೇರಿ ಯಾವುದೇ ಥರದ ಮಾಸ್ಕ್ಗಳನ್ನು ಎಷ್ಟು ಬೇಕಾದರೂ ರಫ್ತು ಮಾಡಬಹುದು ಎಂಬುದಾಗಿ ಸೂಚಿಸಿರುವ ಸರ್ಕಾರ, ದೇಶದಲ್ಲಿ ಈಗ ಸಾಕಷ್ಟು ಪ್ರಮಾಣದ ಮಾಸ್ಕ್ಗಳು ಉತ್ಪಾದನೆ ಆಗುತ್ತಿವೆ ಎಂದು ತಿಳಿಸಿದೆ. (ಏಜೆನ್ಸೀಸ್)