ಹೈದರಾಬಾದ್: ಹೆಂಡತಿಯಾದವಳು ತನ್ನ ಮಾಂಗಲ್ಯ ಭಾಗ್ಯ ಉಳಿಸಿಕೊಳ್ಳಲು ಯಾವುದೇ ಸಾಹಸಕ್ಕೂ ಮುಂದಾಗುತ್ತಾಳೆ ಎನ್ನುವುದಕ್ಕೆ ತೆಲಂಗಾಣದ ವಾರಂಗಲ್ ನಗರದಲ್ಲಿ ನಡೆದಿರುವ ಈ ಒಂದು ಘಟನೆ ತಾಜಾ ಉದಾಹರಣೆಯಾಗಿದೆ. ಮಧ್ಯರಾತ್ರಿ ಗಂಡನನ್ನು ಕೊಲ್ಲಲು ಬಂದ ದುಷ್ಕರ್ಮಿಗಳ ವಿರುದ್ಧ ಉಪಾಯದಿಂದ ಹೋರಾಡಿ ತನ್ನ ಮಾಂಗಲ್ಯ ಭಾಗ್ಯವನ್ನು ಮಹಿಳೆ ಉಳಿಸಿಕೊಂಡಿದ್ದು, ಈ ಸುದ್ದಿ ಇದೀಗ ವಾರಂಗಲ್ ನಗರದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
ವೇಮುಲ ಭೊಪಾಲ್ ಎಂಬಾತ ವಾರಂಗಲ್ ಜಿಲ್ಲಾ ಲಾರಿ ಸಂಘದ ಅಧ್ಯಕ್ಷರಾಗಿದ್ದು, ಶಂಭುನಿಪೇಟೆಯಲ್ಲಿ ವಾಸವಿದ್ದಾರೆ. ಬುಧವಾರ ಮಧ್ಯರಾತ್ರಿ ಆಟೋದಲ್ಲಿ ಬಂದು ನಾಲ್ವರಲ್ಲಿ ಮೂವರು ಭೊಪಾಲ್ ಮನೆಯ ಬಾಗಿಲನ್ನು ಮುರಿದು ಒಳಗೆ ನುಗ್ಗಿ ಏಕಾಏಕಿ ಕೊಲ್ಲಲು ಯತ್ನಿಸಿದ್ದಾರೆ.
ಗಂಡ ಕೂಗಿಕೊಳ್ಳುವುದನ್ನು ಕೇಳಿ ಎಚ್ಚರಗೊಂಡ ಭೊಪಾಲ್ ಪತ್ನಿ ಕಲ್ಯಾಣಿ, ದುಷ್ಕರ್ಮಿಗಳು ಹಲ್ಲೆ ಮಾಡುತ್ತಿರುವುದನ್ನು ನೋಡಿ ತಕ್ಷಣ ಅಡುಗೆ ಮನೆ ಹೋಗಿ ಮೆಣಸಿನ ಪುಡಿಯನ್ನು ತಂದು ದುಷ್ಕರ್ಮಿಗಳ ಕಣ್ಣಿಗೆ ಎರಚಿದ್ದಾಳೆ. ಬಳಿಕ ಜೋರಾಗಿ ಕೂಗಿಕೊಳ್ಳಲು ಆರಂಭಿಸಿದಾಗ ಹೆದರಿದ ದುಷ್ಕರ್ಮಿಗಳು ಅಲ್ಲಿಂದ ಪರಾರಿಯಾಗಿದ್ದಾರೆ. ಕಲ್ಯಾಣಿ ಕೂಗಿದನ್ನು ಕೇಳಿ ಎಚ್ಚರಗೊಂಡ ಭೊಪಾಲ್ ಸಹೋದರ ಕ್ರಾಂತಿಕುಮಾರ್ ತಕ್ಷಣ ಅಲ್ಲಿಗೆ ಹೋಗಿ ದುಷ್ಕರ್ಮಿಗಳಲ್ಲಿ ಒಬ್ಬನಾದ ರಂಜಿತ್ ಎಂಬುವನನ್ನು ಹಿಡಿದುಕೊಂಡಿದ್ದಾರೆ.
ಕ್ರಾಂತಿಕುಮಾರ್ ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಬಂದ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ. ಕೊಲೆ ಯತ್ನ ಪ್ರಕರಣವನ್ನು ದಾಖಲಿಸಿದ್ದು, ತನಿಖೆ ಆರಂಭಿಸಿರುವ ಪೊಲೀಸರು ಇನ್ನುಳಿದ ಆರೋಪಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ. ಜಮೀನು ವಿಚಾರವಾಗಿ ತಕರಾರು ಇದ್ದು ವಿರೋಧಿ ಬಣದವರು ಈ ದುಷ್ಕೃತ್ಯ ಮಾಡಿರಬಹುದು ಎಂದು ಭೊಪಾಲ್ ಮತ್ತು ಕ್ರಾಂತಿಕುಮಾರ್ ದೂರು ನೀಡಿದ್ದು, ಪ್ರಕರಣವನ್ನು ಪೊಲೀಸರು ಗಂಭೀರವಾಗಿ ತೆಗೆದುಕೊಂಡಿದ್ದಾರೆ. (ಏಜೆನ್ಸೀಸ್)
ಮತ್ತೆ ಒಂದಾಗ್ತಾರಾ ಮಾಜಿ ತಾರಾದಂಪತಿ? ಸಮಂತಾರ ಈ ನಡೆಯಿಂದ ಅಭಿಮಾನಿಗಳಲ್ಲಿ ಚಿಗುರಿದ ಆಸೆ!
ಕರೊನಾ ಹಿನ್ನೆಲೆ ನಿರ್ಬಂಧಗಳ ಕುರಿತು ವೈಜ್ಞಾನಿಕ ನೆಲೆಯಲ್ಲಿ ತೀರ್ಮಾನ: ಸಿಎಂ ಬೊಮ್ಮಾಯಿ
ವಿಆರ್ಎಲ್ ಹೆಸರಲ್ಲಿ ವಂಚನೆ: ನಕಲಿ ವೆಬ್ಸೈಟ್ ಸೃಷ್ಟಿಸಿ ಗ್ರಾಹಕರಿಗೆ ಮೋಸ, ಎಫ್ಐಆರ್ ದಾಖಲು