ಹೈದರಾಬಾದ್: ನನ್ನ ಮೇಲೆ ಪೊಲೀಸ್ ಅಧಿಕಾರಿ ಹಲ್ಲೆ ಮಾಡಿದರು ಎಂದು ತೆಲಂಗಾಣದ ಮೆಹಬೂಬಬಾದ್ ಜಿಲ್ಲೆಯ ವ್ಯಕ್ತಿಯೊಬ್ಬ ಆರೋಪಿಸಿದ್ದಾರೆ. ಭಾನುವಾರ ಈ ಘಟನೆ ನಡೆದಿದ್ದು, ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ತೋಳಲ್ಲಿ ತನ್ನ 8 ವರ್ಷದ ಮಗಳನ್ನು ಹೊತ್ತುಕೊಂಡು ಪೊಲೀಸ್ ಅಧಿಕಾರಿಯ ಜತೆ ವಾಗ್ವಾದ ಮಾಡುತ್ತಿರುವ ದೃಶ್ಯ ವೈರಲ್ ಆಗಿರುವ ವಿಡಿಯೋದಲ್ಲಿದೆ. ಹೆಲ್ಮೆಟ್ ಧರಿಸಿಲ್ಲ ಎಂಬ ಕಾರಣಕ್ಕೆ ಸಬ್ ಇನ್ಸ್ಪೆಕ್ಟರ್ ಒಬ್ಬರ ನನ್ನ ಕಪಾಳಕ್ಕೆ ಬಾರಿಸಿದರು ಎಂದು ಹಿರಿಯ ಪೊಲೀಸ್ ಅಧಿಕಾರಿಯ ಮುಂದೆ ಸಂತ್ರಸ್ತ ವ್ಯಕ್ತಿ ಅಳಲು ತೋಡಿಕೊಂಡಿದ್ದಾನೆ. ಆದರೆ, ಹೊಡೆದಿದ್ದಾರೆ ಎನ್ನುವುದಕ್ಕೆ ಯಾವುದೇ ವಿಡಿಯೋ ಆಧಾರವಿಲ್ಲ.
ಮಗಳೊಂದಿಗೆ ಶ್ರೀನಿವಾಸ್ ಎಂಬುವರು ತರಕಾರಿ ತರಲು ಹೊರಗಡೆ ಹೋದಾಗ ಈ ಘಟನೆ ಸಂಭವಿಸಿದೆ. ಸಬ್ ಇನ್ಸ್ಪೆಕ್ಟರ್ ಮುನಿರುಲ್ಲಾ ಮಧ್ಯ ಪ್ರವೇಶಿಸಿ ಹೆಲ್ಮೆಟ್ ಧರಿಸಿಲ್ಲ ಅಂತಾ ಕಪಾಳಕ್ಕೆ ಬಾರಿಸಿದ್ದಾರೆ. ಬೇಕಾದರೆ ನೀವು ದಂಡ ವಿಧಿಸಿ ಆದರೆ, ನನ್ನ ಮೇಲೇಕೆ ನೀವು ಕೈ ಮಾಡುತ್ತೀರಾ ಎಂದು ಶ್ರೀನಿವಾಸ್ ಎಸ್ಐ ಮುನಿರುಲ್ಲಾರನ್ನು ಪ್ರಶ್ನಿಸಿರುವುದು ವಿಡಿಯೋದಲ್ಲಿದೆ. ತಂದೆಗೆ ಹೊಡೆದಿದ್ದನ್ನು ನೋಡಿ ಮಗು ಕೂಡ ವಿಚಲಿತಗೊಂಡಿರುವಂತೆ ವಿಡಿಯೋದಲ್ಲಿ ಕಾಣುತ್ತದೆ. ನಾವೇನು ತಪ್ಪು ಮಾಡಿಲ್ಲ, ಯೋಚನೆ ಮಾಡಬೇಡ ಮಗಳೇ ಎಂದು ಶ್ರೀನಿವಾಸ್ ಹೇಳುತ್ತಿರುವುದು ಸಹ ವಿಡಿಯೋದಲ್ಲಿದೆ.
ಶ್ರೀನಿವಾಸ್, ಮುನಿರುಲ್ಲಾ ಅವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾನೆ ಎಂದು ಜಿಲ್ಲಾ ಪೊಲೀಸ್ ಉಸ್ತುವಾರಿ ಕೋಟಿ ರೆಡ್ಡಿ ತಿಳಿಸಿದ್ದಾರೆ. ಆದರೆ, ಸಂತ್ರಸ್ತನ ಮಗಳ ಹೇಳಿಕೆಯು ಸಹ ವಿಡಿಯೋದಲ್ಲಿ ರೆಕಾರ್ಡ್ ಆಗಿದ್ದು, ಹೆಲ್ಮೆಟ್ ಹಾಕಿಲ್ಲ ಅಂತಾ ನಮ್ಮನ್ನು ತಡೆದು ನಿಂದಿಸಿದರು. ಅಲ್ಲದೆ, ಬೈಕ್ ಕೀಯನ್ನು ಕಿತ್ತುಕೊಂಡರು. ಇದನ್ನು ಪ್ರಶ್ನಿಸಿ ಪ್ರತಿಭಟಿಸಿದಾಗ ನನ್ನ ತಂದೆಯ ಮೇಲೆ ಎಸ್ಐ ಕೈ ಮಾಡಿದರು ಎಂದು ಬಾಲಕಿ ಹೇಳಿದ್ದಾಳೆ.
ವಿಡಿಯೋ ಕುರಿತ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಟೀಕೆಗಳು ವ್ಯಕ್ತವಾಗಿವೆ. ಪೊಲೀಸರ ದುರಹಂಕಾರದ ಘಟನೆಗಳು ಮಿತಿಮೀರಿವೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.ಇನ್ನು ಕೆಲವರು ಇದನ್ನು ಕೋವಿಡ್-ಪ್ರೇರಿತ ಲಾಕ್ಡೌನ್ನ ಆರಂಭಿಕ ದಿನಗಳಿಗೆ ಹೋಲಿಸಿದ್ದು, ಪೊಲೀಸರು ನಿಯಮಗಳನ್ನು ಜಾರಿಗೊಳಿಸುವ ಉತ್ಸಾಹದಲ್ಲಿ ನಾಗರಿಕರ ವಿರುದ್ಧ ವಿವೇಚನಾರಹಿತವಾಗಿ, ಹಿಂಸಾತ್ಮಕವಾಗಿ ವರ್ತಿಸಿದ್ದಾರೆಂದು ದೂರಿದ್ದಾರೆ. (ಏಜೆನ್ಸೀಸ್)
ಸಮವಸ್ತ್ರ ಧರಿಸಿ ಎಡವಟ್ಟು: ಮಹಿಳಾ ಪೊಲೀಸ್ ಅಧಿಕಾರಿಗೆ ಎದುರಾಯ್ತು ಸಂಕಷ್ಟ!
ಅಮ್ಮನ ಆಸ್ತಿ ಪಡೆಯಬೇಕಾದರೆ ಅಣ್ಣನ ಮಕ್ಕಳ ಸಹಿ ಬೇಕಾ? ಕಾನೂನು ಹೇಳುವುದೇನು? ಇಲ್ಲಿದೆ ಉತ್ತರ…
ಅಬ್ಬಬ್ಬಾ ಈ ಹುಡುಗನೇ! ಅಪ್ಪ ಬೈದರೆಂದು ಹೀಗೇ ಮಾಡೋದಾ? ಹೊಟ್ಟೆಯಲ್ಲಿ ಮೊಳೆಗಳನ್ನು ನೋಡಿ ಬೆಚ್ಚಿಬಿದ್ದ ವೈದ್ಯರು!