ಬೆಂಗಳೂರು: ಸದ್ಯ ಯಾರಾದರೂ ಟೆಡ್ಡಿ ಬೇರ್ ಹಿಡಿದುಕೊಂಡು ಹೋಗುತ್ತಿದ್ದರೂ ಅನುಮಾನದಿಂದ ನೋಡುವಂತಹ ಸಾಧ್ಯತೆಗಳೂ ಇವೆ. ಏಕೆಂದರೆ ಟೆಡ್ಡಿ ಬೇರ್ ಮೂಲಕವೂ ಡ್ರಗ್ಸ್ ಸಾಗಿಸುತ್ತಿದ್ದ ಪೆಡ್ಲರ್ಸ್ ಪೊಲೀಸರ ಕೈಗೆ ಸಿಕ್ಕಿಹಾಕಿಕೊಂಡಿದ್ದಾರೆ.
ಅಂದಹಾಗೆ ಈ ಡ್ರಗ್ಸ್ ಮಾರಾಟ ಮಾಫಿಯಾದವರು ಬರೀ ಟೆಡ್ಡಿ ಬೇರ್ ಮಾತ್ರವಲ್ಲ, ಚಾಕೊಲೇಟ್, ಮೆಡಿಕಲ್ ಕಿಟ್ಗಳಲ್ಲೂ ಡ್ರಗ್ಸ್ ತುಂಬಿ ರಾಜಾರೋಷವಾಗಿ ಸಾಗಿಸಲು ಅನುಕೂಲವಾಗುವಂಥ ಟ್ರಿಕ್ಸ್ ಕಂಡುಕೊಂಡಿದ್ದರು. ಅದಾಗ್ಯೂ ಈಗ ಪೊಲೀಸರ ಕೈಗೆ ಸಿಕ್ಕಿ ಹಾಕಿಕೊಂಡಿದ್ದಾರೆ.
ಈ ರೀತಿ ಟೆಡ್ಡಿ ಬೇರ್, ಚಾಕೊಲೇಟ್, ಮೆಡಿಕಲ್ ಕಿಟ್ ಮೂಲಕ ಡ್ರಗ್ಸ್ ಮಾರಾಟ ದಂಧೆ ನಡೆಸುತ್ತಿದ್ದ ಹೊರರಾಜ್ಯದ ಮೂವರನ್ನು ಬೆಂಗಳೂರಿನ ಮೈಕೋ ಲೇಔಟ್ ಪೊಲೀಸರು ಬಂಧಿಸಿದ್ದಾರೆ. ಜಾರ್ಖಂಡ್ ರಾಜ್ಯದ ಆಯುಷ್ ಪಾಂಡೆ ಅಲಿಯಾಸ್ ಪ್ರದೀಪ್ ಪಾಂಡೆ, ರೋಹಿತ್ ರಾಮ್ ಅಲಿಯಾಸ್ ಅರುಣ್ ರಾಮ್ ಮತ್ತು ಅಸ್ಸಾಮ್ನ ನೂರ್ ಅಲಿ ಅಲಿಯಾಸ್ ಮೊಮಿನ್ ಅಲಿ ಬಂಧಿತರು. ಬಂಧಿತರಿಂದ 23.80 ಲಕ್ಷ ರೂ. ಮೌಲ್ಯದ 8 ಬೇರೆ ಬೇರೆ ಥರದ ಮಾದಕ ವಸ್ತುಗಳು, 2 ದ್ವಿಚಕ್ರ ವಾಹನ ಮತ್ತು ಮೂರು ಮೊಬೈಲ್ ಫೋನ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಆರೋಪಿಗಳಲ್ಲಿ ರೋಹಿತ್ ಹಾಗೂ ಆಯುಷ್ ಕೊರಿಯರ್ ಮೂಲಕ ರಾಜಸ್ಥಾನ, ಪಶ್ಚಿಮ ಬಂಗಾಳ, ರಾಜಸ್ಥಾನ, ಡಾರ್ಜಿಲಿಂಗ್ ಮತ್ತು ಆಂಧ್ರಪ್ರದೇಶಗಳಿಂದ ಸ್ಪೀಕರ್ ಬಾಕ್ಸ್, ಟೆಡ್ಡಿ ಬೇರ್, ಮೆಡಿಕಲ್ ಕಿಟ್ ಬಾಕ್ಸ್ಗಳಲ್ಲಿ ಡ್ರಗ್ಸ್ ತುಂಬಿ ಕಳುಹಿಸುತ್ತಿದ್ದರು. ಅದನ್ನು ನೂರ್ ಸ್ವೀಕರಿಸಿ ಗ್ರಾಹಕರ ಲೊಕೇಷನ್ ಪಡೆದು ತಲುಪಿಸುತ್ತಿದ್ದ. ಈ ಬಗ್ಗೆ ಸಿಕ್ಕ ಮಾಹಿತಿ ಮೇರೆಗೆ ಆರೋಪಿಗಳನ್ನು ಪತ್ತೆ ಹಚ್ಚಿ ಬಂಧಿಸಲಾಗಿದೆ ಎಂದು ಆಗ್ನೇಯ ವಿಭಾಗದ ಡಿಸಿಪಿ ಶ್ರೀನಾಥ್ ಮಹದೇವ ಜೋಶಿ ತಿಳಿಸಿದ್ದಾರೆ.