ಇಸ್ಲಮಾಬಾದ್: ಜಾಗತಿಕವಾಗಿ ಭಯೋತ್ಪಾದನೆಗೆ ಹಣಕಾಸು ನೆರವು ಒದಗಿಸುವುದರ ಮೇಲೆ ಹದ್ದಿನ ಕಣ್ಣಿಡುವ ಹಣಕಾಸು ನಿಗಾ ಕಾರ್ಯಪಡೆ(ಎಫ್ಎಟಿಎಫ್)ಯು ಪಾಕಿಸ್ತಾನವನ್ನು ಬೂದು ಪಟ್ಟಿ( ಗ್ರೇ ಲೀಸ್ಟ್)ಯಲ್ಲೇ ಮುಂದುವರಿಸಲು ಮಂಗಳವಾರ ಶಿಫಾರಸು ಮಾಡಿದೆ.
ಸದ್ಯ ನಡೆಯುತ್ತಿರುವ ಪ್ಯಾರಿಸ್ ಸಮಗ್ರ ಅಧಿವೇಶನದಲ್ಲಿ ಎಫ್ಎಟಿಎಫ್ನ ಕೊ- ಆಪರೇಷನ್ ರಿವ್ಯೂವ್ ಗ್ರೂಪ್(ಐಸಿಆರ್ಜಿ) ಸಭೆಯಲ್ಲಿ ಈ ನಿರ್ಣಯವನ್ನು ಕೈಗೊಳ್ಳಲಾಗಿದೆ.
ಐಸಿಆರ್ಜಿ ಸಭೆಯು ಎಫ್ಎಟಿಎಫ್ನ ಉಪ ತಂಡವಾಗಿದ್ದು, ಪಾಕಿಸ್ತಾನವನ್ನು ಬೂದು ಪಟ್ಟಿಯಲ್ಲಿಯೇ ಮುಂದುವರಿಸಲು ಶಿಫಾರಸು ಮಾಡಿದೆ. ಪಾಕಿಸ್ತಾನ ಸಮಸ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು ಶುಕ್ರವಾರ ಅಂತಿಮ ನಿರ್ಧಾರವನ್ನು ಕೈಗೊಳ್ಳುವುದಾಗಿ ಎಫ್ಎಟಿಎಫ್ ತಿಳಿಸಿದೆ.
ಪಾಕಿಸ್ತಾನದ ಭಯೋತ್ಪಾದನಾ ನಿಗ್ರಹ ನ್ಯಾಯಾಲಯವು 2008ರ ಮುಂಬೈ ದಾಳಿಯ ಮಾಸ್ಟರ್ ಮೈಂಡ್ ಹಫೀಜ್ ಸೈಯದ್ಗೆ ಶಿಕ್ಷೆ ವಿಧಿಸಿದ ವಾರದ ಬೆನ್ನಲ್ಲೇ ಎಫ್ಎಟಿಎಫ್ ಮಹತ್ವದ ಸಭೆ ನಡೆದಿದೆ. ಪಾಕಿಸ್ತಾನ ಕೋರ್ಟ್ ತೀರ್ಪು ಬೂದು ಪಟ್ಟಿಯಿಂದ ಪಾಕ್ ಹೊರಬರಲು ಕಾರಣವಾಗಲಿದೆಯಾ ಎಂಬ ಮಾತುಗಳು ಕೇಳಿಬರುತ್ತಿದೆ.
ಇತ್ತ ಭಾರತ ಪಾಕಿಸ್ತಾನ ಉಲ್ಲೇಖಿಸಿ ಲಷ್ಕರ್ ಇ ತೋಯ್ಬಾ, ಜೈಷ್ ಇ ಮೊಹಮ್ಮದ್ ಮತ್ತು ಹಿಜ್ಬುಲ್ ಮುಜಾಹಿದ್ದೀನ್ ಸಂಘಟನೆಗಳಿಗೆ ನಿರಂತರವಾಗಿ ಪಾಕ್ ಬೆಂಬಲ ನೀಡುತ್ತಾ ಬರುತ್ತಿದೆ. ಭಾರತವನ್ನು ಗುರಿಯಾಗಿರಿಸಿಕೊಂಡಿದ್ದು, ಪಾಕ್ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಎಫ್ಎಟಿಎಫ್ ಅನ್ನು ಭಾರತ ಒತ್ತಾಯಿಸುತ್ತಾ ಬಂದಿದೆ.
ಬೂದ ಪಟ್ಟಿಯಿಂದ ಬಿಳಿ ಪಟ್ಟಿಗೆ ಪಾಕ್ ಬರಬೇಕಾದರೆ ಒಟ್ಟು 39 ಮತಗಳಲ್ಲಿ ಪಾಕ್ಗೆ 12 ಮತಗಳು ಬೇಕಾಗಿದೆ. ಕಪ್ಪು ಪಟ್ಟಿಯಿಂದ ತಪ್ಪಿಸಿಕೊಳ್ಳಲು ಪಾಕ್ಗೆ ಮೂರು ದೇಶಗಳ ಬೆಂಬಲ ಬೇಕಾಗಿದೆ.
ಕಳೆದ ತಿಂಗಳು ಬೀಜಿಂಗ್ನಲ್ಲಿ ನಡೆದ ಎಫ್ಎಟಿಎಫ್ ಸಭೆಯಲ್ಲಿ ಪಾಕ್, ಮಲೆಶಿಯಾ ಮತ್ತು ಟರ್ಕಿ ಬೆಂಬಲವನ್ನು ಪಡೆದಿದೆ. (ಏಜೆನ್ಸೀಸ್)