ನವದೆಹಲಿ: ಓಲಾ ಎಲೆಕ್ಟ್ರಿಕ್ ಸ್ಕೂಟರ್ನ ಆನ್ಲೈನ್ ಖರೀದಿಗಾಗಿ ಒದಗಿಸಿದ್ದ ಮೊದಲ ಅವಕಾಶದಲ್ಲೇ 1,100 ಕೋಟಿ ರೂಪಾಯಿಗೂ ಹೆಚ್ಚು ದಾಖಲೆ ಮೊತ್ತದ ವಾಹನಗಳ ಮಾರಾಟ ನಡೆದಿದೆ ಎಂದು ಓಲಾ ಕಂಪೆನಿ ಸಿಇಒ ಭವಿಶ್ ಅಗರ್ವಾಲ್ ತಿಳಿಸಿದ್ದಾರೆ. ಅಕ್ಟೋಬರ್ ತಿಂಗಳಲ್ಲಿ ಸುಮಾರು ಒಂದು ಸಾವಿರ ನಗರ ಮತ್ತು ಪಟ್ಟಣಗಳ ಖರೀದಿದಾರರಿಗೆ ಡೆಲಿವರಿ ನೀಡಲಾಗುವುದು ಎಂದಿದ್ದಾರೆ.
ಓಲಾದ ಎಸ್1 ಮತ್ತು ಎಸ್1 ಪ್ರೋ ಸ್ಕೂಟರ್ಗಳ ಖರೀದಿಗಾಗಿ ಗ್ರಾಹಕರಿಗೆ ಸೆಪ್ಟೆಂಬರ್ 15 ಮತ್ತು 16 ರಂದು ಒಟ್ಟು 48 ಗಂಟೆಗಳ ಕಾಲ ಪರ್ಚೇಸ್ ವಿಂಡೋ ತೆರೆಯಲಾಗಿತ್ತು. ಜುಲೈ 2021 ರಲ್ಲಿ ಈ ಸ್ಕೂಟರ್ಗಾಗಿ ಆನ್ಲೈನ್ ರಿಸರ್ವೇಷನ್ ಮಾಡಿಸಿದ್ದ ಗ್ರಾಹಕರಿಗೆ ಆದ್ಯತೆ ನೀಡಲಾಯಿತು ಎನ್ನಲಾಗಿದೆ.
ಇದನ್ನೂ ಓದಿ: ಯೂ ಟೂಬ್ನಿಂದ ತಿಂಗಳಿಗೆ 4 ಲಕ್ಷ ರೂಪಾಯಿ ದುಡಿಯುತ್ತಿದ್ದಾರೆ ಕೇಂದ್ರ ಸಚಿವ ನಿತಿನ್ ಗಡ್ಕರಿ!
“ಈ ಎರಡು ದಿನಗಳಲ್ಲಿ 1,100 ಕೋಟಿ ರೂ.ಗಳಷ್ಟು ಮಾರಾಟ ನಡೆದಿದೆ. ಇದು ಆಟೋಮೇಟಿವ್ ಉದ್ಯಮದಲ್ಲಿ ಮೊಟ್ಟಮೊದಲ ಬಾರಿ ನಡೆದಿರುವಂತಹುದು. ಅಷ್ಟೇ ಅಲ್ಲ, ಇದು ಭಾರತೀಯ ಈ-ಕಾಮರ್ಸ್ ಇತಿಹಾಸದಲ್ಲಿ ಒಂದೇ ಉತ್ಪನ್ನಕ್ಕೆ ಒಂದು ದಿನದಲ್ಲಿ ಮೊತ್ತ ದೃಷ್ಟಿಯಿಂದ ನಡೆದಿರುವ ಅತಿ ಹೆಚ್ಚಿನ ಮಾರಾಟ ವಹಿವಾಟಾಗಿದೆ. ನಾವು ನಿಜವಾದ ಡಿಜಿಟಲ್ ಇಂಡಿಯಾದಲ್ಲಿ ಬದುಕುತ್ತಿದ್ದೇವೆ” ಎಂದು ಭವಿಶ್ ಅಗರ್ವಾಲ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಪರ್ಚೇಸ್ ವಿಂಡೋ ತೆರೆದಾಗ ಕನಿಷ್ಠ 20,000 ರೂ.ಗಳ ಮೊತ್ತ ಪಾವತಿಸಿ, ಗ್ರಾಹಕರು ಓಲಾ ಸ್ಕೂಟರನ್ನು ಬುಕ್ ಮಾಡಲು ಅವಕಾಶ ನೀಡಲಾಯಿತು. ಆನ್ಲೈನ್ ಸೇಲ್ನ ಮೊದಲನೇ ದಿನ 600 ಕೋಟಿಗೂ ಹೆಚ್ಚು ಬೆಲೆಯ ಎಲೆಕ್ಟ್ರಿಕ್ ಸ್ಕೂಟರ್ಗಳನ್ನು ಮಾರಲಾಯಿತು. ಸದ್ಯಕ್ಕೆ ಪರ್ಚೇಸ್ ವಿಂಡೋವನ್ನು ಮುಚ್ಚಲಾಗಿದ್ದು, ಮತ್ತೆ ನವೆಂಬರ್ 1ಕ್ಕೆ ದೀಪಾವಳಿಯ ಸಮಯಕ್ಕೆ ತೆರೆಯಲಾಗುತ್ತದೆ. ಈ ಎರಡು ದಿನಗಳಲ್ಲಿ ಖರೀದಿಸಲಾಗದೇ ಇರುವವರು, ಸದ್ಯಕ್ಕೆ, ಈ ಸ್ಕೂಟರನ್ನು ಕಂಪೆನಿಯ ವೆಬ್ಸೈಟ್ olaelectric.comಗೆ ಹೋಗಿ 499 ರೂ. ಪಾವತಿಸಿ ಆನ್ಲೈನ್ ಸ್ಲಾಟ್ಅನ್ನು ಬುಕ್ ಮಾಡಬಹುದು ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)