ನವದೆಹಲಿ: ದೇಶದ 21 ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳು ಆಯ್ಕೆ ಒಂದನ್ನು ಆರಿಸಿಕೊಂಡಿದ್ದರೆ, ಆಯ್ಕೆ ಎರಡು ಇದುವರೆಗೂ ಯಾರಿಗೂ ಬೇಕಾಗಿಲ್ಲ!
ಹೌದು.. ಈಗ ಪ್ರಸ್ತಾಪಿಸುತ್ತಿರುವುದು ಜಿಎಸ್ಟಿ ಸಂಬಂಧಿತ ವಿಚಾರ. ಕೇಂದ್ರ ಸರ್ಕಾರದಿಂದ ರಾಜ್ಯಗಳಿಗೆ ನೀಡಬೇಕಾಗಿರುವ ಜಿಎಸ್ಟಿ ಪಾಲಿನ ಕೊರತೆ ನೀಗಿಸಿಕೊಳ್ಳುವ ನಿಟ್ಟಿನಲ್ಲಿ ರಾಜ್ಯಗಳ ಮುಂದೆ ಎರಡು ಆಯ್ಕೆಗಳನ್ನು ಇಡಲಾಗಿದೆ. ಕರೊನಾ ಹಾಗೂ ಲಾಕ್ಡೌನ್ ಕಾರಣದಿಂದ ಸದ್ಯ ಜಿಎಸ್ಟಿ ಪಾಲಿನ ಹಣ ಕೊಡುವ ಪರಿಸ್ಥಿತಿ ಇರದ ಕಾರಣ ಕೇಂದ್ರ ಈ ಎರಡು ಆಯ್ಕೆಗಳನ್ನು ನೀಡಿದೆ.
ಇದುವರೆಗೆ ಕರ್ನಾಟಕ, ಆಂಧ್ರಪ್ರದೇಶ, ಅರುಣಾಚಲ ಪ್ರದೇಶ, ಗೋವಾ, ಅಸ್ಸಾಂ, ಬಿಹಾರ, ಗುಜರಾತ್, ಹರಿಯಾಣ, ಹಿಮಾಚಲ ಪ್ರದೇಶ, ಒಡಿಶಾ, ಪುದುಚೆರಿ, ಸಿಕ್ಕಿಂ, ತ್ರಿಪುರ, ಜಮ್ಮು-ಕಾಶ್ಮೀರ, ಮಧ್ಯಪ್ರದೇಶ, ಮಣಿಪುರ, ಮೇಘಾಲಯ, ಮಿಜೋರಾಂ, ನಾಗಾಲ್ಯಾಂಡ್, ಉತ್ತರಾಖಂಡ ಮತ್ತು ಉತ್ತರ ಪ್ರದೇಶಗಳು ಆಯ್ಕೆ 1 ಆರಿಸಿಕೊಂಡಿವೆ ಎಂದು ಮೂಲಗಳು ತಿಳಿಸಿವೆ. ಉಳಿದ ರಾಜ್ಯಗಳು ಇನ್ನಷ್ಟೇ ಆಯ್ಕೆ ದೃಢಪಡಿಸಬೇಕಿದೆ.
ಜಿಎಸ್ಟಿ ಪಾಲಿನ ಅಂದಾಜು 97,000 ಕೋಟಿ ರೂ. ಕೊರತೆ ನೀಗಿಸಿಕೊಳ್ಳಲು ಹಣಕಾಸು ಇಲಾಖೆ ಸಂಯೋಜಿತ ವಿಶೇಷ ಗವಾಕ್ಷಿ ಮೂಲಕ ರಾಜ್ಯಗಳು ಬ್ಯಾಂಕ್ ಸಾಲ ತೆಗೆದುಕೊಳ್ಳುವುದು ಆಯ್ಕೆ 1. ಇನ್ನು ಜಿಎಸ್ಟಿ ಪರಿಹಾರದ ಪೂರ್ತಿ ಮೊತ್ತ, ಕೋವಿಡ್ ಪರಿಹಾರವೂ ಸೇರಿದ 2.35 ಲಕ್ಷ ಕೋಟಿ ರೂಪಾಯಿಯನ್ನು ರಾಜ್ಯಗಳೇ ಸಾಲ ವ್ಯವಸ್ಥೆ ಮಾಡಿಕೊಳ್ಳುವುದು ಆಯ್ಕೆ 2. (ಏಜೆನ್ಸೀಸ್)