ನವದೆಹಲಿ: ದೇಶದ ಸಾಮಾಜಿಕ ಆಗುಹೋಗುಗಳನ್ನು ಅತ್ಯಂತ ಹಾಸ್ಯಮಯವಾಗಿ ಪ್ರಸ್ತುತಪಡಿಸುವ ಖ್ಯಾತ ಕಾಮಿಡಿಯನ್, ಮಿಮಿಕ್ರಿ ಕಲಾವಿದೆ ಸಲೋನಿ ಗೌರ್, ಚೀನಾದ ಟಿಕ್ಟಾಕ್ ಆ್ಯಪ್ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ನಜಮಾ ಆಪಿ ಎಂಬ ಹೆಸರಿನಲ್ಲಿ ಟ್ವಿಟರ್, ಯೂಟ್ಯೂಬ್, ಇನ್ಸ್ಟಾಗ್ರಾಂ, ಟಿಕ್ಟಾಕ್ ಖಾತೆಗಳನ್ನು ಹೊಂದಿರುವ ಸಲೋನಿ ಗೌರ್ ಅವರು, ರಾಷ್ಟ್ರೀಯ, ಅಂತಾರಾಷ್ಟ್ರೀಯ ವಿದ್ಯಮಾನಗಳನ್ನು ಹಾಸ್ಯಮಯವಾಗಿ ವಿವರಿಸಿ, ಅದರ ವಿಡಿಯೋಗಳನ್ನು ಪೋಸ್ಟ್ ಮಾಡುತ್ತಾರೆ. ಇವರಿಗೆ ಅಪಾರ ಸಂಖ್ಯೆಯಲ್ಲಿ ಫಾಲೋವರ್ಸ್ ಇದ್ದಾರೆ.
ಆದರೆ 20 ವರ್ಷ ವಯಸ್ಸಿನ ಕಾಮಿಡಿಯನ್ ನಜಮಾ ಅವರಿಗೆ ಈಗ ಚೀನಾದ ಆ್ಯಪ್ ಟಿಕ್ಟಾಕ್ ಮೇಲೆ ಸಿಕ್ಕಾಪಟೆ ಕೋಪ ಬಂದಿದೆ. ಅದಕ್ಕೆ ಕಾರಣವನ್ನೂ ಅವರು ಹೇಳಿದ್ದಾರೆ.
ಲಡಾಖ್ನಲ್ಲಿ ಚೀನಾ ಭಾರತದೊಂದಿಗೆ ಗಡಿ ಕ್ಯಾತೆ ತೆಗೆದು, ಒಂದೇ ಸಮನೆ ಸೈನಿಕರ ಜಮಾವಣೆ ಮಾಡುತ್ತಿದೆ. ಈ ಬಗ್ಗೆ ನಜಮಾ ಒಂದು ವಿಡಿಯೋ ಮಾಡಿದ್ದರು. ಅದರಲ್ಲಿ ಚೀನಾವನ್ನು ಟೀಕಿಸಿದ್ದರು. ಚೀನಾದ ಗಡಿ ಕ್ಯಾತೆಯನ್ನು ತಮಾಷೆ ಮಾಡಿದ್ದರು.
ಚೀನಾ ಮೊದಲು ಕೊಬ್ಬಿನ ಅಂಶಗಳುಳ್ಳ ಆಹಾರವನ್ನು ಭಾರತಕ್ಕೆ ಕಳಿಸಿ ಇಲ್ಲಿನವರ ಕರುಳು, ಹೊಟ್ಟೆ ಹಾಳು ಮಾಡಿತು. ಬಳಿಕ ಅಗ್ಗದ ಫೋನ್, ಟಿಕ್ಟಾಕ್ನಂತಹ ಆ್ಯಪ್ಗಳನ್ನು ಕಳಿಸಿ ಯುವಜನರನ್ನು ಹಾಳು ಮಾಡಿತು. ಅದಾದ ಮೇಲೆ ಕರೊನಾವನ್ನು ಕಳಿಸಿ ಇಡೀ ದೇಶ ಬಂದ್ ಆಗುವಂತೆ ಮಾಡಿತು. ಈಗ ಎಲ್ಲವೂ ಮುಗಿದ ಮೇಲೆ, ನಿಧಾನವಾಗಿ ನಮ್ಮ ಭೂಮಿ ಮೇಲೆ ಕಣ್ಣು ಹಾಕಿ, ಜಗಳ ತೆಗೆದಿದೆ ಎಂದು ಜೋಕ್ ಮಾಡುತ್ತಲೇ ಚೀನಾಕ್ಕೆ ಚಾಟಿ ಬೀಸಿದ್ದರು. ಹಾಗೇ, ಚೀನಾದ ಗಡಿ ಕ್ಯಾತೆಯ ಬಗ್ಗೆ ಕೂಡ ನಮ್ಮ ಬಾಲಿವುಡ್ನಲ್ಲಿ ಸಿನಿಮಾ ನಿರ್ಮಾಣವಾಗುತ್ತದೆ ನೋಡಿ ಎಂದು ಹೇಳಿದ್ದರು. ವಿಡಿಯೋವನ್ನು ಟಿಕ್ಟಾಕ್, ಯೂಟ್ಯೂಬ್ಗಳಲ್ಲಿ ಅಪ್ಲೋಡ್ ಮಾಡಿದ್ದರು.
ಆದರೆ ಟಿಕ್ಟಾಕ್ ಈ ವಿಡಿಯೋವನ್ನು ಸಹಿಸಿಕೊಳ್ಳಲಿಲ್ಲ. ಚೀನಾ ವಿರುದ್ಧದ ಮಾತುಗಳು ಇದ್ದ ವಿಡಿಯೋವನ್ನು ಅದು ಡಿಲೀಟ್ ಮಾಡಿದೆ. ಸಲೋನಿ ಗೌರ್ ಅವರು ಟ್ವೀಟ್ ಮೂಲಕ ಇದನ್ನು ತಿಳಿಸಿದ್ದಾರೆ.
ಚೀನಾದ ಬಗ್ಗೆ ಜೋಕ್ ಮಾಡಿ, ಅಪ್ಲೋಡ್ ಮಾಡಿದ್ದ ವಿಡಿಯೋವನ್ನು ಟಿಕ್ಟಾಕ್ ಡಿಲೀಟ್ ಮಾಡಿದೆ. ‘ಯಥಾ ದೇಶ, ತಥಾ ಆ್ಯಪ್’ ಎಂದು ಮತ್ತೆ ಕಾಮಿಡಿ ಜೋಕ್ ಮಾಡಿದ್ದಾರೆ. ಟಿಕ್ಟಾಕ್ನಲ್ಲಿ ನಮಗೆ ಮಾತನಾಡುವ ಸ್ವಾತಂತ್ರ್ಯವೇ ಇಲ್ಲ ಎಂದಿದ್ದಾರೆ. (ಏಜೆನ್ಸೀಸ್)