VIDEO| ನೀರಿನ ಬಾಟಲ್​ ನುಂಗಿ ಪರದಾಡಿದ ನಾಗರಹಾವು: ಮುಂದೇನಾಯ್ತು? ನೋಡಲೇ ಬೇಕಾದ ವಿಡಿಯೋ ಇದು...

ನವದೆಹಲಿ: ಏಕಬಳಕೆಯ ಪ್ಲಾಸ್ಟಿಕ್ ತ್ಯಾಜ ಜೀವ ಸಂಕುಲಕ್ಕೆ ಹೇಗೆ ಮಾರಕವಾಗಿದೆ ಎಂಬುದಕ್ಕೆ ಇದಕ್ಕಿಂತಲೂ ಒಳ್ಳೆಯ ಉದಾಹರಣೆ ಮತ್ತೊಂದಿಲ್ಲ ಎಂದೆನಿಸುತ್ತದೆ. ಹಸಿದ ಹಾವೊಂದು ತನ್ನ ಬೇಟೆ ಸಿಕ್ಕಿತೆಂದು ಅರಿಯದೇ ನೀರಿನ ಬಾಟಲ್​ ಅನ್ನು ನುಂಗಿ ಬಳಿಕ ಜೀವ ಉಳಿಸಿಕೊಳ್ಳಲು ಪರದಾಡಿದ ವಿಡಿಯೋವೊಂದು ವೈರಲ್​ ಆಗಿದ್ದು, ವಿಡಿಯೋ ನೋಡಿದರೆ ನಮ್ಮನ್ನು ನಾವೇ ಪ್ರಶ್ನಿಸಿಕೊಳ್ಳುವಂತಿದೆ.

ಗ್ರಾಮವೊಂದರ ಬೀದಿಯಲ್ಲಿ ನೀರಿನ ಬಾಟಲ್​ ನುಂಗಿ ಒದ್ದಾಡುತ್ತಿರುವ ನಾಗರಹಾವಿನ ದೃಶ್ಯವನ್ನು ವೈರಲ್​ ಆಗಿರುವ ವಿಡಿಯೋದಲ್ಲಿ ಕಾಣಬಹುದು. ನಡು ಹೊಟ್ಟೆಯ ಭಾಗದಲ್ಲಿ ಸಿಕ್ಕಿಕೊಂಡಿರುವ ಬಾಟಲ್​ ಅನ್ನು ಹೊರಗೆತರಲು ಪರದಾಟ ನಡೆಸಿದ ನಾಗರಹಾವು ಕೊನೆಗೂ ತನ್ನ ಪ್ರಯತ್ನದಲ್ಲಿ ಯಶಸ್ವಿಯಾಗುತ್ತದೆ. ಆದರೆ ಅದು ಅನುಭವಿಸಿದ ಯಾತನೆಯನ್ನು ಪ್ರತಿಯೊಬ್ಬರು ಅರ್ಥಮಾಡಿಕೊಳ್ಳಲೇ ಬೇಕಿದೆ.

ಈ ವಿಡಿಯೋವನ್ನು ಅರಣ್ಯಾಧಿಕಾರಿ ಪರ್ವೀನ್​ ಕಾಸ್ವಾನ್​ ಎಂಬುವರು ಶುಕ್ರವಾರ ತಮ್ಮ ಟ್ವಿಟರ್​ನಲ್ಲಿ ಅಪ್​ಲೋಡ್​ ಮಾಡಿಕೊಂಡಿದ್ದು, ಏಕಬಳಕೆಯ ಪ್ಲಾಸ್ಟಿಕ್​ ವನ್ಯಜೀವಿ ಮತ್ತು ಇತರೆ ಪ್ರಭೇದಗಳಿಗೆ ಯಾವ ರೀತಿ ತೊಂದರೆ ಉಂಟುಮಾಡುತ್ತಿದೆ ಎಂಬುದನ್ನು ನೋಡಿ. ಬಹುಶಃ ಈ ವಿಡಿಯೋ ನಿಮ್ಮ ಮನಸ್ಸನ್ನು ಕದಡಬಹುದು ಎಂದು ಕಾಸ್ವಾನ್​ ಬರೆದುಕೊಂಡಿದ್ದಾರೆ.

ಶುಕ್ರವಾರ ಬೆಳಗ್ಗೆ ವಿಡಿಯೋ ಅಪ್​ಲೋಡ್​ ಮಾಡಲಾಗಿದ್ದು ಈವರೆಗೂ ವಿಡಿಯೋವನ್ನು 40 ಸಾವಿರಕ್ಕೂ ಅಧಿಕ ಮಂದಿ ವೀಕ್ಷಣೆ ಮಾಡಿದ್ದಾರೆ. 2 ಸಾವಿರಕ್ಕೂ ಹೆಚ್ಚು ಮಂದಿ ಲೈಕ್ಸ್​ ಮಾಡಿದ್ದು, ಸಾವಿರಕ್ಕೂ ಹೆಚ್ಚು ಮಂದಿ ರೀಟ್ವೀಟ್​ ಮಾಡಿದ್ದಾರೆ. ವಿಡಿಯೋ ನೋಡಿದ ಸಾಕಷ್ಟು ಮಂದಿ ಕಳವಳ ವ್ಯಕ್ತಪಡಿಸಿದ್ದು, ಮಾನವನ ಕೃತ್ಯವನ್ನು ಖಂಡಿಸುತ್ತಿದ್ದಾರೆ.

ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ಪ್ರಕಾರ ಭಾರತದಲ್ಲಿ ದಿನವೊಂದಕ್ಕೆ 25 ಸಾವಿರ ಟನ್​​ಗಿಂತ ಹೆಚ್ಚು​ ಪ್ಲಾಸ್ಟಿಕ್​ ತ್ಯಾಜ್ಯವನ್ನು ಉತ್ಪತಿಯಾಗುತ್ತಿದೆ. ಅದರಲ್ಲಿ ಶೇ 40 ಸಂಗ್ರಹವಾಗದೇ ಪರಿಸರದಲ್ಲಿ ಸೇರಿಕೊಳ್ಳುತ್ತಿದೆ. (ಏಜೆನ್ಸೀಸ್​)