Stunt with six bikes: ಆರು ಬೈಕ್‌ಗಳಿಗೆ ಹಗ್ಗ ಕಟ್ಟಿ ವ್ಯಕ್ತಿಯ ಮೇಲೆ ನಡೆಸಿದ ಅಪಾಯಕಾರಿ ಸ್ಟಂಟ್‌ನ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಬೈಕ್‌ಗಳು ವೇಗವಾಗಿ ಚಲಿಸುತ್ತಿದ್ದಂತೆ ಹಗ್ಗ ಬಿಗಿದುಕೊಂಡು ವ್ಯಕ್ತಿ ಉಸಿರಾಡಲು ಪರದಾಡಿದ್ದಾನೆ. ಬಳಿಕ ಸಮತೋಲನ ತಪ್ಪಿ ನೆಲಕ್ಕೆ ಬಿದ್ದಿದ್ದು, ಆತನನ್ನು ರಕ್ಷಿಸಲು ಸುತ್ತಮುತ್ತಲಿದ್ದವರು ಧಾವಿಸಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಈ ವಿಡಿಯೋದಲ್ಲಿ, ವ್ಯಕ್ತಿಯ ಕುತ್ತಿಗೆ ಮತ್ತು ದೇಹದ ಮೇಲ್ಭಾಗಕ್ಕೆ ಹಗ್ಗ ಕಟ್ಟಿ, ಅದನ್ನು ಸುಮಾರು ಆರು ಬೈಕ್‌ಗಳಿಗೆ ಜೋಡಿಸಿರುವುದು ಕಾಣಿಸುತ್ತದೆ. ಸುತ್ತಲೂ ಜನರು ಸೇರಿರುವಾಗಲೇ, ಬೈಕ್ ಸವಾರರು ಬೇರೆ ಬೇರೆ ದಿಕ್ಕುಗಳಲ್ಲಿ ಹಗ್ಗ ಎಳೆಯಲು ಸಿದ್ಧರಾಗುತ್ತಾರೆ
ಉಸಿರಾಡಲಾಗದೆ ನೆಲಕ್ಕೆ ಬಿದ್ದ ವ್ಯಕ್ತಿ
ಬೈಕ್‌ಗಳು ವೇಗವಾಗಿ ಚಲಿಸುತ್ತಿದ್ದಂತೆ ವ್ಯಕ್ತಿ ಮುಂದಕ್ಕೆ ಎಳೆಯಲ್ಪಡುತ್ತಾನೆ. ನಿಂತುಕೊಳ್ಳಲು ಸಾಧ್ಯವಾಗದೆ ಆತ ಪರದಾಡುತ್ತಾನೆ. ಹಗ್ಗ ಬಿಗಿಯಾಗುತ್ತಿದ್ದಂತೆ ಆತನಿಗೆ ಉಸಿರಾಡಲು ಕಷ್ಟವಾಗುತ್ತಿರುವಂತೆ ಕಾಣಿಸುತ್ತದೆ. ಕೆಲವೇ ಕ್ಷಣಗಳಲ್ಲಿ ಆತ ನೆಲಕ್ಕೆ ಬೀಳುತ್ತಾನೆ. ಈ ವೇಳೆ ಧೂಳು ಏಳುತ್ತಿದ್ದು, ವ್ಯಕ್ತಿಯನ್ನು ಸ್ವಲ್ಪ ದೂರ ಎಳೆದೊಯ್ಯುವುದೂ ವಿಡಿಯೋದಲ್ಲಿ ಕಾಣಿಸುತ್ತದೆ.
ವ್ಯಕ್ತಿಯ ರಕ್ಷಣೆಗೆ ಬಂದ ಜನ
ವ್ಯಕ್ತಿ ನೆಲಕ್ಕೆ ಬೀಳುತ್ತಿದ್ದಂತೆ ಸುತ್ತಮುತ್ತಲಿದ್ದವರು ಆತನ ಸಹಾಯಕ್ಕೆ ಧಾವಿಸುತ್ತಾರೆ. ಕೆಲವರು ಹಗ್ಗ ಬಿಡಿಸಲು, ಇನ್ನು ಕೆಲವರು ಬೈಕ್ ನಿಲ್ಲಿಸಲು ಪ್ರಯತ್ನಿಸುತ್ತಾರೆ. ಆದರೂ ಕೆಲವು ಸವಾರರು ಬೈಕ್‌ಗೆ ವೇಗ ನೀಡುತ್ತಿರುವುದು ವಿಡಿಯೋದಲ್ಲಿ ಕಾಣಿಸಿದ್ದು, ಇದಕ್ಕೆ ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
