Delhi Dussehra 2026: ದಸರಾ ವೇಳೆ ರಾವಣ, ಕುಂಭಕರ್ಣ ಮತ್ತು ಮೇಘನಾದನ ಪ್ರತಿಕೃತಿಗಳನ್ನು ದಹಿಸುವುದು ವಾಡಿಕೆ. ಆದರೆ, ಈ ಬಾರಿ ದೆಹಲಿಯಲ್ಲಿ ರಾವಣನ ಜತೆ 30 ಅಡಿ ಎತ್ತರದ ಜಿರಳೆಯ ಪ್ರತಿಕೃತಿಯನ್ನೂ ದಹಿಸಲು ಶ್ರೀ ಕೇಶವ ರಾಮಲೀಲಾ ಸಮಿತಿ ನಿರ್ಧರಿಸಿದೆ. ಮನೆ, ಸುತ್ತಮುತ್ತಲಿನ ಪರಿಸರ ಹಾಗೂ ಸಮಾಜದಲ್ಲಿ ಸ್ವಚ್ಛತೆ ಕಾಪಾಡುವ ಸಂದೇಶ ಸಾರುವುದು ಈ ಕ್ರಮದ ಉದ್ದೇಶ ಎಂದು ಹೇಳಲಾಗಿದೆ.
ಶ್ರೀ ಕೇಶವ ರಾಮಲೀಲಾ ಸಮಿತಿಯ ಅಧ್ಯಕ್ಷ ಹಾಗೂ ಮಾಡೆಲ್ ಟೌನ್ ಶಾಸಕ ಅಶೋಕ್ ಗೋಯಲ್ ದೇವರಾಹ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಜಿರಳೆಯು ಕೊಳಕು ಮತ್ತು ಅನೈರ್ಮಲ್ಯದ ಸಂಕೇತವಾಗಿದ್ದು, ಮನೆ, ಪರಿಸರ ಹಾಗೂ ಸಮಾಜದಲ್ಲಿ ಸ್ವಚ್ಛತೆಯ ಮಹತ್ವ ಸಾರಲು ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.
ರಾವಣನ ಜತೆ 30 ಅಡಿ ಜಿರಳೆ ದಹನ
ವಿಜಯದಶಮಿ ಸತ್ಯದ ಗೆಲುವು ಮತ್ತು ಕೆಡುಕಿನ ವಿರುದ್ಧ ಒಳಿತಿನ ವಿಜಯದ ಸಂಕೇತವಾಗಿದೆ. ಈ ಬಾರಿ ದೆಹಲಿಯ ಪೀತಂಪುರದ ಎನ್‌ಎಸ್‌ಪಿ ಪ್ರದೇಶದಲ್ಲಿರುವ ಶ್ರೀ ಕೇಶವ ರಾಮಲೀಲಾ ಸಮಿತಿಯ ಮೈದಾನದಲ್ಲಿ ರಾವಣನ ಜತೆ 30 ಅಡಿ ಎತ್ತರದ ಜಿರಳೆ ಪ್ರತಿಕೃತಿಯನ್ನೂ ದಹಿಸಲಾಗುತ್ತದೆ. ಮನೆ ಮತ್ತು ಸಮಾಜದಲ್ಲಿನ ಕೊಳಕು, ಅನೈರ್ಮಲ್ಯವನ್ನು ತೊಡೆದುಹಾಕುವ ಬಗ್ಗೆ ಜಾಗೃತಿ ಮೂಡಿಸುವುದು ಸಮಿತಿಯ ಉದ್ದೇಶವಾಗಿದೆ.
