ಮೈಸೂರು: ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಪ್ರಮುಖ ಸಂಪ್ರದಾಯಗಳಲ್ಲಿ ಒಂದಾದ ವಜ್ರಮುಷ್ಟಿ ಕಾಳಗಕ್ಕೆ ಈ ಬಾರಿ ದೊಡ್ಡ ಅಡಚಣೆ ಉಂಟಾಗಿದ್ದು, ಜಟ್ಟಿ ಕಾಳಗ ನಡೆಯದೆಯೇ ರಾಜವಂಶಸ್ಥ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ವಿಜಯಯಾತ್ರೆ ಹೊರಟ ಘಟನೆ ನಾಡಹಬ್ಬದ ಇತಿಹಾಸದಲ್ಲೇ ಹಿಂದೆಂದೂ ನಡೆದಿಲ್ಲ.
ವಜ್ರಮುಷ್ಟಿ ಕಾಳಗದ ಬಳಿಕ ನಡೆಯಬೇಕಿದ್ದ ವಿಜಯಯಾತ್ರೆಗೆ ಮುನ್ನವೇ ಈ ಬೆಳವಣಿಗೆ ನಡೆದಿದ್ದು, ರಾಜ್ಯ ಸರ್ಕಾರ ಮತ್ತು ಅರಮನೆ ನಡುವೆ ಸಮನ್ವಯದ ಕೊರತೆ ಎದ್ದು ಕಾಣುವಂತಾಗಿದೆ. ಅರಮನೆ ಸಂಪ್ರದಾಯದಂತೆ ನಿಗದಿತ ಮುಹೂರ್ತದೊಳಗೆ ಕಾಳಗಕ್ಕೆ ಸಿದ್ಧತೆ ನಡೆಸಬೇಕಿದ್ದ ಜಟ್ಟಿ ಪೈಲ್ವಾನರಿಗೆ ಪೊಲೀಸರು ಅಡ್ಡಿಪಡಿಸಿದರೆಂಬ ಆರೋಪವು ಕೇಳಿಬಂದಿದೆ.
ಶ್ವೇತ ವರಾಹಸ್ವಾಮಿ ದೇವಾಲಯದಲ್ಲಿ ವಜ್ರಮುಷ್ಟಿ ಕಾಳಗಕ್ಕೆ ಸಿದ್ಧರಾಗಿ ಜಟ್ಟಿ ಪೈಲ್ವಾನರು ಕಾಯುತ್ತಿದ್ದರೆ, ಇತ್ತ ಅರಮನೆಯೊಳಗೆ ಪ್ರವೇಶಿಸಲು ಪೊಲೀಸರು ತಡೆ ಒಡ್ಡಿದರೆಂದು ತಿಳಿದುಬಂದಿದೆ. ರಾಜವಂಶಸ್ಥರು ನೀಡಿದ್ದ ಪ್ರವೇಶ ಪಾಸ್‌ಗಳಿದ್ದರೂ ಜಟ್ಟಿ ಪೈಲ್ವಾನರು ಹಾಗೂ ಅವರ ಉಸ್ತಾದ್‌ಗಳಿಗೆ ಅರಮನೆಯೊಳಗೆ ಪ್ರವೇಶಿಸಲು ಅವಕಾಶ ನೀಡಲಿಲ್ಲ ಎಂಬ ಅಸಮಾಧಾನ ವ್ಯಕ್ತವಾಗಿದೆ.
