6 ದಿನವಾದರೂ ಬಗೆಹರಿಯದ ಇಂಡಿಗೋಳಾಟ-Flight

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ (ಕೆಐಎ) ದೆಹಲಿ, ಜಬಲ್ಪುರ, ದುರ್ಗಾಪುರ, ಹೈದರಾಬಾದ್, ರಾಯ್ಪುರ, ಕೊಚ್ಚಿ, ಭೂಪಾಲ್, ಗೋವಾ, ದೆಹಲಿ, ಭುವನೇಶ್ವರ, ಶ್ರೀನಗರ ಮತ್ತು  ಗಾಜಿಯಾಬಾದ್ ಸೇರಿ ದೇಶದ ವಿವಿಧ ವಿಮಾನ ನಿಲ್ದಾಣಗಳಿಗೆ ತೆರಳಬೇಕಿದ್ದ 70ಕ್ಕೂ ಅಧಿಕ ಇಂಡಿಗೋ ವಿಮಾನಗಳು ಭಾನುವಾರ ರದ್ದಾದವು.

ಬೆಂಗಳೂರಿನಿಂದ ಕೊಚ್ಚಿಗೆ ಕನೆಕ್ಟಿಂಗ್ ಫ್ಲೈಟ್ ರದ್ದು ಹಿನ್ನೆಲೆಯಲ್ಲಿ ಜರ್ಮನಿ ಪ್ರವಾಸಿಗ ಆಕ್ರೋಶ ವ್ಯಕ್ತಪಡಿಸಿದರು. ಬೇರೆ ಫ್ಲೈಟ್  ಇಲ್ಲದ ಕಾರಣ ಅನಿವಾರ್ಯವಾಗಿ ವಿಮಾನ ನಿಲ್ದಾಣದಲ್ಲೇ ಸಿಲುಕಿದ್ದಾರೆ. 2 ದಿನದಿಂದ ಒಂದೇ ಉಡುಪುನಲ್ಲಿ ಇದ್ದೇನೆ. ಲಗೇಜ್‌ನಲ್ಲಿ ಉಡುಪುಗಳಿವೆ. ಹಲವು ಗಂಟೆಯಿಂದ ಲಗೇಜ್‌ಗಾಗಿ ಕಾಯುತ್ತಿದ್ದೇನೆ. ಇನ್ನೂ ಸಿಕ್ಕಿಲ್ಲ ಎಂದು ಆಸ್ಟ್ರಿಯಾ ಪ್ರಜೆ, ಇಂಡಿಗೋ ಸಿಬ್ಬಂದಿ ಬಳಿ ಅಸಮಾಧಾನ ವ್ಯಕ್ತಪಡಿಸಿದರು. ಕೆಲ ಪ್ರಯಾಣಿಕರು, ಸತತ 8 ಗಂಟೆಯಿಂದ ಲಗೇಜ್‌ಗಾಗಿ  ಕಾಯುವಂತಾಯಿತು. ಸೂಕ್ತ ಮಾಹಿತಿ ನೀಡದ ಪರಿಣಾಮ ಹಲವು ಪ್ರಯಾಣಿಕರು ಒಂದು ಕೌಂಟರ್‌ನಿಂದ ಇನ್ನೊಂದು ಕೌಂಟರ್‌ಗೆ ಅಲೆದಾಡಿದರು. ವಿಮಾನ ನಿಲ್ದಾಣದಲ್ಲಿ ತೆರಳಿದ್ದ ಕೆಲವರು, ಅಲ್ಲಿನ ಪರಿಸ್ಥಿತಿ ಕಂಡು ಆನ್‌ಲೈನ್‌ನಲ್ಲೇ ಫ್ಲೈಟ್ ರದ್ದುಗೊಳಿಸಿದರು. 

6 ದಿನ ಕಳೆದರೂ ಇಂಡಿಗೋ ವಿಮಾನ ಹಾರಾಟ ಸ್ಥಗಿತ ಸಮಸ್ಯೆ ಬಗೆಹರಿಯದ ಕಾರಣ ಕನ್ನಡಪರ ಹೋರಾಟಗಾರರ ವಾಟಳ್ ನಾಗರಾಜ್, ಸಾದಹಳ್ಳಿ ಟೋಲ್ ಬಳಿ ಪ್ರತಿಭಟನೆ ನಡೆಸಿ ಆಕ್ರೋಶ ವ್ಯಕ್ತಪಡಿಸಿದರು. ಇಂಡಿಗೋ ವಿಮಾನದ ಮುಖ್ಯಸ್ಥರನ್ನು ಬಂಧಿಸಬೇಕು. ಈ ಸಮಸ್ಯೆಯು ತುರ್ತು ಪರಿಸ್ಥಿತಿಗಿಂತ ಭೀಕರವಾಗಿದೆ. ಸಾವಿರಾರು ವಿಮಾನ ಹಾರಾಟ ಸ್ಥಗಿತಗೊಳಿಸಲಾಗಿದೆ. ಇದರಿಂದಾಗಿ ಲಕ್ಷಾಂತರ ಪ್ರಯಾಣಿಕರಿಗೆ ತೊಂದರೆಯಾಗಿದೆ. ಈ ಬಗ್ಗೆ ಕೇಂದ್ರ ಸರ್ಕಾರ ಸ್ಪಂದಿಸುತ್ತಿಲ್ಲ. ಸಿಎಂ ಸಿದ್ದರಾಮಯ್ಯ ವಿಮಾನ ನಿಲ್ದಾಣಕ್ಕೆ ಭೇಟಿ ನೀಡಿ ಪರಿಸ್ಥಿತಿಯ ಬಗ್ಗೆ ಅವಲೋಕಿಸಬೇಕಿತ್ತು. ಪ್ರಯಾಣಿಕರ ಕಷ್ಟವನ್ನು ಬಗೆಹರಿಸಲು ಅಧಿಕಾರಿಗಳನ್ನು ನೇಮಿಸಬೇಕಿತ್ತು ಎಂದು ವಾಟಾಳ್ ನಾಗರಾಜ್ ಹೇಳಿದರು. 

ಡಿಸೆಂಬರ್ ತಿಂಗಳು ಪ್ರವಾಸದ ಸಮಯವಾಗಿದೆ. ದೇಶಾದ್ಯಂತ ಇಂಡಿಗೋ ವಿಮಾನ ಹಾರಾಟದಲ್ಲಿ ವ್ಯತ್ಯಯವಾಗಿದೆ. 3-4 ತಿಂಗಳ ಹಿಂದೆ ಮುಂಗಡವಾಗಿ ಟಿಕೆಟ್ ಬುಕಿಂಗ್ ಮಾಡಿದವರಿಗೆ ಸಾಕಷ್ಟು  ತೊಂದರೆಯಾಗಿದೆ. ಈ ಬಗ್ಗೆ  ಜನರಿಗೆ ಉತ್ತರ ನೀಡಲು ಆಗುತ್ತಿಲ್ಲ. ಈ ಸಮಸ್ಯೆ ಬೇಗ ಬಗೆಹರಿಯುವಂತಾಗಲಿ.