ಖಾಸಗಿ ಇವಿ ಚಾರ್ಜಿಂಗ್ ಕೇಂದ್ರಕ್ಕೆ ಉತ್ತೇಜನ

ಪಿಎಂ ಇ-ಡ್ರೈವ್ ಯೋಜನೆಗೆ ರಾಜ್ಯ ನೋಡಲ್ ಸಂಸ್ಥೆಯಾಗಿ ಕಾರ್ಯನಿರ್ವಹಿಸುತ್ತಿರುವ ಬೆಸ್ಕಾಂ, ರಾಜ್ಯ ವ್ಯಾಪಿ ಸಾರ್ವಜನಿಕ ಇವಿ ಚಾರ್ಜಿಂಗ್ ಕೇಂದ್ರಗಳ ಅನುಮೋದನೆ, ಮೇಲ್ವಿಚಾರಣೆ ಮತ್ತು ಸಹಾಯಧನ(ಸಬ್ಸಿಡಿ) ಪ್ರಕ್ರಿಯೆಯನ್ನು ಸುಗಮಗೊಳಿಸಲು ಸಮಗ್ರ ಡಿಜಿಟಲ್ ಪೋರ್ಟಲ್ ಹಾಗೂ ಅನುಷ್ಠಾನ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದೆ.

ಕೇಂದ್ರ ಭಾರೀ ಕೈಗಾರಿಕೆಗಳ ಸಚಿವಾಲಯ 10,900 ಕೋಟಿ ರೂ. ವೆಚ್ಚದಲ್ಲಿ ಕೈಗೊಂಡಿರುವ ಪಿಎಂ ಇ-ಡ್ರೈವ್ ಯೋಜನೆಯಲ್ಲಿ ಮಾರ್ಚ್‌ವರೆಗೆ ದೇಶಾದ್ಯಂತ ಸಾರ್ವಜನಿಕ ಇವಿ ಚಾರ್ಜಿಂಗ್ ಕೇಂದ್ರಗಳ ಸ್ಥಾಪನೆಗಾಗಿ 2 ಸಾವಿರ ಕೋಟಿ ರೂ. ಮೀಸಲಿರಿಸಿದೆ. ಇದರಡಿ ಸರ್ಕಾರಿ ಸ್ವಾಮ್ಯದ ಸ್ಥಳಗಳಲ್ಲಿ ಚಾರ್ಜಿಂಗ್ ಕೇಂದ್ರಗಳನ್ನು ಬೆಸ್ಕಾಂ ಸ್ಥಾಪಿಸಲಿದೆ.

ವರ್ಗ-ಸಿ ಅಡಿಯಲ್ಲಿ ಖಾಸಗಿ ಚಾರ್ಜ್ ಪಾಯಿಂಟ್ ಆಪರೇಟರ್‌ಗಳಿಗೆ ಮೂಲಸೌಕರ್ಯ ಒದಗಿಸಲಿದೆ. ಯೋಜನೆಯ ಅನುಷ್ಠಾನವನ್ನು ಸುಗಮಗೊಳಿಸುವ ಉದ್ದೇಶದಿಂದ ಬೆಸ್ಕಾಂ ಎರಡು ಹಂತದಲ್ಲಿ ಕ್ರಮ ವಹಿಸಿದೆ. ಮೊದಲ ಹಂತದಲ್ಲಿ ಚಾರ್ಜ್ ಪಾಯಿಂಟ್ ಆಪರೇಟರ್‌ಗಳ ತಾಂತ್ರಿಕ ಸಾಮರ್ಥ್ಯ ಹಾಗೂ ಕಾರ್ಯಾನುಭವವನ್ನು ಪರಿಶೀಲಿಸಲಾಗುತ್ತದೆ. 2ನೇ ಹಂತದಲ್ಲಿ ಅರ್ಹತೆ ಪಡೆದ ಆಪರೇಟರ್‌ಗಳು ಬೆಸ್ಕಾಂನ ವಿಶೇಷ ಆನ್‌ಲೈನ್ ಪೋರ್ಟಲ್ ಮೂಲಕ ಪ್ರಸ್ತಾವನೆಗಳನ್ನು ಸಲ್ಲಿಸಬಹುದು. ಪೋರ್ಟಲ್‌ನಲ್ಲಿ ಆನ್‌ಲೈನ್ ಅರ್ಜಿ ಸಲ್ಲಿಕೆ, ನೋಂದಾಯಿತ ದಾಖಲೆಗಳ ಪರಿಶೀಲನೆ, ಡ್ಯಾಶ್‌ಬೋರ್ಡ್‌ನಲ್ಲಿ ಅರ್ಜಿಗಳ ಸ್ಥಿತಿಯ ಮೇಲ್ವಿಚಾರಣೆ ಹಾಗೂ ಬಹು ಸಂಖ್ಯೆಯ ಚಾರ್ಜಿಂಗ್ ಕೇಂದ್ರಗಳ ಪ್ರಸ್ತಾವನೆಗಳನ್ನು ಒಂದೇ ವೇಳೆ ಅಪ್‌ಲೋಡ್ ಮಾಡುವ ಸೌಲಭ್ಯಗಳಿವೆ. ಪಾರದರ್ಶಕತೆ, ತ್ವರಿತ ಅನುಮೋದನೆ ಹಾಗೂ ಪರಿಣಾಮಕಾರಿ ಸಹಾಯಧನ ನಿರ್ವಹಣೆಯನ್ನು ಈ ಪೋರ್ಟಲ್ ಖಚಿತಪಡಿಸಲಿದೆ ಎಂದು ಬೆಸ್ಕಾಂ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಈ ಯೋಜನೆಯಡಿ ವರ್ಗ-ಸಿಗೆ ಸೇರಿದ ಅರ್ಹ ಯೋಜನೆಗಳಿಗೆ ಮೇಲ್ದರ್ಜೆಯ ವಿದ್ಯುತ್ ಮೂಲಸೌಕರ್ಯ ನಿರ್ಮಾಣಕ್ಕಾಗಿ ಶೇ.80 ಸಹಾಯಧನ ನೀಡಲಾಗುತ್ತದೆ. ಬೇಡಿಕೆ ಪತ್ರದ ಪಾವತಿ ಹಾಗೂ ಚಾರ್ಜಿಂಗ್ ಕೇಂದ್ರಗಳ ಯಶಸ್ವಿ ಕಾರ್ಯಾರಂಭದ ನಂತರ 2 ಕಂತುಗಳಲ್ಲಿ ಆರ್ಥಿಕ ನೆರವು ಬಿಡುಗಡೆ ಮಾಡಲಾಗುತ್ತದೆ. ನಗರ ಪ್ರದೇಶಗಳು ಮತ್ತು ಹೆದ್ದಾರಿ ಪ್ರದೇಶಗಳಿಗೆ ಪ್ರತ್ಯೇಕವಾಗಿ ಚಾರ್ಜಿಂಗ್ ಕೇಂದ್ರಗಳ ಮಾನದಂಡಗಳನ್ನು ಬೆಸ್ಕಾಂ ರೂಪಿಸಿರುವುದರಿಂದ ಅನುಷ್ಠಾನ ಮತ್ತು ಸಹಾಯಧನ ಮೌಲ್ಯಮಾಪನ ಸುಲಭವಾಗಲಿದೆ. ಅರ್ಹ ಅರ್ಜಿಗಳನ್ನು ಬೆಸ್ಕಾಂ ಕೇಂದ್ರ ಭಾರೀ ಕೈಗಾರಿಕೆಗಳ ಸಚಿವಾಲಯಕ್ಕೆ ಅನುಮೋದನೆಗಾಗಿ ಸಲ್ಲಿಸಲಿದೆ. ಯೋಜನೆ ಮಾರ್ಗಸೂಚಿಗಳನ್ನು ಪೂರೈಸುವ ಷರತ್ತಿನಡಿ ಮೊದಲು ಸಲ್ಲಿಸಿದ ಅರ್ಜಿಗೆ ಮೊದಲ ಆದ್ಯತೆ ಆಧಾರದ ಮೇಲೆ ವರ್ಗ-ಸಿ ಚಾರ್ಜಿಂಗ್ ಕೇಂದ್ರಗಳ ಪ್ರಸ್ತಾವನೆಗಳನ್ನು ಪರಿಗಣಿಸಲಾಗುತ್ತದೆ ಎಂದು ಅಧಿಕಾರಿ ತಿಳಿಸಿದ್ದಾರೆ.

ಪಿಎಂ ಇ-ಡ್ರೈವ್ ಯೋಜನೆಯಡಿ, ಬೆಸ್ಕಾಂ ಸರ್ಕಾರಿ ಕಚೇರಿಗಳು, ಸರ್ಕಾರಿ ಆಸ್ಪತ್ರೆಗಳು, ಸರ್ಕಾರಿ ಶಿಕ್ಷಣ ಸಂಸ್ಥೆಗಳು, ರೈಲು ನಿಲ್ದಾಣಗಳು, ವಿಮಾನ ನಿಲ್ದಾಣಗಳು, ಮೆಟ್ರೋ ನಿಲ್ದಾಣಗಳು, ಬಸ್ ನಿಲ್ದಾಣ ಹಾಗೂ ಇತರ ಸರ್ಕಾರಿ ಸ್ವಾಮ್ಯದ ಸಾರ್ವಜನಿಕ ಸ್ಥಳಗಳಲ್ಲಿ ವರ್ಗ-ಎ ಮತ್ತು ವರ್ಗ-ಬಿ ಎಂದು ವರ್ಗಾಯಿಸಲಾಗಿದೆ. ಚಾರ್ಜಿಂಗ್ ಜಾಲವನ್ನು ಇನ್ನಷ್ಟು ವಿಸ್ತರಿಸಲು ವರ್ಗ-ಸಿ ಅಡಿಯಲ್ಲಿ ಖಾಸಗಿ ಚಾರ್ಜ್ ಪಾಯಿಂಟ್ ಸ್ಥಾಪಿಸಲು ಆಪರೇಟರ್‌ಗಳಿಂದ ಅರ್ಜಿಗಳನ್ನು ಆಹ್ವಾನಿಸಿದೆ.

ವರ್ಗ-ಎದ ಸ್ಥಳಗಳಲ್ಲಿ ಚಾರ್ಜಿಂಗ್ ಪಾಟಿಂಗ್ ಸ್ಥಾಪನೆಗೆ ವಿದ್ಯುತ್ ಮೂಲಸೌಕರ್ಯಕ್ಕೆ ಮತ್ತು ಇವಿ ಚಾರ್ಜರ್‌ಗಳಿಗೆ ಶೇ.100 ಸಹಾಯ ಧನ ಸಿಗಲಿದೆ. ಸ್ಥಳ ಸಾರ್ವಜನಿಕ ಬಳಕೆಗೆ ಮುಕ್ತವಾಗಿರಬೇಕು.

ಅದೇ ರೀತಿಯಾಗಿ ವರ್ಗ-ಬಿ ಅರ್ಹ ಸ್ಥಳಗಳಲ್ಲಿ ಸ್ಥಾಪನೆಗೆ ಮೇಲ್ದರ್ಜೆ ವಿದ್ಯುತ್ ಮೂಲಸೌಕರ್ಯಕ್ಕೆ ಶೇ.80 ಮತ್ತು ಇವಿ ಚಾರ್ಜರ್‌ಗಳಿಗೆ ಶೇ.70 ಸಬ್ಸಿಡಿ ಸಿಗಲಿದೆ. ಇನ್ನೂ ವರ್ಗ-ಸಿ ಸ್ಥಳಗಳಿಗೆ ಶೇ.80 ಸಬ್ಸಿಡಿ ೋಷಣೆ ಮಾಡಲಾಗಿದೆ.