ಬೆಂಗಳೂರು: (Rain gauge stations) ಮಳೆಯ ನೈಜ ಪ್ರಮಾಣ ಮಾಹಿತಿ ಒದಗಿಸಿ ಬೆಳೆವಿಮೆ, ಬೆಳೆ ಹಾನಿ ನಷ್ಟ ಪರಿಹಾರ ವಿತರಣೆ, ಪ್ರವಾಹ ಮತ್ತು ಬರ ಪರಿಸ್ಥಿತಿ ನಿಭಾಯಿಸಲೆಂದೇ ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರ (ಕೆಎಸ್‌ಎನ್‌ಡಿಎಂಸಿ) ರಾಜ್ಯಾದ್ಯಂತ ಸ್ಥಾಪಿಸಿರುವ ಸಾವಿರಾರು ಟೆಲಿಮೆಟ್ರಿಕ್ ಮಳೆ ಮಾಪನ ಕೇಂದ್ರಗಳಲ್ಲಿನ ಯಂತ್ರಗಳು ಸೂಕ್ತ ನಿರ್ವಹಣೆವಿಲ್ಲದೆ ಕೆಟ್ಟುನಿಂತಿವೆ.
ರಾಜ್ಯದ ಪ್ರತಿ ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ಒಟ್ಟು 6,605 ಟೆಲಿಮೆಟ್ರಿಕ್ ಮಳೆ ಮಾಪನ ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ. ಇದರಲ್ಲಿ 1,959 ಟೆಲಿಮೆಟ್ರಿಕ್ ಮಳೆ ಮಾಪನ ಕೇಂದ್ರಗಳ ವಾರ್ಷಿಕ ನಿರ್ವಹಣೆ ಅವಧಿಯು 2022ರ ಮಾರ್ಚ್‌ಗೆ ಮುಕ್ತಾಯವಾಗಿದೆ. ಮಳೆ ಮಾಪನ ಕೇಂದ್ರಗಳ ನಿರ್ವಹಣೆಗಾಗಿ 2025ರ ಅಕ್ಟೋಬರ್‌ನಲ್ಲಿ ಟೆಂಡರ್ ಕರೆಯಲಾಗಿತ್ತು. ಆದರೆ, ಮೊದಲನೇ ಮತ್ತು 2ನೇ ಟೆಂಡರ್‌ನಲ್ಲಿ ಪ್ರಕ್ರಿಯೆಯಲ್ಲಿ ಬಿಡ್‌ದಾರರು ತಾಂತ್ರಿಕವಾಗಿ ಅರ್ಹತೆ ಪಡೆಯಲಿಲ್ಲ. 3ನೇ ಬಾರಿಗೆ ಟೆಂಡರ್ ಕರೆದಾಗ ಅರ್ಹ ಬಿಡ್‌ದಾರರಿಗೆ ಕಾರ್ಯಾದೇಶ ಪತ್ರ ನೀಡಲಾಗಿದೆ.
ಈವರೆಗೆ 1,959 ಟೆಲಿಮೆಟ್ರಿಕ್ ಮಳೆ ಮಾಪನ ಕೇಂದ್ರಗಳಲ್ಲಿ 1,791 ಕೇಂದ್ರಗಳು ಸಿವಿಲ್ ಹಂತದ ಕಾಮಗಾರಿಗಳು ಮುಕ್ತಾಯವಾಗಿದ್ದು, ಬರೀ 359 ಕೇಂದ್ರಗಳಿಂದ ದತ್ತಾಂಶ ಸ್ವೀಕರಿಸಲಾಗುತ್ತಿದೆ. ಪ್ರಸ್ತುತ 4,646 ಮಳೆ ಮಾಪನ ಕೇಂದ್ರಗಳು ವಾರ್ಷಿಕ ನಿರ್ವಹಣೆಯಲ್ಲಿದ್ದು, ಇವುಗಳಲ್ಲಿ 1,044 ಮಳೆ ಮಾಪನ ಕೇಂದ್ರಗಳು ಕಳವುವಾಗಿದ್ದರೆ, ಇನ್ನೂ ಹಲವು ಹಾನಿಗೊಳಗಾಗಿವೆ. ಅಲ್ಲದೆ, ಗ್ರಾ.ಪಂ ಸೇರಿ ಇತರೆ ಸರ್ಕಾರಿ ಕಟ್ಟಡದ ಮೊದಲನೇ ಮಹಡಿ ಮೇಲೆ ಛಾವಣಿ ನಿರ್ಮಿಸಿದ ಕಾರಣ ಸಾಕಷ್ಟು ಮಳೆ ಮಾಪನ ಕೇಂದ್ರಗಳನ್ನು ಬೇರೆ ಸರ್ಕಾರಿ ಕಟ್ಟಡಕ್ಕೆ ಸ್ಥಳಾಂತರಿಸಲಾಗಿದೆ. ಮಳೆ/ಹವಾಮಾನ ಮಾಪನ ಕೇಂದ್ರಗಳು ಎಲೆಕ್ಟ್ರಾನಿಕ್ ಉಪಕರಣಗಳು ಮತ್ತು ಜಿಪಿಎಸ್ ಸಂಪರ್ಕ ಆಧಾರಿತವಾಗಿದ್ದು, ಹವಾಮಾನ ವೈಪರೀತ್ಯದಿಂದಾಗಿ ತಾತ್ಕಾಲಿಕವಾಗಿ ಕೆಲವೊಂದು ಸ್ಥಗಿತಗೊಂಡಿವೆ.
