4,000 ರೂ.ಯಿಂದ 15,000 ರೂ.ವರೆಗೆ ಖರ್ಚು
ಅಹಮದಾಬಾದ್‌ನ ಕೆಲವು ಸೌಂದರ್ಯ ಮತ್ತು ವೈದ್ಯಕೀಯ ಕ್ಲಿನಿಕ್‌ಗಳಲ್ಲಿ ಒಂದು ಐವಿ ಡ್ರಿಪ್‌ ಸೆಷನ್‌ಗೆ ಸುಮಾರು 4,000ದಿಂದ 10,000 ರೂ.ವರೆಗೆ ವೆಚ್ಚವಾಗುತ್ತದೆ. ಇನ್ನು ಹಲವು ಸೆಷನ್‌ಗಳನ್ನು ಒಳಗೊಂಡ ಹಬ್ಬದ ವಿಶೇಷ ಪ್ಯಾಕೇಜ್‌ಗಳ ಬೆಲೆ 15,000 ರೂ.ವರೆಗೆ ತಲುಪಬಹುದು. ಕ್ಲಿನಿಕ್‌, ಬಳಸುವ ಮಿಶ್ರಣ ಹಾಗೂ ಚಿಕಿತ್ಸೆಯ ಪ್ರಕಾರ ವೆಚ್ಚ ಬದಲಾಗುತ್ತದೆ. ಕೆಲವರು ಇದನ್ನು ನಿಯಮಿತ ಚಿಕಿತ್ಸೆಯಾಗಿ ನೋಡದೆ, ಹಬ್ಬದ ಸಂದರ್ಭದಲ್ಲಿ ಒಮ್ಮೆ ಮಾಡಿಸಿಕೊಳ್ಳುವ ಸೌಂದರ್ಯ ಮತ್ತು ಚೈತನ್ಯದ ಚಿಕಿತ್ಸೆಯಾಗಿ ಪರಿಗಣಿಸುತ್ತಿದ್ದಾರೆ.
ಯುವಜನರಷ್ಟೇ ಅಲ್ಲ, ಉದ್ಯೋಗಿಗಳಲ್ಲೂ ಕ್ರೇಜ್‌
ಸಾಮಾಜಿಕ ಮಾಧ್ಯಮಗಳಲ್ಲಿ ಈ ಟ್ರೆಂಡ್‌ ಯುವಜನರೊಂದಿಗೆ ಹೆಚ್ಚು ಗುರುತಿಸಿಕೊಂಡಿದ್ದರೂ, ಅಹಮದಾಬಾದ್‌ನಲ್ಲಿ 30, 40ರ ವಯೋಮಾನದ ಉದ್ಯೋಗಿಗಳೂ ಇಂತಹ ಚಿಕಿತ್ಸೆಗಳತ್ತ ಆಸಕ್ತಿ ತೋರಿಸುತ್ತಿದ್ದಾರೆ ಎನ್ನಲಾಗಿದೆ. ಹಗಲಿನಲ್ಲಿ ಕಚೇರಿ ಕೆಲಸ, ರಾತ್ರಿ ಗರ್ಬಾ ಅಭ್ಯಾಸ ಅಥವಾ ನೃತ್ಯ ಇವೆಲ್ಲದರ ನಡುವೆ ದಣಿವು ಮತ್ತು ಚರ್ಮದ ಕಾಂತಿ ಕಡಿಮೆಯಾಗುವ ಬಗ್ಗೆ ಕೆಲವರು ಚಿಂತಿತರಾಗಿದ್ದಾರೆ. ಹೀಗಾಗಿ ಕಡಿಮೆ ಸಮಯದಲ್ಲಿ ಫಲಿತಾಂಶ ಸಿಗಬಹುದು ಎಂಬ ನಿರೀಕ್ಷೆಯಲ್ಲಿ ಐವಿ ಡ್ರಿಪ್‌ ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ. ಆದರೆ ಇಂತಹ ಡ್ರಿಪ್‌ಗಳು ಎಲ್ಲರಿಗೂ ಅಗತ್ಯವಿಲ್ಲ. ದೇಹಕ್ಕೆ ಪೋಷಕಾಂಶಗಳ ಕೊರತೆ ಇದೆಯೇ ಎಂಬುದನ್ನು ತಿಳಿದುಕೊಳ್ಳದೆ ಕೇವಲ ಸೌಂದರ್ಯಕ್ಕಾಗಿ ಚಿಕಿತ್ಸೆ ಪಡೆಯುವುದು ಸೂಕ್ತವಲ್ಲ.
ಎಚ್ಚರ ತಪ್ಪಿದರೆ ಅಪಾಯ ಖಂಡಿತ
ಐವಿ ಡ್ರಿಪ್‌ ಚಿಕಿತ್ಸೆಯ ಜನಪ್ರಿಯತೆ ಹೆಚ್ಚುತ್ತಿರುವ ಬೆನ್ನಲ್ಲೇ ವೈದ್ಯರು ಎಚ್ಚರಿಕೆ ನೀಡುತ್ತಿದ್ದಾರೆ. ಇದು ಸಾಮಾನ್ಯ ಬ್ಯೂಟಿ ಟ್ರೀಟ್‌ಮೆಂಟ್‌ ಅಲ್ಲ, ವೈದ್ಯಕೀಯ ಮೇಲ್ವಿಚಾರಣೆಯಲ್ಲಿ ನಡೆಯಬೇಕಾದ ವಿಧಾನವಾಗಿದೆ. ಸೂಕ್ತ ಪರೀಕ್ಷೆ ಮತ್ತು ಆರೋಗ್ಯದ ಸ್ಥಿತಿಯ ಮೌಲ್ಯಮಾಪನವಿಲ್ಲದೆ ಇಂತಹ ಡ್ರಿಪ್‌ಗಳನ್ನು ಪಡೆಯುವುದರಿಂದ ಅಲರ್ಜಿ, ದೇಹದಲ್ಲಿ ಹೆಚ್ಚುವರಿ ದ್ರವ ಸಂಗ್ರಹವಾಗುವ ಸಮಸ್ಯೆ ಹಾಗೂ ಬಳಸುವ ಪದಾರ್ಥಗಳನ್ನು ಅವಲಂಬಿಸಿ ಇತರ ತೊಂದರೆಗಳು ಉಂಟಾಗಬಹುದು. ವಿಶೇಷವಾಗಿ ಈಗಾಗಲೇ ಆರೋಗ್ಯ ಸಮಸ್ಯೆಗಳಿರುವವರು ವೈದ್ಯರ ಸಲಹೆಯಿಲ್ಲದೆ ಇಂತಹ ಚಿಕಿತ್ಸೆಗೆ ಮುಂದಾಗಬಾರದು.
