ಅಮೆರಿಕ ಪ್ರವಾಸ ರದ್ದು; ಇದು ನನಗೆ ನಿರಾಕರಿಸಿದ್ದಲ್ಲ, ತೆಲಂಗಾಣ ಜನಕ್ಕೆ ಮಾಡಿದ ಅವಮಾನ: ಕೇಂದ್ರದ ವಿರುದ್ಧ ರೇವಂತ್ ರೆಡ್ಡಿ ಆಕ್ರೋಶ | Revanth Reddy

ಹೈದರಾಬಾದ್: ಅಮೆರಿಕದ ತಮ್ಮ ಪ್ರಸ್ತಾವಿತ ಪ್ರವಾಸಕ್ಕೆ ಅನುಮತಿ ನಿರಾಕರಿಸಿದ ಕೇಂದ್ರ ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ ತೆಲಂಗಾಣ ಸಿಎಂ ರೇವಂತ್ ರೆಡ್ಡಿ(Revanth Reddy), ಇದು ನನಗೆ ಅನುಮತಿ ನಿರಾಕರಿಸಿದ್ದಲ್ಲ, ಬದಲಿಗೆ ತೆಲಂಗಾಣದ ಜನರಿಗೆ ಮಾಡಿದ ಅವಮಾನ ಎಂದು ಕಿಡಿಕಾರಿದ್ದಾರೆ.

ಯುಕೆ ಪ್ರವಾಸ ಮುಗಿಸಿದ ಬಳಿಕ ತಮ್ಮ ಅಮೆರಿಕ ಪ್ರವಾಸವನ್ನು ರದ್ದುಗೊಳಿಸಿ ಸೋಮವಾರ(ಆ. 24) ಹೈದರಾಬಾದ್‌ಗೆ ಮರಳಿದ ಕೆಲವೇ ಗಂಟೆಗಳಲ್ಲಿ ಸುದ್ದಿಗೋಷ್ಠಿ ನಡೆಸಿದ ಅವರು, ಇದು ಗುಜರಾತ್‌ನ ಪ್ರಾಬಲ್ಯದ ಪರಿಣಾಮ. ರೇವಂತ್ ರೆಡ್ಡಿಗೆ ಅನುಮತಿ ನಿರಾಕರಿಸಿದ್ದಲ್ಲ, ತೆಲಂಗಾಣದ ಅಭಿವೃದ್ಧಿಗೆ ಅಡ್ಡಿಪಡಿಸುವಂತಿದೆ ಎಂದು ವಾಗ್ದಾಳಿ ನಡೆಸಿದರು.

ಇದರಲ್ಲಿರುವ ರಾಜಕೀಯ ಆಯಾಮವೇನು? ಮೋದಿ ಬಿಜೆಪಿಯವರು, ರೇವಂತ್ ರೆಡ್ಡಿ ಕಾಂಗ್ರೆಸ್‌ನವರು. ಮೋದಿ ಗುಜರಾತ್‌ನವರು, ರೇವಂತ್ ತೆಲಂಗಾಣದವರು. ಅನುಮತಿ ನಿರಾಕರಿಸುವಾಗ ಅವರು ಪ್ರಸ್ತಾಪಿಸಿದ ರಾಜಕೀಯ ಆಯಾಮ ಇದೇನಾ? ಇದು ಸಂಪೂರ್ಣವಾಗಿ ಸಹಕಾರಿ ಒಕ್ಕೂಟ ವ್ಯವಸ್ಥೆಗೆ ವಿರುದ್ಧವಾಗಿದೆ. ಗುಜರಾತ್ ತೆಲಂಗಾಣದ ವಿರುದ್ಧ ಪಿತೂರಿ ನಡೆಸುತ್ತಿದೆ, ನಾನು ಇದನ್ನು ಖಂಡಿಸುತ್ತೇನೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ನಾವು ಈ ಭೇಟಿಯ ಬಗ್ಗೆ ವಿದೇಶಾಂಗ ವ್ಯವಹಾರಗಳ ಸಚಿವಾಲಯಕ್ಕೆ ಮಾಹಿತಿ ನೀಡಿದ್ದೆವು. ಭೇಟಿಯ ಉದ್ದೇಶದ ಬಗ್ಗೆ ಸಿಎಂಓ ಕಚೇರಿ ಸಚಿವಾಲಯಕ್ಕೆ ತಿಳಿಸಿತ್ತು. ತೆಲಂಗಾಣವನ್ನು ಕ್ರೀಡೆ ಮತ್ತು ಹೂಡಿಕೆಯ ಕೇಂದ್ರವನ್ನಾಗಿ ಉತ್ತೇಜಿಸುವುದು. ಹಾಗೂ ವಿಶ್ವದರ್ಜೆಯ ವಿಶ್ವವಿದ್ಯಾಲಯಗಳನ್ನು ರಾಜ್ಯಕ್ಕೆ ಕರೆತರುವುದು ಇದರ ಉದ್ದೇಶವಾಗಿತ್ತು. ಸಚಿವಾಲಯವು ಪ್ರಸ್ತಾವನೆಯನ್ನು ಪರಿಶೀಲಿಸಿ, ರಾಜಕೀಯ ಕಾರಣಗಳಿಂದಾಗಿ ಭೇಟಿಗೆ ಅನುಮತಿ ನಿರಾಕರಿಸಲಾಗಿದೆ ಎಂದು ನಮಗೆ ತಿಳಿಸಿದೆ ಎಂದರು.

ಇಂಗ್ಲೆಂಡ್ ಮತ್ತು ಅಮೆರಿಕ ಎರಡೂ ಭೇಟಿಗಳಲ್ಲಿ ಒಂದೇ ರೀತಿಯ ಕಾರ್ಯಕ್ರಮಗಳಿದ್ದರೂ, ಯುಕೆ ಭೇಟಿಗೆ ಅನುಮತಿ ನೀಡಿ ಅಮೆರಿಕ ಭೇಟಿಗೆ ಏಕೆ ನಿರಾಕರಿಸಲಾಯಿತು? ತಮಗೆ ಅನುಮತಿ ನಿರಾಕರಿಸಿದ ವಿಷಯವನ್ನು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮತ್ತು ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ಸಂಸತ್ತಿನಲ್ಲಿ ಪ್ರಸ್ತಾಪಿಸಲಿದ್ದಾರೆ ಎಂದು ತಿಳಿಸಿದರು.

ಕಳೆದ ವಾರ, ಸಿಎಂ ರೇವಂತ್ ರೆಡ್ಡಿಯವರ ಯುಕೆ ಪ್ರವಾಸಕ್ಕೆ ಅನುಮತಿ ನೀಡಿದ್ದರೂ, ಅಮೆರಿಕ ಭೇಟಿಗೆ ರಾಜಕೀಯ ಅನುಮತಿಯನ್ನು ಕೇಂದ್ರ ಸರ್ಕಾರ ನಿರಾಕರಿಸಿತ್ತು. ಅಲ್ಲಿ ನಿಗದಿಯಾಗಿದ್ದ ಕಾರ್ಯಕ್ರಮಗಳು ಅವರು ಹೊಂದಿರುವ ಹುದ್ದೆ ಮತ್ತು ಭೇಟಿಯ ಉದ್ದೇಶಕ್ಕೆ ಸೂಕ್ತವಾಗಿರಲಿಲ್ಲ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಹೇಳಿತ್ತು (ಏಜೆನ್ಸೀಸ್).