ಕೋವಿಡ್ ಮಹಾಮಾರಿ ಉತ್ತುಂಗದಲ್ಲಿದ್ದ 2020ರಲ್ಲಿ ಹೈದರಾಬಾದ್‌ನ ಸಮಾಜ ಕಲ್ಯಾಣ ಇಲಾಖೆಯಲ್ಲಿ ಉದ್ಯೋಗದಲ್ಲಿದ್ದ ಶೇಷು ಬಾಬು ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿ ತಮ್ಮ ಸ್ವಗ್ರಾಮವಾದ ರಾಮಿರೆಡ್ಡಿಪಲ್ಲಿಗೆ ವಾಪಸ್ಸಾದರು. ಆ ಸಮಯದಲ್ಲಿ ಅವರ ತಂದೆ ಸಾಂಪ್ರದಾಯಿಕವಾಗಿ ಬೆಳೆಯುತ್ತಿದ್ದ ಮೆಣಸಿನಕಾಯಿ ಬೆಳೆ ಹವಾಮಾನ ಬದಲಾವಣೆಯಿಂದಾಗಿ ಭಾರಿ ನಷ್ಟವನ್ನು ಎದುರಿಸುತ್ತಿತ್ತು.
ತಂದೆಯ ಕಷ್ಟಕ್ಕೆ ನೆರವಾಗಲು ಮತ್ತು ಕೃಷಿಯಲ್ಲಿ ಏನಾದರೂ ಹೊಸದು ಮಾಡಬೇಕೆಂದುಕೊಂಡ ಅವರು, ವಿಭಿನ್ನ ಹಾಗೂ ಲಾಭದಾಯಕ ಪರ್ಯಾಯ ಬೆಳೆಗಳ ಹುಡುಕಾಟದಲ್ಲಿದ್ದರು. ಅಂತರ್ಜಾಲದಲ್ಲಿ ನಡೆಸಿದ ಸುದೀರ್ಘ ಪರಿಶೋಧನೆಯಲ್ಲಿ ಅವರಿಗೆ 'ಗ್ಯಾಕ್' ಹಣ್ಣಿನ ಕೃಷಿಯ ಬಗ್ಗೆ ತಿಳಿದುಬಂದಿದ್ದು, ಆಂಧ್ರಪ್ರದೇಶದ ನರ್ಸರಿಯೊಂದರಲ್ಲಿ ಲಭ್ಯವಿದ್ದ ವಿಯೆಟ್ನಾಂ ಮೂಲದ ಈ ಗ್ಯಾಕ್ ಸಸ್ಯಗಳನ್ನು ತಂದು ಕೃಷಿ ಮಾಡಲು ನಿರ್ಧರಿಸಿದರು.
ಮುಂದೆ ಮಾರ್ಚ್ 2023ರಲ್ಲಿ ಕೇವಲ ಕಾಲು ಎಕರೆ ಜಾಗದಲ್ಲಿ 100 ಗ್ಯಾಕ್ ಸಸ್ಯಗಳನ್ನು ನೆಡುವ ಮೂಲಕ ತಮ್ಮ ನೂತನ ಪ್ರಯೋಗಕ್ಕೆ ಚಾಲನೆ ನೀಡಿದರು. ಆರಂಭದಲ್ಲಿ ಪ್ರತಿ ಗಿಡಕ್ಕೆ ಸುಮಾರು 700 ರೂ.ಗಳಂತೆ ಬಂಡವಾಳ ಹೂಡಿಕೆ ಮಾಡಲಾಗಿದ್ದು, ವಿಶೇಷವೆಂದರೆ ಈ ಸಸ್ಯಗಳು ಕೇವಲ ನಾಲ್ಕು ತಿಂಗಳಲ್ಲೇ ಫಲ ನೀಡಲು ಪ್ರಾರಂಭಿಸಿದವು. ಮೊದಲ ಬೆಳೆಯಲ್ಲೇ ಸುಮಾರು 2,100 ಕೆ.ಜಿ ಗ್ಯಾಕ್ ಹಣ್ಣುಗಳ ಇಳುವರಿ ದೊರೆಯಿತು. ಮಾರುಕಟ್ಟೆಯಲ್ಲಿ ಪ್ರತಿ ಕೆ.ಜಿಗೆ ಬರೋಬ್ಬರಿ 800 ರೂ.ಗಳಂತೆ ಮಾರಾಟ ಮಾಡುವ ಮೂಲಕ ಅವರು ತಮ್ಮ ಮೊದಲ ಕೃಷಿಯಲ್ಲೇ ಬರೋಬ್ಬರಿ 16 ಲಕ್ಷ ರೂ.ಗಳಿಗೂ ಅಧಿಕ ಆದಾಯವನ್ನು ಗಳಿಸಿ ಎಲ್ಲರಿಗೂ ಅಚ್ಚರಿ ಮೂಡಿಸಿದರು.
ಈ ಆರಂಭಿಕ ಯಶಸ್ಸಿನಿಂದ ಉತ್ಸುಕರಾದ ಶೇಷು ಬಾಬು ಅವರು ಈಗ ಗ್ಯಾಕ್ ಕೃಷಿಯನ್ನು ಮತ್ತಷ್ಟು ವಿಸ್ತರಿಸಿದ್ದಾರೆ. ಪ್ರಸ್ತುತ ತಮ್ಮ ಜಮೀನಿನಲ್ಲಿರುವ 210 ಹೆಣ್ಣು ಗಿಡಗಳಿಂದ ಪ್ರತಿ ಗಿಡಕ್ಕೆ ಅಂದಾಜು 30 ಕೆ.ಜಿಯಂತೆ ಒಟ್ಟು 6,000 ಕೆ.ಜಿಗಿಂತ ಹೆಚ್ಚಿನ ಇಳುವರಿಯನ್ನು ಪಡೆಯುತ್ತಿದ್ದಾರೆ.
ಪ್ರಸ್ತುತ ಮಾರುಕಟ್ಟೆಯ ಬೇಡಿಕೆಗೆ ತಕ್ಕಂತೆ ಪ್ರತಿ ಕೆಜಿ ಗ್ಯಾಕ್ ಹಣ್ಣನ್ನು 500 ರೂ. ನಿಂದ 600 ರೂ. ವರೆಗೆ ಮಾರಾಟ ಮಾಡುತ್ತಿದ್ದಾರೆ. ಈ ಹಣ್ಣಿನ ಗಿಡಗಳು ಬಳ್ಳಿಯ ರೂಪದಲ್ಲಿ ಬೆಳೆಯುವುದರಿಂದ ಇವುಗಳಿಗೆ ಆಸರೆ ನೀಡಲು ಪೆಂಡಾಲ್ ಅಥವಾ ಮಂಟಪ ರಚನೆ ಮಾಡುವುದು ಅನಿವಾರ್ಯವಾಗಿದ್ದು, ಪ್ರತಿ ಎಕರೆಗೆ ಸುಮಾರು 4 ಲಕ್ಷ ರೂ.ಗಳವರೆಗೆ ಆರಂಭಿಕ ವೆಚ್ಚ ತಗಲುತ್ತದೆ ಎಂದು ಅವರು ತಿಳಿಸಿದ್ದಾರೆ.
