ಇದಕ್ಕೂ ಮುನ್ನ ಎಕ್ಸ್ನಲ್ಲಿ ಪೋಸ್ಟ್ ಹಾಕಿರುವ ಸಿಎಂ, ನಮ್ಮ ಹೋರಾಟ ಪ್ರಜಾಪ್ರಭುತ್ವಕ್ಕಾಗಿ, ಗಮನವನ್ನು ಬೇರೆಡೆ ಸೆಳೆಯುವ ವಿಷಯಗಳಿಗಲ್ಲ. ನಿನ್ನೆಯ ಪ್ರತಿಭಟನೆಯಲ್ಲಿ, ಮತ ಕಳ್ಳತನದ ವಿರುದ್ಧದ ಹೋರಾಟ ಹಾಗೂ ನಮ್ಮ ಪ್ರಜಾಪ್ರಭುತ್ವದ ರಕ್ಷಣೆಗಾಗಿ ಒಗ್ಗೂಡಿದ ಜನರ ಮಹಾಸಾಗರವೇ ಕಂಡುಬಂದಿತು.
ಶ್ರೀ ರಾಹುಲ್ ಗಾಂಧಿಯವರು ನನ್ನ ಸುರಕ್ಷತೆಯ ಬಗ್ಗೆ ಕಾಳಜಿ ವಹಿಸಿ, ವಾಹನಕ್ಕೆ ಹಿಂತಿರುಗಿ ಎಚ್ಚರಿಕೆಯಿಂದ ಇರುವಂತೆ ನನಗೆ ಸಲಹೆ ನೀಡಿದರು. ನಾವಿಬ್ಬರೂ ಹಂಚಿಕೊಳ್ಳುವ ಬಾಂಧವ್ಯ ಅಂತಹದ್ದು. ಅದು ನಂಬಿಕೆ, ವಾತ್ಸಲ್ಯ ಮತ್ತು ಕೌಟುಂಬಿಕತೆಯ ಬುನಾದಿಯ ಮೇಲೆ ನಿಂತಿದೆ.ಕೇವಲ 10 ಸೆಕೆಂಡುಗಳ ವಿಡಿಯೋ ಸಂಪೂರ್ಣ ಸತ್ಯವನ್ನು ಹೇಳಲಾರದು. ನೈಜ ವಿಷಯವನ್ನು ನಾವು ಮರೆಯಬಾರದು. ಅದೇ ಮತ ಕಳ್ಳತನ ಮತ್ತು ಪ್ರತಿಯೊಬ್ಬ ಭಾರತೀಯನ ಮತದಾನದ ಹಕ್ಕನ್ನು ರಕ್ಷಿಸುವ ಹೋರಾಟ ಎಂದಿದ್ದರು.
ಘಟನೆ ಬಗ್ಗೆ ಮಾತನಾಡಿದ್ದ ಡಿಸಿಎಂ ಡಾ. ಜಿ. ಪರಮೇಶ್ವರ, ಪ್ರತಿಭಟನೆಗಳು ಮತ್ತು ದೊಡ್ಡ ಸಾರ್ವಜನಿಕ ಸಭೆಗಳ ಸಮಯದಲ್ಲಿ ಭದ್ರತೆಯನ್ನು ನಿರ್ವಹಿಸುವುದು ಸವಾಲಿನ ಕೆಲಸ. ರಾಹುಲ್ ಗಾಂಧಿಯನ್ನು ರಕ್ಷಿಸುವುದು ಮತ್ತು ಜನರು ಅವರನ್ನು ಸುಲಭವಾಗಿ ಸಮೀಪಿಸಲು ಸಾಧ್ಯವಾಗದಂತೆ ನೋಡಿಕೊಳ್ಳುವುದು ಅಲ್ಲಿನ ಭದ್ರತಾ ಸಿಬ್ಬಂದಿಯ ಪ್ರಾಥಮಿಕ ಜವಾಬ್ದಾರಿ. ದುರದೃಷ್ಟವಶಾತ್, ಸಿಎಂ ಕೂಡ ಪ್ರದೇಶಕ್ಕೆ ಹೋಗಿದ್ದಾಗ ಜನಸಂದಣಿಯ ನಡುವೆ ಸ್ವಲ್ಪ ತಳ್ಳಲ್ಪಟ್ಟರು ಎಂದು ತಿಳಿಸಿದ್ದಾರೆ.
