Vladimir Putin | ಭಾರತದ ದೃಢ ನಿಲುವನ್ನು ಜಗತ್ತೇ ನೋಡಿದೆ..ಮೋದಿ ಒತ್ತಡಕ್ಕೆ ಮಣಿಯುವ ವ್ಯಕ್ತಿ ಅಲ್ಲ ಎಂದ ರಷ್ಯಾ ಅಧ್ಯಕ್ಷ ಪುಟಿನ್​

ಗುರುವಾರ ಭಾರತಕ್ಕೆ ಎರಡು ದಿನಗಳ ಭೇಟಿ ನೀಡುವ ಮುನ್ನ ಇಂಡಿಯಾ ಟುಡೇ ಗ್ರೂಪ್‌ನ ಅಂಜನಾ ಓಂ ಕಶ್ಯಪ್ ಮತ್ತು ಗೀತಾ ಮೋಹನ್ ಅವರಿಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿರುವ ಪುಟಿನ್​, ರಷ್ಯಾ ಮತ್ತು ಭಾರತ ನಡುವಿನ ದ್ವಿಪಕ್ಷೀಯ ವಹಿವಾಟು ಶೇ. 90 ಕ್ಕೂ ಹೆಚ್ಚು ಯಶಸ್ವಿಯಾಗಿ ಪೂರ್ಣಗೊಂಡಿದೆ ಎಂದು ತಿಳಿಸಿದರು.

ತಮ್ಮ ಸ್ನೇಹಿತ ಪ್ರಧಾನಿ ಮೋದಿ ಅವರನ್ನು ಭೇಟಿ ಮಾಡಲು ತುಂಬಾ ಸಂತೋಷವಾಗಿದೆ ಎಂದಿರುವ ಪುಟಿನ್​, ಭಾರತದಲ್ಲಿ ನಡಯಲಿರುವ ತಮ್ಮ ಮುಂದಿನ ಸಭೆಯನ್ನು ಎದುರು ನೋಡುತ್ತಿದ್ದೇನೆ ಎಂದಿರುವ ಪುಟಿನ್​, ಭಾರತ-ರಷ್ಯಾ ಸಹಕಾರದ ವಿಶಾಲ ವ್ಯಾಪ್ತಿಯನ್ನು ಗಮನಿಸಿದರೆ ಚರ್ಚಿಸಲು ಬಹಳಷ್ಟು ವಿಷಯಗಳಿವೆ ಎಂದು ತಿಳಿಸಿದರು. ಸ್ವಾತಂತ್ರ್ಯದ ಬಳಿಕ ಭಾರತದ ಪ್ರಗತಿಯನ್ನು ಶ್ಲಾಘಿಸಿದ ರಷ್ಯಾ ಅಧ್ಯಕ್ಷರು, ಕೇವಲ 77 ವರ್ಷಗಳ ಕಡಿಮೆ ಅವಧಿಯಲ್ಲಿ, ದೇಶ ಗಮನಾರ್ಹ ಬೆಳವಣಿಗೆಯನ್ನು ಸಾಧಿಸಿದೆ ಎಂದರು.

ಸೆಪ್ಟೆಂಬರ್‌ನಲ್ಲಿ ಚೀನಾದಲ್ಲಿ ನಡೆದ ಶಾಂಘೈ ಸಹಕಾರ ಸಂಸ್ಥೆ (SCO) ಶೃಂಗಸಭೆಯ ಸಂದರ್ಭದಲ್ಲಿ ಪ್ರಧಾನಿ ಮೋದಿಯವರೊಂದಿಗೆ ಹೆಚ್ಚು ಚರ್ಚೆಯಾದ ಪ್ರಧಾನಿ ಮೋದಿ ಜೊತೆಗಿನ ಕಾರು ಸವಾರಿ ಬಗ್ಗೆ ಮಾತನಾಡಿದ ಪುಟಿನ್​, ಅದು ನನ್ನ ಕಲ್ಪನೆ, ನಮ್ಮ ಸ್ನೇಹದ ಸಂಕೇತವಾಗಿತ್ತು ಎಂದು ಹೇಳಿದರು. ಅದು ಪೂರ್ವ ನಿಯೋಜಿತ ಕಾರ್ಯಕ್ರಮವಾಗಿರಲಿಲ್ಲ. ನಾವು ಸಭೆಯ ಬಳಿಕ ಹೊರಗೆ ಹೋದೆವು, ನನ್ನ ಕಾರು ಅಲ್ಲಿತ್ತು, ಒಟ್ಟಿಗೆ ಸವಾರಿ ಮಾಡೋಣ ಎಂದು ಮೋದಿಯವರಿಗೆ ಸೂಚಿಸಿದೆ. ದಾರಿಯುದ್ದಕ್ಕೂ ಮಾತನಾಡಿದೆವು, ಚರ್ಚಿಸಲು ಯಾವಾಗಲೂ ಏನಾದರೂ ಇರುತ್ತದೆ ಎಂದು ಹೇಳಿದರು.

ಘೋಷಣೆಗಳ ಬಗ್ಗೆ ಗುಟ್ಟು ಬಿಟ್ಟು ಕೊಡದ ಪುಟಿನ್​, ಮುಂದುವರಿದ ತಂತ್ರಜ್ಞಾನ ಸೇರಿದಂತೆ ಪ್ರಮುಖ ಕ್ಷೇತ್ರಗಳನ್ನು ಒಳಗೊಂಡಂತೆ ಎರಡೂ ದೇಶಗಳು ಸಮಗ್ರ ಸಹಕಾರ ಯೋಜನೆಯನ್ನು ಹೊಂದಿವೆ ಎಂದು ತಿಳಿಸಿದರು(ಏಜೆನ್ಸೀಸ್​).