ಕೆಲಸ ಮುಗಿಸಿ ಸ್ನೇಹಿತರೊಂದಿಗೆ ಚಹಾ ಕುಡಿದು ಎಂದಿನಂತೆ ವಾಪಸ್ ಬರುವಾಗ ಈ ದುರ್ಘಟನೆ ಸಂಭವಿಸಿದೆ. ಇವರ ಹಿಂದೆಯೇ ಇತರೆ ಎರಡು ಬೈಕ್‌ಗಳಲ್ಲಿ ಸ್ನೇಹಿತರು ಬರುತ್ತಿದ್ದರು. ಅತ್ಯಂತ ಖುಷಿಯಿಂದ ಜತೆಯಾಗಿ ಹೊರಟಿದ್ದ ಸ್ನೇಹಿತರು, ತಮ್ಮ ಕಣ್ಣೆದುರಲ್ಲೇ ರಸ್ತೆ ಮೇಲೆ ಸಾವಿಗೀಡಾಗಿರುವುದನ್ನು ಕಂಡು ಅಘಾತಕ್ಕೊಳಗಾಗಿದ್ದಾರೆ. ಸದ್ಯ ಮೃತದೇಹಗಳನ್ನು ಅಂಕಮಾಲಿ ತಾಲೂಕು ಆಸ್ಪತ್ರೆಗೆ ರವಾನಿಸಲಾಗಿದ್ದು, ಮರಣೋತ್ತರ ಪರೀಕ್ಷೆಯ ಬಳಿಕ ವಾರಸುದಾರರಿಗೆ ಹಸ್ತಾಂತರಿಸಲಾಗುತ್ತದೆ.
ಮದ್ಯದ ನಶೆಯಲ್ಲಿ ಮಿನಿ ಕೂಪರ್ ಅತಿವೇಗ
ಕಾರು ಚಾಲನೆ ಮಾಡುತ್ತಿದ್ದ ಸುಹೈಲ್ ಸಜೀವ್ ಎಂಬಾತ ವಿಪರೀತ ವೇಗದಲ್ಲಿ ವಾಹನ ಚಲಾಯಿಸಿದ್ದು ಈ ಅಪಘಾತಕ್ಕೆ ನೇರ ಕಾರಣವಾಗಿದೆ. ಇದರ ದೃಶ್ಯಾವಳಿಗಳು ಕೂಡ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿವೆ. ಪೊಲೀಸರು ಈ ಸಂಬಂಧ ಕೊಲೆ ಕೇಸ್ ದಾಖಲಿಸಿಕೊಂಡಿದ್ದು, ಜಾಮೀನು ರಹಿತ ಸೆಕ್ಷನ್‌ಗಳನ್ನು ಹೇರಲಾಗಿದೆ. ತನಿಖೆಯ ವೇಳೆ ಆತನ ದೇಹದಲ್ಲಿ ಅಳತೆಮೀರಿದ ಪ್ರಮಾಣದಲ್ಲಿ ಆಲ್ಕೋಹಾಲ್ ಇರುವುದು ದೃಢಪಟ್ಟಿದೆ. ಜತೆಗೆ ಇತರೆ ಮಾದಕ ವಸ್ತುಗಳನ್ನು ಸಹ ಆತ ಬಳಸಿದ್ದಾನೆಯೇ ಎಂಬ ಶಂಕೆ ವ್ಯಕ್ತವಾಗಿದೆ.
ಘಟನೆಗೂ ಮುನ್ನ ದಿನದ ಮಧ್ಯಾಹ್ನದಿಂದಲೇ ಸುಹೈಲ್ ಮೂರು ವಿಭಿನ್ನ ಬಾರ್‌ಗಳು ಹಾಗೂ ಪಂಚತಾರಾ ಹೋಟೆಲ್‌ಗಳಲ್ಲಿ ಮದ್ಯಪಾನ ಮಾಡಿದ್ದನು. ಈ ಎಲ್ಲ ಹುಚ್ಚಾಟದ ದೃಶ್ಯಗಳನ್ನು ಆತ ತನ್ನ ಮೊಬೈಲ್‌ನಲ್ಲಿಯೂ ಚಿತ್ರೀಕರಿಸಿಕೊಂಡಿದ್ದನು. ನೆಡುಂಬಸ್ಸೆರಿ ವಿಮಾನ ನಿಲ್ದಾಣಕ್ಕೆ ಬಂದಿದ್ದ ತನ್ನ ಸ್ನೇಹಿತನನ್ನು ಕರೆದುಕೊಂಡು ಬರಲು ಕಾರಿನಲ್ಲಿ ತೆರಳುತ್ತಿದ್ದಾಗ ಈ ದುರ್ಘಟನೆ ಜರುಗಿದೆ. ಈ ಹಿಂದೆ ತಾನು ಬರೋಬ್ಬರಿ 220 ಕಿ.ಮೀ ವೇಗದಲ್ಲಿ ಕಾರು ಚಲಾಯಿಸುತ್ತಿದ್ದ ವಿಡಿಯೋಗಳನ್ನು ಕೂಡ ಆತ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದನು.
