ಬೆಟ್ಟದ ಮೇಲೆ ಮ್ಯಾಗಿ ಮಾರಿ ಒಂದೇ ದಿನದಲ್ಲಿ ಈತ ಸಂಪಾದಿಸಿದ ಮೊತ್ತ ಕೇಳಿದ್ರೆ ದಂಗಾಗೋದು ಖಚಿತ! Maggi

Maggi : ದೆಹಲಿಯ ಕಂಟೆಂಟ್ ಕ್ರಿಯೇಟರ್ ದೇವಾಂಶ್ ತ್ಯಾಗಿ ಅವರು ಪರ್ವತ ಪ್ರದೇಶವೊಂದರಲ್ಲಿ ತಾತ್ಕಾಲಿಕ ಮ್ಯಾಗಿ ಸ್ಟಾಲ್ ತೆರೆದು, ಒಂದೇ ದಿನದಲ್ಲಿ ತಾವು ಮಾಡಿದ ಗಳಿಕೆಯ ಬಗ್ಗೆ ಹಂಚಿಕೊಂಡ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. 

ಮೇ 12, 2026 ರಂದು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋದಲ್ಲಿ, ಸುಂದರವಾದ ಗುಡ್ಡಗಾಡು ಪ್ರದೇಶದಲ್ಲಿ ಸಣ್ಣ ಮ್ಯಾಗಿ ಸೆಟಪ್ ಅನ್ನು ಅವರು ಸ್ವತಃ ನಿರ್ಮಿಸಿಕೊಳ್ಳುವುದನ್ನು ಕಾಣಬಹುದು.

ಈ ವಿಡಿಯೋ ಕ್ಲಿಪ್‌ನಲ್ಲಿ ದೇವಾಂಶ್ ಅವರು ಮೇಜು ಮತ್ತು ಕುರ್ಚಿಗಳನ್ನು ಜೋಡಿಸಿ, ಅಡುಗೆ ಕೇಂದ್ರವನ್ನು ಸಿದ್ಧಪಡಿಸಿಕೊಂಡು ಪ್ರವಾಸಿಗರಿಗೆ ಮತ್ತು ಪಾದಯಾತ್ರಿಗಳಿಗೆ ಬಿಸಿಬಿಸಿ ಮ್ಯಾಗಿ ಉಣಬಡಿಸುತ್ತಿರುವುದು ಸೆರೆಯಾಗಿದೆ. ಒಂದು ಪ್ಲೇಟ್ ಸಾಮಾನ್ಯ ಮ್ಯಾಗಿಗೆ 100 ರೂ. ಹಾಗೂ ಬಟರ್ ಮ್ಯಾಗಿಗೆ 120 ರೂ. ದರ ನಿಗದಿಪಡಿಸಲಾಗಿತ್ತು. ದಿನ ಕಳೆದಂತೆ ಆಕರ್ಷಕ ಬೆಟ್ಟದ ನೋಟದ ಮುಂದೆ ಕುಳಿತು ಮ್ಯಾಗಿ ಸವಿಯಲು ಪ್ರವಾಸಿಗರ ದಂಡೇ ಅಲ್ಲಿ ಜಮಾಯಿಸಿತು.

ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಗಮನ ಸೆಳೆದಿದ್ದು, ಇನ್‌ಸ್ಟಾಗ್ರಾಮ್‌ನಲ್ಲಿ 4 ಮಿಲಿಯನ್‌ಗಿಂತಲೂ ಹೆಚ್ಚು ವೀಕ್ಷಣೆಗಳನ್ನು ಪಡೆದಿದೆ. ಲಕ್ಷಾಂತರ ಲೈಕ್ಸ್ ಪಡೆದಿರುವ ಈ ವಿಡಿಯೋಗೆ ನೆಟ್ಟಿಗರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಅನೇಕರು "ಹೊಸ ಬಿಸಿನೆಸ್ ಐಡಿಯಾ ಸಿಕ್ಕಿತು" ಎಂದು ಕಾಮೆಂಟ್ ಮಾಡಿದರೆ, ಇನ್ನು ಕೆಲವರು "ನನ್ನ ಆಫೀಸ್ ಕೆಲಸಕ್ಕಿಂತ ಇದೇ ಉತ್ತಮ" ಎಂದು ತಮಾಷೆ ಮಾಡಿದ್ದಾರೆ.

ಆದರೆ, ಈ ವಿಡಿಯೋ ಟೀಕೆಗಳಿಂದಲೂ ಹೊರತಾಗಿಲ್ಲ. ಅಡುಗೆ ಮಾಡಲು ಹತ್ತಿರದ ಹಳ್ಳದ ನೀರನ್ನು ಬಳಸಿದ್ದನ್ನು ಗಮನಿಸಿದ ಕೆಲವು ಬಳಕೆದಾರರು ನೈರ್ಮಲ್ಯದ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎತ್ತಿದ್ದಾರೆ. "ಹಳ್ಳದ ನೀರು ಬಳಸುವವರೆಗೂ ಎಲ್ಲವೂ ಸರಿಯಾಗಿಯೇ ಇತ್ತು" ಎಂದು ನೆಟ್ಟಿಗರೊಬ್ಬರು ಕಾಮೆಂಟ್ ಮಾಡುವ ಮೂಲಕ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ವಿಡಿಯೋದ ಕೊನೆಯಲ್ಲಿ ದೇವಾಂಶ್ ಅವರು ತಮ್ಮ ಗಳಿಕೆಯ ರಹಸ್ಯವನ್ನು ಬಿಚ್ಚಿಟ್ಟಿದ್ದಾರೆ. ತಾವು ಒಂದೇ ದಿನದಲ್ಲಿ ಸುಮಾರು 225 ಪ್ಲೇಟ್ ಮ್ಯಾಗಿ ಮಾರಾಟ ಮಾಡಿ, ಬರೋಬ್ಬರಿ 24,000 ರೂ. ಗಳಿಸಿರುವುದಾಗಿ ಅವರು ಬಹಿರಂಗಪಡಿಸಿದ್ದಾರೆ. ಈ ದೊಡ್ಡ ಮೊತ್ತದ ಗಳಿಕೆಯನ್ನು ಕೇಳಿ ಅನೇಕರು ಹುಬ್ಬೇರಿಸಿದ್ದು,  ಪರ್ವತ ಪ್ರದೇಶದ ವ್ಯಾಪಾರದಲ್ಲಿರುವ ಲಾಭವನ್ನು ಕಂಡು ಆಶ್ಚರ್ಯಚಕಿತರಾಗಿದ್ದಾರೆ, (ಏಜೆನ್ಸೀಸ್​).