ನವದೆಹಲಿ: ಜಾಗತಿಕ ಮಟ್ಟದಲ್ಲಿ ಹೆಸರುವಾಸಿಯಾಗಿರುವ ಲಡಾಖ್‌ನ ವಿಶ್ವವಿಖ್ಯಾತ ಪಶ್ಮಿನಾ ( Ladakh Pashmina ) ಮತ್ತು ಸಾಂಪ್ರದಾಯಿಕ ಕರಕುಶಲ ವಸ್ತುಗಳು ದೆಹಲಿಯಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ 'ಲ್ಯಾಕ್ಮೆ ಫ್ಯಾಷನ್ ವೀಕ್'ನಲ್ಲಿ ಪ್ರಮುಖ ಕೇಂದ್ರಬಿಂದುವಾಗಿ ಗಮನ ಸೆಳೆದಿವೆ.
ನವದೆಹಲಿಯ 'ದಿ ತಾಜ್' ಹೋಟೆಲ್‌ನಲ್ಲಿ ಅಕ್ಟೋಬರ್ 13 ರಿಂದ 18 ರವರೆಗೆ ನಡೆಯುತ್ತಿರುವ ಈ ಫ್ಯಾಷನ್ ವೀಕ್‌ನಲ್ಲಿ ಲಡಾಖ್‌ನ ಸಾಂಪ್ರದಾಯಿಕ ಶಾಲೂ, ಕರಕುಶಲ ಜವಳಿಗಳು ಮತ್ತು ಕಸೂತಿ ಕಲೆಗಳ ವಿಶೇಷ ಮಳಿಗೆಯನ್ನು ತೆರೆಯಲಾಗಿದೆ.
ಅತ್ಯಂತ ಶೀತಲ ಪ್ರದೇಶವಾದ ಚಾಂಗ್‌ಥಾಂಗ್‌ನ ಅಲೆಮಾರಿ ಕುರುಬರು ಸಾಕುವ 'ಚಾಂಗ್‌ರಾ' ಮೇಕೆಗಳ ರೋಮದಿಂದ ತಯಾರಾಗುವ ಈ ಪಶ್ಮಿನಾ, ಲಡಾಖ್‌ನ ಸಾಂಪ್ರದಾಯಿಕ ಪರಂಪರೆ ಮತ್ತು ಕಠಿಣ ಪರಿಶ್ರಮದ ಸಂಕೇತವಾಗಿದೆ.
