ಇದಾದ ಬಳಿಕ ಪ್ರಭಾಕರ ರೆಡ್ಡಿ ಹಗ್ಗದ ಸಹಾಯದಿಂದ ಆಳವಾದ ಸುರಂಗದೊಳಗೆ ಇಳಿದಿದ್ದಾರೆ. ಆದರೆ, ಸುರಂಗ ತುಂಬಾ ಆಳವಾಗಿದ್ದಲ್ಲದೆ, ಕತ್ತಲು ಆವರಿಸಿ, ಉಸಿರಾಡಲು ಶುದ್ಧ ಗಾಳಿ ಇಲ್ಲದಿರುವುದನ್ನು ಕಂಡು ಪ್ರಭಾಕರ ರೆಡ್ಡಿ ತೀವ್ರ ಆತಂಕಕ್ಕೊಳಗಾಗಿದ್ದಾರೆ. ತಕ್ಷಣವೇ ಎಚ್ಚೆತ್ತುಕೊಂಡು ಮೇಲೆ ಬರಲು ಯತ್ನಿಸಿದರೂ, ಸುರಂಗದ ಆಳ ಮತ್ತು ಆತನ ಬಲಹೀನತೆಯಿಂದಾಗಿ ಮೇಲಕ್ಕೆ ಬರಲು ಸಾಧ್ಯವಾಗದೆ ಒಳಗಡೆಯೇ ಸಿಲುಕಿಕೊಂಡರು. ಹೊರಗಡೆ ಕಾಯುತ್ತಿದ್ದ ಕಿಷ್ಟಯ್ಯ ತನ್ನ ಸ್ನೇಹಿತನನ್ನು ರಕ್ಷಿಸಲು ನಡೆಸಿದ ಎಲ್ಲಾ ಪ್ರಯತ್ನಗಳು ವಿಫಲವಾಗಿ ಕೈಚೆಲ್ಲುವಂತಾಯಿತು.
ಪರಿಸ್ಥಿತಿ ಕೈಮೀರುತ್ತಿರುವುದನ್ನು ಅರಿತ ಕಿಷ್ಟಯ್ಯ ಗಾಬರಿಯಿಂದ ನೇರವಾಗಿ ರಾಮಗಿರಿ ಪೊಲೀಸ್ ಠಾಣೆಗೆ ಓಡಿಹೋಗಿ ವಿಷಯ ಮುಟ್ಟಿಸಿದ್ದಾರೆ. ತಕ್ಷಣ ಎಚ್ಚೆತ್ತ ಪೊಲೀಸರು ಧರ್ಮವರಂನಿಂದ ಅಗ್ನಿಶಾಮಕ ಸಿಬ್ಬಂದಿಯನ್ನು ಸ್ಥಳಕ್ಕೆ ಕರೆಸಿಕೊಂಡಿದ್ದು, ಸ್ಥಳೀಯರ ಸಹಕಾರದೊಂದಿಗೆ ಬೃಹತ್ ರಕ್ಷಣಾ ಕಾರ್ಯಾಚರಣೆ ಕೈಗೊಂಡರು. ಮಂಗಳವಾರ ಮುಂಜಾನೆ ಸುಮಾರು 2 ಗಂಟೆಯ ವೇಳೆಗೆ ಹಗ್ಗಗಳ ಸಹಾಯದಿಂದ ಸುರಂಗದಲ್ಲಿ ಸಿಲುಕಿದ್ದ ಪ್ರಭಾಕರ ರೆಡ್ಡಿಯನ್ನು ಪೊಲೀಸರು ಮತ್ತು ಸಿಬ್ಬಂದಿ ಸುರಕ್ಷಿತವಾಗಿ ಮೇಲಕ್ಕೆ ಎಳೆದು ತಂದಿದ್ದಾರೆ.
