ವಿದೇಶಿ ದೇಣಿಗೆ ನಿಯಂತ್ರಣ ಬಿಗಿಗೊಳಿಸಲು ಸಜ್ಜಾದ ಕೇಂದ್ರ: ಮುಂದಿನ ವಾರವೇ ಸಂಸತ್‌ನಲ್ಲಿ ಎಫ್‌ಸಿಆರ್‌ಎ ಮಸೂದೆ ಮಂಡನೆ ಸಾಧ್ಯತೆ! | FCRA Bill

ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅವರು ಈ ಪ್ರಕ್ರಿಯೆಯ ನೇತೃತ್ವ ವಹಿಸಿದ್ದು, ಮಸೂದೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದ ವಿವಿಧ ರಾಜಕೀಯ ಪಕ್ಷಗಳು ಮತ್ತು ಕ್ರಿಶ್ಚಿಯನ್ ಸಂಘಟನೆಗಳೊಂದಿಗೆ ಸಮಾಲೋಚನೆ ನಡೆಸಿ ಅವರ ಆತಂಕಗಳನ್ನು ದೂರ ಮಾಡಿದ್ದಾರೆ. ಇದರ ಭಾಗವಾಗಿ ಅವರು ಸಂಸತ್ ಭವನದಲ್ಲಿ ಮಿಜೋರಾಂ ಮುಖ್ಯಮಂತ್ರಿ ಲಾಲ್ದುಹೋಮ ಅವರನ್ನು ಭೇಟಿ ಮಾಡಿ ಚರ್ಚೆ ನಡೆಸಿದರು. ಈ ಚರ್ಚೆಯು ತುಂಬಾ ಸಕಾರಾತ್ಮಕವಾಗಿದ್ದು, ಹೊಸ ಕಾನೂನು ಯಾವುದೇ ಹಿಂದಿನ ದಿನಾಂಕದಿಂದ ಜಾರಿಗೆ ಬರುವುದಿಲ್ಲ ಎಂದು ಗೃಹ ಸಚಿವರು ಸ್ಪಷ್ಟ ಭರವಸೆ ನೀಡಿದ್ದಾರೆ ಎಂದು ಲಾಲ್ದುಹೋಮ ತಿಳಿಸಿದ್ದಾರೆ.

ಈ ಮಸೂದೆಯಲ್ಲಿ ಪೂರ್ವಾನ್ವಯವಾಗಿ ಜಾರಿಗೊಳಿಸುವ ಯಾವುದೇ ಅವಕಾಶವಿಲ್ಲ ಮತ್ತು ಇದು ಮೂಲತಃ 2010ರಲ್ಲಿ ಯುಪಿಎ ಸರ್ಕಾರ ಜಾರಿಗೆ ತಂದ ಮಸೂದೆಯಂತೆಯೇ ಇದೆ. ಕ್ರಿಶ್ಚಿಯನ್ ಸಂಸ್ಥೆಗಳ ಬಗ್ಗೆ ಕೆಲವರು ಉದ್ದೇಶಪೂರ್ವಕವಾಗಿ ತಪ್ಪು ಕಲ್ಪನೆಗಳನ್ನು ಹರಡುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ದೇಶದಲ್ಲಿ ಕಳೆದ ವರ್ಷ ಸ್ವೀಕರಿಸಲಾದ ಒಟ್ಟು 17,000 ಕೋಟಿ ರೂಪಾಯಿ ವಿದೇಶಿ ದೇಣಿಗೆಯಲ್ಲಿ ಕೇವಲ 3,000 ಕೋಟಿ ರೂಪಾಯಿ ಮಾತ್ರ ಕ್ರಿಶ್ಚಿಯನ್ ಸಂಸ್ಥೆಗಳಿಗೆ ತಲುಪಿದೆ. ಆದ್ದರಿಂದ ಈ ಮಸೂದೆಯು ಯಾವುದೇ ನಿರ್ದಿಷ್ಟ ಸಮುದಾಯದ ಹಿತಾಸಕ್ತಿಗಳಿಗೆ ಧಕ್ಕೆ ತರುವುದಿಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಗೃಹ ಸಚಿವ ಅಮಿತ್ ಷಾ ಈ ಸಂಬಂಧ ಈಗಾಗಲೇ ಹಲವು ಕ್ರಿಶ್ಚಿಯನ್ ಸಂಘಟನೆಗಳ ಪ್ರತಿನಿಧಿಗಳನ್ನು ಭೇಟಿ ಮಾಡಿ ಸಮಾಧಾನಪಡಿಸಿದ್ದಾರೆ ಎಂದು ಉನ್ನತ ಸರ್ಕಾರಿ ಮೂಲಗಳು ತಿಳಿಸಿವೆ.

ಈ ಮಸೂದೆಯಲ್ಲಿ ಸೆಕ್ಷನ್ 14B, 16A ಮತ್ತು 16B ಗಳು ಮಾತ್ರ ಪ್ರಮುಖ ವಿವಾದದ ಕೇಂದ್ರಬಿಂದುವಾಗಿವೆ. ಸೆಕ್ಷನ್ 14B ಪ್ರಕಾರ, ಒಂದು ವೇಳೆ ಸಂಸ್ಥೆಯು ಎಫ್​​ಸಿಆರ್​​ಎ ನೋಂದಣಿ ನವೀಕರಣಕ್ಕೆ ಅರ್ಜಿ ಸಲ್ಲಿಸಲು ವಿಫಲವಾದರೆ, ಅರ್ಜಿ ತಿರಸ್ಕೃತಗೊಂಡರೆ ಅಥವಾ ಅವಧಿ ಮೀರಿದರೆ, ಆ ಸಂಸ್ಥೆಯ ಪ್ರಮಾಣಪತ್ರವು ರದ್ದಾಗಿದೆ ಎಂದು ಪರಿಗಣಿಸಲಾಗುತ್ತದೆ. ಇನ್ನು ಸೆಕ್ಷನ್ 16A ಮತ್ತು 16B ಗಳಲ್ಲಿ ಆಸ್ತಿಗಳನ್ನು ಸರ್ಕಾರಿ ಪ್ರಾಧಿಕಾರಕ್ಕೆ ಒಪ್ಪಿಸುವ ಕುರಿತು ಉಲ್ಲೇಖಿಸಲಾಗಿದೆ.

ಎಫ್​​ಸಿಆರ್​​ಎ ಪರವಾನಗಿ ರದ್ದಾದ ಅಥವಾ ಅವಧಿ ಮುಗಿದ ಸಂದರ್ಭದಲ್ಲಿ, ವಿದೇಶಿ ನಿಧಿಯಿಂದ ನಿರ್ಮಿಸಲಾದ ಶಾಲೆಗಳು, ಆಸ್ಪತ್ರೆಗಳು ಮತ್ತು ಸಮುದಾಯ ಕೇಂದ್ರಗಳಂತಹ ಆಸ್ತಿಗಳು ಸರ್ಕಾರದ ನಿಯಂತ್ರಣಕ್ಕೆ ಬರಲಿವೆ. ಒಂದು ವೇಳೆ ಸಂಸ್ಥೆಯು ನಿರ್ದಿಷ್ಟಾವಧಿಯೊಳಗೆ ಹೊಸ ಪರವಾನಗಿ ಪಡೆಯದಿದ್ದರೆ, ಆ ಆಸ್ತಿಗಳು ಶಾಶ್ವತವಾಗಿ ಸರ್ಕಾರದ ಸ್ವಾಧೀನಕ್ಕೆ ಹೋಗುತ್ತವೆ ಎಂಬ ಆತಂಕ ಕ್ರಿಶ್ಚಿಯನ್ ಸಂಘಟನೆಗಳಲ್ಲಿ ಮೂಡಿತ್ತು. ಹಳೆಯ ಎಫ್‌ಸಿಆರ್‌ಎ ನೋಂದಣಿಗಳು ರದ್ದಾಗಿರುವ ಮತ್ತು ಪ್ರಸ್ತುತ ಕೇವಲ ದೇಶೀಯ ನಿಧಿಗಳ ಮೂಲಕ ಮಾತ್ರ ಕಾರ್ಯನಿರ್ವಹಿಸುತ್ತಿರುವ ಸಂಸ್ಥೆಗಳ ಹಿಂದಿನ ಆಸ್ತಿಗಳನ್ನು ಸರ್ಕಾರ ವಶಪಡಿಸಿಕೊಳ್ಳಬಹುದು ಎಂಬ ಭಯವೂ ಅವರಲ್ಲಿತ್ತು.

ಆದರೆ ಸರ್ಕಾರದ ಉನ್ನತ ಮೂಲಗಳು ಈ ಎಲ್ಲಾ ಆತಂಕಗಳನ್ನು ತಳ್ಳಿಹಾಕಿವೆ. ಪ್ರಸ್ತಾವಿತ ಕಾನೂನು ಹಳೆಯ ಹೂಡಿಕೆಗಳನ್ನು ಅಥವಾ ಈಗಾಗಲೇ ರದ್ದಾಗಿರುವ ಹಿಂದಿನ ನೋಂದಣಿಗಳನ್ನು ಗುರಿಯಾಗಿಸಲು ಉದ್ದೇಶಿಸಿಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಒಂದು ವೇಳೆ ಯಾವುದೇ ಸಂಸ್ಥೆಯ ಎಫ್​​ಸಿಆರ್​​ಎ ಪರವಾನಗಿ ಅವಧಿ ಮುಗಿದರೆ, ಆಸ್ತಿಗಳು ದುರ್ಬಳಕೆಯಾಗದಂತೆ ತಡೆಯಲು ಒಂದು ಮಧ್ಯಂತರ ವ್ಯವಸ್ಥೆಯನ್ನು ಜಾರಿಗೆ ತರಲಾಗುತ್ತದೆ. ಮೂಲ ಸಂಸ್ಥೆಯು ಹೊಸ ಪರವಾನಗಿ ಪಡೆದ ತಕ್ಷಣವೇ ಆಸ್ತಿಗಳನ್ನು ಮರಳಿ ಹಸ್ತಾಂತರಿಸಲಾಗುತ್ತದೆ. ವಿದೇಶಿ ದೇಣಿಗೆಗಳ ಸರಿಯಾದ ನಿರ್ವಹಣೆಯನ್ನು ಉತ್ತೇಜಿಸುವುದೇ ಈ ಮಸೂದೆಯ ಮುಖ್ಯ ಉದ್ದೇಶವೇ ಹೊರತು ಯಾವುದೇ ಕ್ರಿಶ್ಚಿಯನ್ ಸಮುದಾಯಕ್ಕಾಗಲಿ ಅಥವಾ ನಿರ್ದಿಷ್ಟ ಗುಂಪಿಗಾಗಲಿ ತೊಂದರೆ ನೀಡುವುದಲ್ಲ ಎಂದು ಸರ್ಕಾರ ಭರವಸೆ ನೀಡಿದೆ.

ಕಳೆದ ಅಧಿವೇಶನದಲ್ಲಿ ಮಾರ್ಚ್ 25 ರಂದು ಲೋಕಸಭೆಯಲ್ಲಿ ಈ ಮಸೂದೆಯನ್ನು ಮಂಡಿಸಲಾಗಿದ್ದು, ಮುಂಬರುವ ವಾರದಲ್ಲಿ ಸರ್ಕಾರವು ಇದನ್ನು ಚರ್ಚೆ ಹಾಗೂ ಅಂಗೀಕಾರಕ್ಕಾಗಿ ಮಂಡಿಸಲು ಸಿದ್ಧತೆ ನಡೆಸಿದೆ. ಈ ಚರ್ಚೆಯ ಸಂದರ್ಭದಲ್ಲಿ ಗೃಹ ಸಚಿವ ಅಮಿತ್ ಷಾ ಉತ್ತರಿಸಲಿದ್ದು, ಮಸೂದೆಯ ಕುರಿತು ಎತ್ತಲಾಗಿರುವ ಎಲ್ಲಾ ಅನುಮಾನಗಳು ಮತ್ತು ಆತಂಕಗಳಿಗೆ ಅಧಿಕೃತವಾಗಿ ಸ್ಪಷ್ಟನೆ ನೀಡುವ ನಿರೀಕ್ಷೆಯಿದೆ(ಏಜೆನ್ಸೀಸ್​).