ಟೈಗರ್ ಶ್ರಾಫ್ ಮೇಲೆ ಗುಂಡಿನ ದಾಳಿ ಪ್ರಕರಣ: 'ರಾಪಿಡೋ ರೈಡರ್' ಸೋಗಿನಲ್ಲಿದ್ದ ಬಿಷ್ಣೋಯ್ ಗ್ಯಾಂಗ್ ಸ್ಲೀಪರ್ ಸೆಲ್ ಅರೆಸ್ಟ್! Bishnoi Gang

ಮುಂಬೈ: ಬಾಲಿವುಡ್​ ನಟ, ಆಕ್ಷನ್​ ಹೀರೋ ಟೈಗರ್​ ಶ್ರಾಫ್​ ಮೇಲೆ ನಡೆದ ಗುಂಡಿನ ದಾಳಿ ಘಟನೆಗೆ ಇಡೀ ಚಿತ್ರರಂಗ ಬೆಚ್ಚಿಬಿದ್ದಿರುವುದು ನಿಜವಾಗಿದೆ. ಜುಹುವಿನಲ್ಲಿರುವ ಫುಟ್​ಬಾಲ್​ ಕ್ಲಬ್​​ನಲ್ಲಿ ಆಟ ಮುಗಿಸಿಕೊಂಡು ಕಾರನ್ನೇರಿ ಹೊರಟಿದ್ದ ನಟನೆ ಮೇಲೆ ಇಬ್ಬರು ಆಗಂತುಕರು ಒಮ್ಮೆಲೇ ಗುಂಡಿನ ದಾಳಿ ನಡೆಸಿದ್ದರು. ಈ ಘಟನೆಯಲ್ಲಿ ನಟ ಟೈಗರ್​ಗೆ ಹೆಚ್ಚೇನು ತೊಂದರೆಯಾಗದಿದ್ದರೂ, ಕಾರಿನ ಡ್ರೈವರ್​ ಮತ್ತು ಪಕ್ಕದಲ್ಲಿದ್ದ ಇನ್ನೊರ್ವ ವ್ಯಕ್ತಿ ತೀವ್ರ ಗಾಯಗೊಂಡಿದ್ದರು.

ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಮುಂಬೈ ಪೊಲೀಸರು, ಕೆಲವೇ ದಿನಗಳಲ್ಲಿ ಮೂವರು ಪ್ರಮುಖ ಆರೋಪಿಗಳನ್ನು ಬಂಧಿಸುವುದರಲ್ಲಿ ಯಶಸ್ವಿಯಾಗಿದ್ದು, ವಿಚಾರಣೆ ಮುಂದುವರಿದಿದೆ. ಪ್ರಸ್ತುತ ನಡೆಯುತ್ತಿರುವ ಪೊಲೀಸ್​ ವಿಚಾರಣೆಯಲ್ಲಿ, ಪ್ರಮುಖ ಆರೋಪಿ, ರಿತಿಕ್​ ಕುಲಕರ್ಣಿ ಅಲಿಯಾಸ್​ ರೋಶನ್​ ಬಗ್ಗೆ ಕೆಲ ಶಾಕಿಂಗ್​ ಮಾಹಿತಿಗಳು ಬಯಲಾಗಿದೆ.

'ರಾಪಿಡೋ' ಸೋಗಿನಲ್ಲಿ ಕೊಲೆಗೆ ಸ್ಕೇಚ್​!

ಮುಂಬೈ ಪೊಲೀಸರ ವಶದಲ್ಲಿರುವ ಆರೋಪಿ, ರಿತಿಕ್​ ಕುಲಕರ್ಣಿ ಅಲಿಯಾಸ್​ ರೋಶನ್​ ಮೂಲತಃ ಬಿಹಾರದ ಬೇಗುಸರಾಯ್ ನಿವಾಸಿಯಾಗಿದ್ದಾನೆ. ಇವನು ಜುಹು, ಗೊರೆಗಾಂ ವ್ಯಾಪ್ತಿಯಲ್ಲಿ ರಾಪಿಡೋ ಬೈಕ್​ ಚಾಲಕನ ಕೆಲಸ ಮಾಡುತ್ತಿದ್ದಾಗಿ ತಿಳಿದುಬಂದಿದೆ.

ಆದರೆ, ಇವನು ಈ ರಾಪಿಡೋ ಬೈಕ್​ಅನ್ನು ಸೆಲೆಬ್ರಿಟಿಗಳ ಮನೆಗಳ ಹತ್ತಿರಕ್ಕೆ ಹೋಗಿ ಅಲ್ಲಿಯ ಫೋಟೊ ಹಾಗೂ ವಿಡಿಯೋಗಳನ್ನು ಕ್ಲಿಕ್​ಕಿಸಿಕೊಂಡು, ಬಿಷ್ಣೋಯ್​ ಗ್ಯಾಂಗ್​ಗೆ ರವಾನಿಸುತ್ತಿದ್ದಾಗಿ ಹೇಳಲಾಗುತ್ತಿದೆ. ಒಂದರ್ಥದಲ್ಲಿ ಈ ರಿತಿಕ್​ ಕುಲಕರ್ಣಿ ಬಿಷ್ಣೋಯ್​ ಗ್ಯಾಂಗ್​ನ ಸ್ಲೀಪರ್​ ಸೆಲ್​ ಆಗಿದ್ದ ಎಂದೂ ಹೇಳಬಹುದಾಗಿದೆ.

ನಂತರ, ಟೈಗರ್​ ಶ್ರಾಫ್​ ಮೇಲೆ ದಾಳಿ ಮಾಡುವುದು ನಿಶ್ಚಯವಾದ ಬಳಿಕ ಇವನು ಅಂಧೇರಿಯಲ್ಲಿ ಬಾಡಿಗೆ ಮನೆ ಮಾಡಿಕೊಂಡಿದ್ದ, ಈ ಸಮಯದಲ್ಲಿ ಇವನು ಮುಂಬೈ ವಿಳಾಸವಿರುವ ನಕಲಿ ಆಧಾರ್​ ಕಾರ್ಡ್​ವೊಂದನ್ನು ಪಡೆದುಕೊಂಡಿದ್ದ ಎಂಬ ಶಾಕಿಂಗ್​ ಸಂಗತಿ ಬಯಲಾಗಿದೆ. ಇವನು ಮಾಡುತ್ತಿದ್ದ ಕೆಲಸಕ್ಕಾಗಿ ಬಿಷ್ಣೋಯ್​ ಗ್ಯಾಂಗ್​ ಇವನಿಗೆ ಹಣಕಾಸಿನ ನೆರವನ್ನು ನೀಡುತ್ತಿದ್ದು, ಅವರು ಕೊಡುತ್ತಿದ್ದ ಹಣದಲ್ಲಿ ತನ್ನ ನಿತ್ಯದ ಖರ್ಚನ್ನು ನಿರ್ವಹಿಸುತ್ತಿದ್ದಾಗಿ ರಿತಿಕ್​ ಕುಲಕರ್ಣಿ ಪೊಲೀಸರಲ್ಲಿ ಹೇಳಿಕೆ ನೀಡಿದ್ದಾಗಿ ಮಾಹಿತಿ ಲಭ್ಯವಾಗಿದೆ.

ಮುಂದುವರಿದ ತನಿಖೆ!

ಇನ್ನು ಈ ರಿತಿಕ್​ ಕುಲಕರ್ಣಿ ಜತೆಗೆ ಹರಿಯಾಣದ ರಿಹಾನ್​ ಅಲಿಯಾಸ್​ ಸುಕ್ಕಾ ಮತ್ತು ಪೂಲ್​ ಸಿಂಗ್​ ಎಂಬಾತನನ್ನು ಪೊಲೀಸರು ವಶಕ್ಕೆ ಪಡೆದಿದ್ದರು. ಇವರನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ ನಂತರ, ಹರಿಯಾಣದ ಸೋನಿಪತ್‌ನ ಕುನಾಲ್ (21), ಸುಮಿತ್​ (19), ರಾಧಾ (23) ಮತ್ತು ಬಬಿತಾ (23) ಎನ್ನುವವರನ್ನು ಅರೆಸ್ಟ್​ ಮಾಡಲಾಗಿದೆ. ಮ್ಯಾಜಿಸ್ಟ್ರೇಟ್​ ನ್ಯಾಯಲಯ ಅಕ್ಟೋಬರ್ 31 ರ ವರೆಗೆ ಇವರನ್ನು ಪೊಲೀಸ್​ ಕಸ್ಟಡಿಗೆ ನೀಡಿದ್ದು, ಅಲ್ಲಿವರೆಗೆ ಪೊಲೀಸರು ಅವರ ಭಾಷೆಯಲ್ಲಿ ತನಿಖೆ ನಡೆಸಿ, ಸತ್ಯಾಸತ್ಯೆಯನ್ನು ಬಯಲಿಗೆಳೆಯಲಿದ್ದಾರೆ, (ಏಜೆನ್ಸೀಸ್​).