ನವದೆಹಲಿ: ಬೆಳಗಿನ ವ್ಯಾಯಾಮದ ನಡಿಗೆ ಮುಗಿಸಿ ನೆಮ್ಮದಿಯಾಗಿ ಮನೆಗೆ ಮರಳುತ್ತಿದ್ದ ಹಿರಿಯ ದಂಪತಿ ಮೇಲೆ ಅತಿವೇಗದಲ್ಲಿ ಕಾರೊಂದು ಅಪ್ಪಳಿಸಿರುವ ಭಯಾನಕ ಘಟನೆ ಪಶ್ಚಿಮ ದೆಹಲಿಯ ಕೀರ್ತಿ ನಗರದಲ್ಲಿ ನಡೆದಿದೆ. ಇಬ್ಬರು ಹಿರಿಯ ಜೀವಗಳು ರಸ್ತೆಯಲ್ಲಿ ಗಾಳಿಯಲ್ಲಿ ಎಸೆಯಲ್ಪಟ್ಟು ಗಂಭೀರವಾಗಿ ಗಾಯಗೊಂಡಿರುವ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಸಾರ್ವಜನಿಕರಲ್ಲಿ ತೀವ್ರ ಆಕ್ರೋಶ ಮೂಡಿಸಿದೆ.
ವಿಡಿಯೋನಲ್ಲೇನಿದೆ?
ಪೊಲೀಸ್ ಮೂಲಗಳ ಮಾಹಿತಿಯ ಪ್ರಕಾರ, ದಯಾನಂದ್ ಟಂಗ್ರಾ (79) ಹಾಗೂ ಅವರ ಧರ್ಮಪತ್ನಿ ಕುಸುಮ್ ಟಂಗ್ರಾ (71) ಗಾಯಗೊಂಡ ದಂಪತಿಗಳಾಗಿದ್ದಾರೆ. ಇವರು ಕೀರ್ತಿ ನಗರದ ಆರ್ಯ ಸಮಾಜ ಮಂದಿರದ ಬಳಿ ಎಂದಿನಂತೆ ತಮ್ಮ ಬೆಳಗಿನ ನಡಿಗೆಯನ್ನು ಮುಗಿಸಿ ಬೆಳಿಗ್ಗೆ 9:30ರ ಸುಮಾರಿಗೆ ಮನೆಗೆ ಹಿಂತಿರುಗುತ್ತಿದ್ದರು.
ಆಗ ಅದೇ ರಸ್ತೆಯಲ್ಲಿ ಬಂದ ಬಿಳಿ ಬಣ್ಣದ ಹ್ಯುಂಡೈ ಕ್ರೆಟಾ ಕಾರು, ಇವರಿಬ್ಬರಿಗೂ ಹಿಂದಿನಿಂದ ವೇಗವಾಗಿ ಬಂದು ಡಿಕ್ಕಿ ಹೊಡೆದಿದೆ. ಈ ಡಿಕ್ಕಿಯ ರಭಸ ಎಷ್ಟು ಭೀಕರವಾಗಿತ್ತೆಂದರೆ, ದಂಪತಿ ಇಬ್ಬರೂ ಗಾಳಿಯಲ್ಲಿ ಹಾರಿ ದೂರಕ್ಕೆ ಬಿದ್ದಿದ್ದಾರೆ. ಪತ್ನಿ ಕುಸುಮ್ ವಿದ್ಯುತ್ ಕಂಬದ ಬಳಿ ಬಿದ್ದರೆ, ಪತಿ ದಯಾನಂದ್ ರಸ್ತೆಯ ಮತ್ತೊಂದು ಕಡೆಗೆ ಬಿಸಾಡಲ್ಪಟ್ಟಿದ್ದಾರೆ.
