ಅಧಿಕಾರಿಗಳ 'ಬಂಧನ' ಅಧಿಕಾರಕ್ಕೆ ಮೂಗುದಾರ!
ಸಾಮಾನ್ಯವಾಗಿ ವ್ಯಾಪಾರಿಗಳನ್ನು ಅತಿ ಹೆಚ್ಚು ಕಾಡುತ್ತಿದ್ದ ವಿಷಯವೆಂದರೆ ಜಿಎಸ್‌ಟಿ ಅಧಿಕಾರಿಗಳಿಗಿದ್ದ ಅರೆಸ್ಟ್ ಮಾಡುವ ಅಧಿಕಾರ. ಕೇಂದ್ರ ಜಿಎಸ್‌ಟಿ ಕಾಯ್ದೆಯ ಸೆಕ್ಷನ್ 69 ರ ಅಡಿಯಲ್ಲಿ, ತೆರಿಗೆ ವಂಚನೆ ಅಥವಾ ನಕಲಿ ಬಿಲ್ ಅನುಮಾನ ಬಂದ ಕೂಡಲೇ ಆಯುಕ್ತರಿಗೆ ಬಂಧನಕ್ಕೆ ಆದೇಶಿಸುವ ಅಧಿಕಾರವಿತ್ತು. ತೆರಿಗೆ ವಿವರಣೆ ಅಥವಾ ನಿಯಮಗಳ ಅರ್ಥೈಸುವಿಕೆಯಲ್ಲಿ ಸಣ್ಣ ಗೊಂದಲವಾದರೂ ಉದ್ಯಮಿಗಳು ಜೈಲುಪಾಲಾಗುವ ಆತಂಕದಲ್ಲಿರುತ್ತಿದ್ದರು.
ಆದರೆ ನೂತನ ಸುಧಾರಣೆಯ ಪ್ರಕಾರ, ಈ ಬಂಧನದ ಅಧಿಕಾರದ ಬಳಕೆಗೆ ಕಟ್ಟುನಿಟ್ಟಿನ ಮಿತಿ ಹೇರಲಾಗುತ್ತಿದೆ. ನಿಜವಾದ ವಂಚನೆ ಮತ್ತು ಸಾಮಾನ್ಯ ವ್ಯಾಪಾರ ದೋಷಗಳನ್ನು ಪ್ರತ್ಯೇಕಿಸಿ, ಕೇವಲ ತೆರಿಗೆ ವಸೂಲಿ, ಬಡ್ಡಿ ಮತ್ತು ದಂಡದ ಮೂಲಕವೇ ಪ್ರಕರಣಗಳನ್ನು ಇತ್ಯರ್ಥಪಡಿಸಲು ಆದ್ಯತೆ ನೀಡಲಾಗುತ್ತದೆ. ಇದರಿಂದ ಪ್ರಾಮಾಣಿಕ ವ್ಯಾಪಾರಿಗಳು ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗಿದೆ.
ಕಂಪನಿಗಳಿಗೆ ಗುಡ್ ನ್ಯೂಸ್: ನೌಕರರ ಹೆಲ್ತ್ ಇನ್ಶೂರೆನ್ಸ್‌ಗೆ ITC ಲಾಭ!
ಉದ್ಯೋಗಿಗಳನ್ನು ಹೊಂದಿರುವ ಕಂಪನಿಗಳಿಗೆ ಮತ್ತೊಂದು ದೊಡ್ಡ ರಿಲೀಫ್ ಸಿಕ್ಕಿದೆ. ಕಂಪನಿಗಳು ತಮ್ಮ ಉದ್ಯೋಗಿಗಳಿಗೆ ನೀಡುವ ಗ್ರೂಪ್ ಹೆಲ್ತ್ ಇನ್ಶೂರೆನ್ಸ್ ಮತ್ತು ಜೀವ ವಿಮಾ ಪಾಲಿಸಿಗಳ ವೆಚ್ಚದ ಮೇಲೆ ಪಾವತಿಸುವ ಜಿಎಸ್‌ಟಿಗೆ ಇನ್ನು ಮುಂದೆ 'ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್' (ITC) ಸಿಗಲಿದೆ.
ವಿಶೇಷವಾಗಿ ಐಟಿ (IT), ಬ್ಯಾಂಕಿಂಗ್, ಹಣಕಾಸು ಹಾಗೂ ಮ್ಯಾನುಫ್ಯಾಕ್ಚರಿಂಗ್ ಕ್ಷೇತ್ರಗಳಲ್ಲಿ ಸಾವಿರಾರು ನೌಕರರಿರುತ್ತಾರೆ. ಅವರ ವಿಮೆಗೆ ಕಂಪನಿಗಳು ಕೋಟ್ಯಂತರ ರೂಪಾಯಿ ವ್ಯಯಿಸುತ್ತವೆ. ಈಗ ಆ ತೆರಿಗೆ ಮೊತ್ತಕ್ಕೆ ಕ್ರೆಡಿಟ್ ಸಿಗುವುದರಿಂದ ಕಂಪನಿಗಳ ಹೊರೆ ಗಣನೀಯವಾಗಿ ತಗ್ಗಲಿದೆ.
