ಗೋಲ್ಡ್ ಟೀತ್ ಹುಚ್ಚಾಟ
ಜನರ ಕಷ್ಟದ ದುಡ್ಡನ್ನು ಕೊಳ್ಳೆ ಹೊಡೆದ ಅಜಯ್ ಶಿಂಜಿನ್, ಆ ಹಣದಿಂದ ದುಬೈನಲ್ಲಿ ಅತ್ಯಂತ ಐಷರಾಮಿ ಜೀವನವನ್ನು ನಡೆಸುತ್ತಿದ್ದನು. ಅಷ್ಟೇ ಅಲ್ಲದೆ, ಬಂಗಾರದ ಹಲ್ಲುಗಳು ಸೇರಿದಂತೆ ಹಲವಾರು ದುಬಾರಿ ಅಲಂಕಾರಿಕ ವಸ್ತುಗಳನ್ನು ಖರೀದಿಸಿ ಮೆರೆದಾಡಿದ್ದನು. ಸದ್ಯ ಪೊಲೀಸರು ಈ ಎಲ್ಲಾ ಐಷರಾಮಿ ವಸ್ತುಗಳನ್ನು ಮತ್ತು ಚಿನ್ನದ ಹಲ್ಲುಗಳನ್ನು ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.
ಈ ಹಗರಣದ ಕರಾಳ ಅಧ್ಯಾಯವು 2021ರ ನವೆಂಬರ್ ಮೊದಲ ವಾರದಲ್ಲಿ ಆರಂಭವಾಯಿತು. ಟೆಲಿಕಾಂ ಕಂಪನಿ ಬಿಟಿ (BT) ವ್ಯವಸ್ಥೆಗಳಲ್ಲಿ ಸೈಬರ್ ವಂಚನೆ ನಡೆಯುತ್ತಿರುವುದನ್ನು ಪತ್ತೆ ಹಚ್ಚಿದ ಬಳಿಕ ಪೊಲೀಸರು ತನಿಖೆಯನ್ನು ತೀವ್ರಗೊಳಿಸಿದರು. ಗ್ರಾಹಕರ ಮೊಬೈಲ್ ನಂಬರ್‌ಗಳನ್ನು ಕಿರಾತಕರು ತಮ್ಮ ನಿಯಂತ್ರಣದಲ್ಲಿರುವ ಬೇರೆ ಸಿಮ್ ಕಾರ್ಡ್‌ಗಳಿಗೆ ಅಕ್ರಮವಾಗಿ ವರ್ಗಾಯಿಸುತ್ತಿರುವುದು ತನಿಖೆಯ ವೇಳೆ ದೃಢಪಟ್ಟಿದೆ.
ಸಿಮ್ ಸ್ವಾಪಿಂಗ್ ಎಂದರೆ ಬೇರೆಯವರ ಫೋನ್ ನಂಬರ್ ಅನ್ನು ಕಳ್ಳರ ತಮ್ಮದೇ ಕಾರ್ಡ್‌ಗೆ ವರ್ಗಾಯಿಸಿಕೊಂಡು, ಆ ಮೂಲಕ ನಂಬರ್‌ಗೆ ಲಿಂಕ್ ಆಗಿರುವ ಬ್ಯಾಂಕ್ ಹಾಗೂ ಡಿಜಿಟಲ್ ಖಾತೆಗಳ ನಿಯಂತ್ರಣವನ್ನು ಪಡೆದುಕೊಳ್ಳುವ ಒಂದು ವಂಚನಾ ಜಾಲವಾಗಿದೆ. ಇದರ ಮೂಲಕ ಅಪರಾಧಿಗಳು ಕೇವಲ ಕೆಲವೇ ನಿಮಿಷಗಳಲ್ಲಿ ಸಂತ್ರಸ್ತರ ಖಾತೆಗಳಲ್ಲಿದ್ದ ಕ್ರಿಪ್ಟೋಕರೆನ್ಸಿ ಸೇರಿದಂತೆ ಡಿಜಿಟಲ್ ಆಸ್ತಿಯನ್ನು ಸಂಪೂರ್ಣವಾಗಿ ಕದಿಯುವ ತಂತ್ರವನ್ನು ಅನುಸರಿಸುತ್ತಿದ್ದರು.
