ಬಹುಕೋಟಿ ವಂಚನೆ ಪ್ರಕರಣ: ಸಹಕಾರಿ ಬ್ಯಾಂಕ್​ನ ಮಾಜಿ ಸಿಇಒ ಸುಜಾತಾ ಮಹಾಜನ್​ಗೆ ಜಾಮೀನು ಮಂಜೂರು! Sujata Mahajan

Sujata Mahajan : ಬಹುಕೋಟಿ ಹಣಕಾಸು ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಯವತ್ಮಾಲ್​ ಜಿಲ್ಲೆಯ ಬಾಬಾಜಿ ಡೇಟ್ ಮಹಿಳಾ ಸಹಕಾರಿ ಬ್ಯಾಂಕ್ ಲಿಮಿಟೆಡ್‌ನ ಮಾಜಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಸುಜಾತಾ ವಿಲಾಸ್ ಮಹಾಜನ್ ಅವರಿಗೆ ಬಾಂಬೆ ಹೈಕೋರ್ಟ್‌ನ ನಾಗ್ಪುರ ಪೀಠ ಶುಕ್ರವಾರ ( ಜುಲೈ11 ) ಜಾಮೀನು ಮಂಜೂರು ಮಾಡಿದೆ. ಬಂಧನದ ಸಂದರ್ಭದಲ್ಲಾದ ಕಾರ್ಯವಿಧಾನದ ಲೋಪಗಳನ್ನು ಉಲ್ಲೇಖಿಸಿ ನ್ಯಾಯಾಲಯವು ಅವರ ಬಂಧನವನ್ನು ಕಾನೂನುಬಾಹಿರ ಎಂದು ಪರಿಗಣಿಸಿ ತೀರ್ಪು ನೀಡಿದೆ.

ನ್ಯಾಯಮೂರ್ತಿ ಊರ್ಮಿಳಾ ಜೋಶಿ-ಫಾಲ್ಕೆ ಅವರ ಏಕಸದಸ್ಯ ಪೀಠ, ಭಾರತದ ಸಂವಿಧಾನದ 21ನೇ ವಿಧಿಯ ಅಡಿಯಲ್ಲಿ ಪ್ರತಿಪಾದಿಸಲಾದ 'ಜೀವನ ಮತ್ತು ಸ್ವಾತಂತ್ರ್ಯ'ದ ಹಕ್ಕು ಬಂಧನದಲ್ಲಿರುವ ಆರೋಪಿಗೂ ಅನ್ವಯವಾಗುತ್ತದೆ. ಶಂಕಿತನೊಬ್ಬ ತನಿಖೆ ವೇಳೆ ಆರೋಪಿಯಾಗಿ ಮತ್ತು ನಂತರ ವಿಚಾರಣೆಯಲ್ಲಿ ಅಪರಾಧಿಯಾದವನು ಕೂಡ ಇದಕ್ಕೆ ಹೊರತಾಗಿಲ್ಲ ಎಂದರು.

ಕಾನೂನು ಸ್ಥಾಪಿಸಿದ ಕಾರ್ಯವಿಧಾನದ ಪ್ರಕಾರ ನಾಗರಿಕನ ಜೀವನ ಮತ್ತು ಸ್ವಾತಂತ್ರ್ಯದ ಹಕ್ಕಿನ ಉಲ್ಲಂಘನೆಯಾಗದಂತೆ ನೋಡಿಕೊಳ್ಳುವುದು ರಾಜ್ಯ ಮತ್ತು ನ್ಯಾಯಾಲಯದ ಬಾಧ್ಯತೆಯಾಗಿದೆ. ಇದನ್ನು ವಂಚಿತಗೊಳಿಸಲಾಗುವುದಿಲ್ಲ ಎಂದು ನ್ಯಾಯಮೂರ್ತಿ ಹೇಳಿದರು.

ಮಹಾಜನ್ ಅವರನ್ನು 2024, ಸೆಪ್ಟೆಂಬರ್ 30ರಂದು ಹಣಕಾಸು ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂಧಿಸಲಾಯಿತು. ಸಾಲ ವಿತರಣೆಯಲ್ಲಿ ಅಕ್ರಮಗಳು ನಡೆದಿರುವುದು ಲೆಕ್ಕಪರಿಶೋಧನೆಯಲ್ಲಿ ಬಹಿರಂಗವಾಗಿದ್ದು, ಬ್ಯಾಂಕಿನ ನಿರ್ದೇಶಕರ ಮಂಡಳಿಯಿಂದ ಸರಿಯಾದ ಅನುಮೋದನೆ ಇಲ್ಲದೆ ಮಹಾಜನ್ ಅವರ ಪತಿ ಮತ್ತು ಸಂಬಂಧಿಕರು 1.88 ಕೋಟಿ ರೂ.ಗಳ ಸಾಲವನ್ನು ಪಡೆದಿದ್ದಾರೆ ಎಂದು ಆರೋಪಿಸಲಾಗಿದೆ. ಒಟ್ಟು ಹಗರಣದ ಮೌಲ್ಯ 242 ಕೋಟಿ ರೂ.ಗಳಿಗೂ ಹೆಚ್ಚು ಎಂದು ವರದಿಯಾಗಿದೆ.

ಇದನ್ನೂ ಓದಿ: ಹೊಸ ಚಿಕನ್​ ರೆಸಿಪಿ ಟ್ರೈ ಮಾಡಲು ಬಯಸುತ್ತಿದ್ದೀರಾ? ಹಾಗಾದ್ರೆ ಇಲ್ಲಿದೆ ರುಚಿಕರ ನೇಪಾಳಿ ಸ್ಟೈಲ್​ ಚಿಕನ್​ ಕರಿ! Sunday Special

ತನಿಖೆಯ ಸಮಯದಲ್ಲಿ ಮಹಾಜನ್ ಆರ್ಥಿಕ ಅಪರಾಧದಲ್ಲಿ ಭಾಗಿಯಾಗಿರುವುದು ಬಹಿರಂಗವಾಗಿದೆ ಎಂದು ನ್ಯಾಯಾಲಯ ಒಪ್ಪಿಕೊಂಡಿದ್ದು, ಆದರೂ ಸೂರ್ಯಾಸ್ತದ ನಂತರ ಅವರ ಕುಟುಂಬಸ್ಥರಿಗೂ ತಿಳಿಸದೆ ಅವರ ಬಂಧನ ಮಾಡಿರುವುದು ಕಾನೂನು ಕಾರ್ಯವಿಧಾನದ ಉಲ್ಲಂಘನೆಯಾಗಿದೆ. ಈ ಹಿನ್ನಲೆಯಲ್ಲಿ ನ್ಯಾಯಾಲಯವು ಬಂಧನವನ್ನು ಕಾನೂನುಬಾಹಿರವೆಂದು ಪರಿಗಣಿಸಿತು.

ಮಹಾಜನ್ ಪರ ವಾದ ಮಂಡಿಸಿದ ಹಿರಿಯ ವಕೀಲ ಎಸ್.ವಿ. ಮನೋಹರ್, ಆರೋಪಪಟ್ಟಿಯಲ್ಲಿ ಮಹಾಜನ್ ಪಾತ್ರದ ಬಗ್ಗೆ ನೇರ ಪುರಾವೆಗಳಿಲ್ಲ ಎಂದು ವಾದಿಸಿದರು. ಅವರ ಪತಿಗೆ ಸಂಬಂಧಿಸಿದ ಬಾಕಿ ಸಾಲಗಳನ್ನು ಈಗಾಗಲೇ ಮರುಪಾವತಿಸಲಾಗಿದೆ ಎಂದು ಎತ್ತಿ ತೋರಿಸಿದರು. ಕಾರ್ಯವಿಧಾನದ ನ್ಯೂನತೆಗಳನ್ನು ಒತ್ತಿ ಹೇಳಿದ ಅವರು, ಸೂರ್ಯಾಸ್ತದ ನಂತರ ಮಹಾಜನ್ ಅವರನ್ನು ಬಂಧಿಸುವುದು ಮತ್ತು ಅವರ ಸಂಬಂಧಿಕರಿಗೆ ತಿಳಿಸಲು ವಿಫಲವಾದದ್ದು ಅವರ ಮೂಲಭೂತ ಹಕ್ಕುಗಳನ್ನು ಉಲ್ಲಂಘಿಸುತ್ತದೆ ಎಂದು ಹೇಳಿದರು.

ಜಾಮೀನನ್ನು ವಿರೋಧಿಸಿದ ಪಬ್ಲಿಕ್ ಪ್ರಾಸಿಕ್ಯೂಟರ್ ಡಿ.ವಿ. ಚವ್ಹಾಣ್, ಮಹಾಜನ್ ಅವರ ಸೂಕ್ತ ಅನುಮತಿಯಿಲ್ಲದೆ ಸಾಲ ಮಂಜೂರು ಮತ್ತು ವಿತರಣೆಯಲ್ಲಿ ಅವರ ಪಾತ್ರವನ್ನು ಬಹಿರಂಗಪಡಿಸಿದೆ ಎಂದು ವಾದಿಸಿದರು. ಈ ಪ್ರಕರಣವನ್ನು ಸುಮಾರು 37,000 ಠೇವಣಿದಾರರ ಮೇಲೆ ಪರಿಣಾಮ ಬೀರುವ ಗಂಭೀರ ಆರ್ಥಿಕ ಅಪರಾಧ ಎಂದು ಅವರು ಬಣ್ಣಿಸಿದರು.

ನ್ಯಾಯಾಲಯವು ಮಹಾಜನ್ ಬಂಧನಕ್ಕೆ ಸಂಬಂಧಿಸಿದ ದಾಖಲೆಗಳಲ್ಲಿನ ವ್ಯತ್ಯಾಸಗಳು ಮತ್ತು ಅವರ ಕುಟುಂಬದೊಂದಿಗೆ ಸಂವಹನದ ಕೊರತೆಯನ್ನು ಗಮನಿಸಿ, ಈ ಕಾರ್ಯವಿಧಾನದ ಉಲ್ಲಂಘನೆಗಳು ಬಂಧನವನ್ನು ಕಾನೂನುಬಾಹಿರವೆಂದು ತೀರ್ಮಾನಿಸಿತು. ಜಾಮೀನು ಮಂಜೂರು ಮಾಡಿದ ಹೈಕೋರ್ಟ್, ಮಹಾಜನ್ ಅವರಿಗೆ ನಡೆಯುತ್ತಿರುವ ತನಿಖೆಗೆ ಸಹಕರಿಸಲು, ನ್ಯಾಯಾಲಯದ ಎಲ್ಲಾ ವಿಚಾರಣೆಗಳಿಗೆ ಹಾಜರಾಗಲು ಮತ್ತು ಅವರ ಪಾಸ್‌ಪೋರ್ಟ್ ಅನ್ನು ಒಪ್ಪಿಸಲು ನಿರ್ದೇಶಿಸಿತು. (ಏಜನ್ಸೀಸ್)

https://www.vijayavani.net/40-year-old-russian-woman-found-living-in-remote-karnataka-cave-with-two-kids-rescued

https://www.vijayavani.net/air-india-crash-expert-claims-pilot-may-have-deliberately-crashed-air-india-flight

https://www.vijayavani.net/cooling-glasses-slow-motion-and-laughs-rajinikanths-funny-speech-wins-hearts-at-velpari-event