ವೆಲ್ಲಿಂಗ್ಟನ್: ನ್ಯೂಜಿಲೆಂಡ್ ಮಹಿಳಾ ಕ್ರಿಕೆಟ್ ತಂಡದ ಸ್ಟಾರ್ ಆಟಗಾರ್ತಿಯರು ಹಾಗೂ ಸಲಿಂಗಿ ದಂಪತಿಯಾಗಿರುವ ಆ್ಯಮಿ ಸ್ಯಾಟರ್ತ್ವೈಟ್ ಮತ್ತು ಲಿಯಾ ತಹುಹು ಮೊದಲ ಮಗುವಿಗೆ ಜನ್ಮ ನೀಡಿರುವ ಮಾಹಿತಿಯನ್ನು ಗುರುವಾರ ಬೆಳಗ್ಗೆ ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದು, ಮಗುವಿನ ಕೈ ಹಿಡಿದುಕೊಂಡಿರುವ ಫೋಟೋವನ್ನು ಪೋಸ್ಟ್ ಮಾಡಿರುವ ಲಿಯಾ ತಹುಹು, ನಾನು ಮತ್ತು ಆ್ಯಮಿ ಜನವರಿ 13ರಂದು ಗ್ರೇಸ್ ಮರಿಯಾ ಸ್ಯಾಟರ್ತ್ವೈಟ್ ಅನ್ನು ಬರಮಾಡಿಕೊಂಡಿದ್ದೇವೆ. ನಾವು ಕೃತಜ್ಞರಾಗಿದ್ದು, ಇದಕ್ಕಿಂತ ಸಂತೋಷ ಬೇರೆ ಏನಿದೆ ಎಂದು ಬರೆದುಕೊಂಡಿದ್ದಾರೆ.
ಅಂದಹಾಗೆ ಆ್ಯಮಿ ಮತ್ತು ಲಿಯಾ 2014ರಲ್ಲಿ ಎಂಗೇಜ್ಮೆಂಟ್ ಮಾಡಿಕೊಂರು. ಬಳಿಕ 2017ರಲ್ಲಿ ವಿವಾಹವಾದರು. 2013ರಿಂದ ಸಲಿಂಗಿ ವಿವಾಹವನ್ನು ನ್ಯೂಜಿಲೆಂಡ್ ಕಾನೂನುಬದ್ಧಗೊಳಿಸಿದೆ. 2010ರಿಂದಲೂ ಒಟ್ಟಿಗೆ ಇರುವ ಆ್ಯಮಿ ಮತ್ತು ಲಿಯಾ ತಮ್ಮ ಸಂಬಂಧವನ್ನು ಹೊರಜಗತ್ತಿಗೆ ತಿಳಿಸಲು ಹೆಚ್ಚು ಸಮಯ ತೆಗೆದುಕೊಳ್ಳಲಿಲ್ಲ.
ಮಹಿಳಾ ಕ್ರಿಕೆಟ್ನಲ್ಲಿ ಆ್ಯಮಿ ಮತ್ತು ಲಿಯಾ ಮೊದಲ ಸಲಿಂಗಿ ದಂಪತಿ ಎನಿಸಿಕೊಂಡಿದ್ದಾರೆ. ಇದೀಗ ಇವರಿಬ್ಬರೇ ಅಲ್ಲ. ಕಳೆದ ವರ್ಷ ನ್ಯೂಜಿಲೆಂಡ್ ಮತ್ತು ಪರ್ತ್ಸ್ಕೋರ್ಚರ್ಸ್ ಆಲ್ರೌಂಡರ್ ಹೆಲೇ ಜೆನ್ಸೆನ್ ಅವರು ಬಹುಕಾಲದ ಗೆಳತಿ ನಿಕೋಲಾ ಹ್ಯಾಂಕಾಕ್ರೊಂದಿಗೆ ವಿವಾಹವಾದರು. 2018ರ ಜುಲೈನಲ್ಲಿ ದಕ್ಷಿಣ ಆಫ್ರಿಕಾ ಮಹಿಳಾ ಕ್ರಿಕೆಟ್ ತಂಡದ ನಾಯಕಿ ಡೇನ್ ವ್ಯಾನ್ ನೈಕರ್ಕ್ ತಂಡದ ಸಹ ಆಟಗಾರ್ತಿ ಮರಿಯನ್ನೆ ಕಪ್ಪ್ರೊಂದಿಗೆ ಮದುವೆಯಾಗಿದ್ದಾರೆ. (ಏಜೆನ್ಸೀಸ್)