ಈ ಕುರಿತು ಮಾತನಾಡಿದ ಅವರು, 'ನಾನು ಮತ್ತು ಆದಿತ್ಯ ಈ ಹಿಂದೆಯೇ ಒಟ್ಟಿಗೆ ಚಿತ್ರ ಮಾಡಬೇಕಿತ್ತು. ಆದರೆ, ಕಾರಣಾಂತರಗಳಿಂದ ಅದು ಕೈಗೂಡಿರಲಿಲ್ಲ. ನಾನು 'ಚಂದ್ರ ಚಕೋರಿ' ಚಿತ್ರ ಮಾಡುವಾಗ, ಅವರ ಅಭಿನಯದಲ್ಲಿ ಮಾಡಬೇಕು ಎಂದುಕೊಂಡಿದ್ದೆ. 'ಕುರಿಗಳು ಸಾರ್ ಕುರಿಗಳು' ಚಿತ್ರದಲ್ಲಿ ನಟಿಸುವಾಗ, ಚಿತ್ರೀಕರಣಕ್ಕೆ ಆದಿತ್ಯ ಸಹ ಬರುತ್ತಿದ್ದರು. ನನ್ನ ಚಿತ್ರಕ್ಕೆ ಹೊಸ ಮುಖದ ಅವಶ್ಯಕತೆ ಇದ್ದು, ಆದಿತ್ಯ ಅವರನ್ನೇ ಹಾಕಿಕೊಂಡು ಯಾಕೆ ಚಿತ್ರ ಮಾಡಬಾರದು ಎಂದನಿಸಿತ್ತು. ಈ ವಿಷಯವನ್ನು ಅವರ ತಂದೆ ಎಸ್.ವಿ. ರಾಜೇಂದ್ರ ಸಿಂಗ್ ಬಾಬು ಅವರ ಮುಂದಿಟ್ಟಾಗ, ತಾವೇ ತಮ್ಮ ಮಗನನ್ನು 'ಲವ್' ಎನ್ನುವ ಚಿತ್ರದ ಮೂಲಕ ಪರಿಚಯಿಸುತ್ತಿರುವುದಾಗಿ ಹೇಳಿದ್ದರು. ಕೊನೆಗೆ ನಾನು ಆದಿತ್ಯ ಅವರನ್ನು ಬಿಟ್ಟು ಶ್ರೀಮುರಳಿ ಅವರ ಜತೆಗೆ ಚಿತ್ರ ಮಾಡಿದೆ' ಎಂದು ನೆನಪಿಸಿಕೊಂಡರು.
