ಕರಾಚಿ: ಪಾಕಿಸ್ತಾನದ ಭವಿಷ್ಯದ ಭರವಸೆಯ ಬ್ಯಾಟ್ಸ್ಮನ್ ಹೈದರ್ ಅಲಿ ಇತ್ತೀಚೆಗಷ್ಟೇ ನನಗೆ ವಿರಾಟ್ ಕೊಹ್ಲಿಯಂತೆ ಆಗಲು ಇಷ್ಟವಿಲ್ಲ. ನನಗೆ ಕ್ರಿಕೆಟರ್ ಬಾಬರ್ ಅಜಮ್ ತುಂಬ ಇಷ್ಟ. ಅವರಂತೆ ಆಗುತ್ತೇನೆ ಎಂದು ಹೇಳಿದ್ದರು.
19 ವರ್ಷದೊಳಗಿನವರ ವಿಶ್ವಕಪ್ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಹೈದರ್ ಅಲಿಯ ಪ್ರತಿಭೆ ಪ್ರದರ್ಶನವಾಗಿದೆ. ಈತನೋರ್ವ ಅದ್ಭುತ ಬ್ಯಾಟ್ಸ್ಮೆನ್. ಭವಿಷ್ಯದಲ್ಲಿ ಪಾಕಿಸ್ತಾನದ ನಾಯಕನಾಗುವ ಎಲ್ಲ ಲಕ್ಷಣಗಳೂ ಇವೆ ಎಂದು ಕ್ರಿಕೆಟ್ ತಜ್ಞರೂ ಹೇಳುತ್ತಿದ್ದಾರೆ. ಹೈದರ್ ಅಲಿ ಈ ಬಾರಿಯ ಪಾಕಿಸ್ತಾನ ಸೂಪರ್ ಲೀಗ್ನಲ್ಲಿ ಕೂಡ ಅತ್ಯಂತ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದಾರೆ.
ಹೈದರ್ ಅಲಿ ವಿರಾಟ್ ಕೊಹ್ಲಿ, ಬಾಬರ್ ಅಜಮ್ರಂತೆಯೇ ಅದ್ಭುತ ಆಟಗಾರರೆನಿಸಿಕೊಳ್ಳುತ್ತಾರೆ ಎಂದು ಹೋಲಿಕೆ ಮಾಡಲಾಗಿತ್ತು. ಈ ಬಗ್ಗೆ ಮಾಧ್ಯಮಗಳು ಪ್ರತಿಕ್ರಿಯೆ ಕೇಳಿದಾಗ, ನನಗೆ ವಿರಾಟ್ ಕೊಹ್ಲಿ ಇಷ್ಟವಿಲ್ಲ, ಬಾಬರ್ ಅಜಮ್ ರೀತಿ ಆಗುತ್ತೇನೆ ಎಂದು ಹೈದರ್ ಹೇಳಿದ್ದರು.
ಆದರೆ ನಿಜಕ್ಕೂ ತನ್ನ ರೋಲ್ ಮಾಡೆಲ್ ಯಾರು? ಅಚ್ಚುಮೆಚ್ಚಿನ ಕ್ರಿಕೆಟರ್ ಯಾರು ಎಂಬುದನ್ನು ಹೈದರ್ ಅಲಿ ಈಗ ಬಹಿರಂಗಗೊಳಿಸಿದ್ದಾರೆ. ಭಾರತ ಕ್ರಿಕೆಟ್ ತಂಡದ ರೋಹಿತ್ ಶರ್ಮಾ ಅವರೇ ನನ್ನ ಅಚ್ಚುಮೆಚ್ಚಿನ ವ್ಯಕ್ತಿ. ಅವರ ಸ್ಟ್ರೈಕ್ ರೇಟ್ ನನಗೆ ತುಂಬ ಖುಷಿಕೊಡುತ್ತದೆ. ನನ್ನ ಆಟದಲ್ಲೂ ಸಹ ಅದನ್ನು ಅಳವಡಿಸಿಕೊಳ್ಳುತ್ತೇನೆ ಎಂದಿದ್ದಾರೆ. (ಏಜೆನ್ಸೀಸ್)