ಪಾಟ್ನಾ: ಇದು ಪತಿ-ಪತ್ನಿ ಇಬ್ಬರೂ ಜತೆಗಿದ್ದಾಗ ಎದುರಾದ ಸಂಕಟ. ಗಂಡ ಕೇಳಿದಾಕ್ಷಣ ಕೊಟ್ಟುಬಿಟ್ಟ, ಆದರೆ ಪತ್ನಿ ಕೊಡಲು ವಿರೋಧಿಸಿದಳು. ಅಷ್ಟಕ್ಕೇ ಸಿಟ್ಟಾದ ದುಷ್ಕರ್ಮಿಗಳು ಆ ಮಹಿಳೆಯ ತಲೆಗೆ ಗುಂಡಿಕ್ಕಿದ್ದು, ಆಕೆ ಸ್ಥಳದಲ್ಲೇ ಮೃತಪಟ್ಟಿದ್ದಾಳೆ.
ಸಾಯ್ಖಾ ಪರ್ವೀನ್ ಹಾಗೂ ಇಮ್ರಾನ್ ಅಲಂ ದಂಪತಿ ಆಟೋದಲ್ಲಿ ಪ್ರಯಾಣಿಸುತ್ತಿದ್ದಾಗ ಇಂಥದ್ದೊಂದು ಪ್ರಕರಣ ನಡೆದಿದೆ. ಖಾಸಗಿ ಬ್ಯಾಂಕ್ ಉದ್ಯೋಗಿ ಆಗಿರುವ ಇಮ್ರಾನ್ ಅಲಂ ತನ್ನೂರಿಗೆ ಪತ್ನಿಯೊಂದಿಗೆ ತೆರಳುತ್ತಿದ್ದಾಗ ಎದುರಾದ ಆಗಂತುಕರು ಈ ದುಷ್ಕೃತ್ಯ ಎಸಗಿದ್ದಾರೆ.
ಬಿಹಾರದ ಸಿವಾನ್ನಲ್ಲಿ ಉದ್ಯೋಗದಲ್ಲಿರುವ ಅಲಂ, ತನ್ನೂರು ದೆಹ್ರಿ ಆನ್ಸಾನ್ಗೆ ತೆರಳುತ್ತಿದ್ದರು. ಅದಕ್ಕಾಗಿ ಪಾಟ್ನಾ ರೈಲ್ವೆ ನಿಲ್ದಾಣಕ್ಕೆ ಅವರು ಆಟೋದಲ್ಲಿ ಸಾಗುತ್ತಿದ್ದಾಗ ಚಿರೈಯಾತಾಧ್ ಫ್ಲೈ ಓವರ್ ಮೇಲೆ ಮತ್ತೊಂದು ಆಟೋದಲ್ಲಿ ಬಂದ ಆಗಂತುಕರು ಇವರಿದ್ದ ಆಟೋ ನಿಲ್ಲಿಸುವಂತೆ ಚಾಲಕನಿಗೆ ಸೂಚನೆ ನೀಡಿದ್ದರು.
ಆಟೋ ನಿಲ್ಲುತ್ತಿದ್ದಂತೆ ಎರಡು ಪ್ರತ್ಯೇಕ ಬೈಕ್ಗಳಲ್ಲಿ ಬಂದ ಇಬ್ಬರು ಪರ್ವೀನ್ ಮತ್ತು ಇಮ್ರಾನ್ ಬಳಿ ಇದ್ದ ಬೆಲೆಬಾಳುವ ವಸ್ತುಗಳನ್ನು ಕೊಡುವಂತೆ ಹೆದರಿಸಿದ್ದರು. ಬೆದರಿದ ಪತಿ ತನ್ನಲ್ಲಿದ್ದುದನ್ನು ತಕ್ಷಣ ಕೊಟ್ಟುಬಿಟ್ಟ. ಆದರೆ ಪತ್ನಿ ಪರ್ವೀನ್ ಏನನ್ನೂ ಕೊಡಲು ನಿರಾಕರಿಸಿ, ವಿರೋಧ ವ್ಯಕ್ತಪಡಿಸಿದಾಗ ಸಿಟ್ಟಾದ ದುಷ್ಕರ್ಮಿಗಳು ಆಕೆಯ ತಲೆಗೆ ಶೂಟ್ ಮಾಡಿದ್ದಾರೆ. ಆಕೆ ಸ್ಥಳದಲ್ಲೇ ಮೃತಪಟ್ಟಿದ್ದು, ಇಬ್ಬರ ಬಳಿ ಇದ್ದಿದ್ದನ್ನು ದುಷ್ಕರ್ಮಿಗಳು ದೋಚಿಕೊಂಡು ಹೋಗಿದ್ದಾರೆ. ಈ ಸಂಬಂಧ ಇಮ್ರಾನ್ ಪಾಟ್ನಾ ಪೊಲೀಸರಿಗೆ ದೂರು ನೀಡಿದ್ದು, ಆರೋಪಿಗಳ ಪತ್ತೆಗೆ ಪೊಲೀಸರು ಮುಂದಾಗಿದ್ದಾರೆ. (ಏಜೆನ್ಸೀಸ್)
Video | ಆಮೇಲ್ ಕೊಡ್ತೀನಿ ಎಂದ, ನಂತರ ಕೊಟ್ಟಿದ್ದೇ ಬೇರೆ!; ಇವರಿಬ್ಬರು ಬರೀ 5 ರೂ.ಗೆ ನಡುರಸ್ತೇಲಿ ಹೀಗಾ ಮಾಡೋದು!?
2.5 ಕೋಟಿ ದಂಪತಿಗಳಿಗೆ ಅದೇ ಸಿಗಲಿಲ್ವಂತೆ; ಕರೊನಾದಿಂದಾಗಿ ಶಿಶುಜನನ ಪ್ರಮಾಣ ಶೀಘ್ರ ಹೆಚ್ಚಳ?