ಪಣಜಿ: ಭಾರತೀಯ ನೌಕಾಪಡೆಯ ಮಿಗ್-21ಕೆ ಯುದ್ಧ ವಿಮಾನವು ಬುಧವಾರ ಗೋವಾದ ಪಣಜಿ ಬಳಿಯ ಸಮುದ್ರದಲ್ಲಿ ಪತನವಾಗಿದ್ದು, ಅದೃಷ್ಟವಶಾತ್ ಪೈಲಟ್ ಅಪಾಯದಿಂದ ಪಾರಾಗಿದ್ದಾರೆ. ಸಾವಿನ ದವಡೆಯಿಂದ ಪೈಲಟ್ ಪಾರಾದ ಆ ಕ್ಷಣ ಹೀಗಿತ್ತು…
‘ಎರಡು ಇಂಜಿನ್ ಹೊಂದಿರುವ ಯುದ್ಧ ವಿಮಾನ ನಿತ್ಯದ ಕ್ರಮದಂತೆ ಹಾರಾಟ ನಡೆಸಿ ತನ್ನ ಬೇಸ್ಗೆ ಹಿಂತಿರುಗುತ್ತಿತ್ತು. ಈ ಸಮಯದಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದೆ. ಅಪಾಯದಿಂದ ಪಾರಾಗಲು ಪೈಲಟ್ ತಮ್ಮನ್ನು ತಾವು ವಿಮಾನದಿಂದ ಇಜೆಕ್ಟ್ ಮಾಡಿಕೊಂಡಿದ್ದಾರೆ. ಕೂಡಲೇ ಶೋಧ ಹಾಗೂ ರಕ್ಷಣಾ ಕಾರ್ಯಾಚರಣೆ ನಡೆಸಿ ಪೈಲಟ್ನನ್ನು ರಕ್ಷಿಸಲಾಯಿತು’ ಎಂದು ನೌಕಾದಳ ತಿಳಿಸಿದೆ.
ಮಿಗ್ ಯುದ್ಧ ವಿಮಾನಗಳಲ್ಲಿ ಪೈಲಟ್ ಕೂರುವ ಕುರ್ಚಿಯ ಕೆಳಗೆ ರಾಕೆಟ್ ಮೋಟರ್ ಅಳವಡಿಸಲಾಗಿರುತ್ತದೆ. ಇಜೆಕ್ಟ್ ಬಟನ್ ಒತ್ತಿದ ಕೂಡಲೇ ವಿಮಾನದ ಗಾಜು ತೆರೆದುಕೊಂಡು ಕುರ್ಚಿ ಜೋರಾಗಿ ಮೇಲಕ್ಕೆ ಚಿಮ್ಮುತ್ತದೆ. ಮೇಲಕ್ಕೆ ಚಿಮ್ಮುವಾಗ ಪೈಲಟ್ ಮೂರ್ಛೆ ತಪ್ಪುವ ಅಪಾಯ ಇರುತ್ತದೆ. ಮೂರ್ಛೆ ತಪ್ಪಿದ ಪೈಲಟ್ ನೀರಿಗೆ ಬಿದ್ದರೆ ಉಸಿರುಗಟ್ಟುವ ಸಾಧ್ಯತೆ ಹೆಚ್ಚು. ಅದೃಷ್ಟವಷಾತ್ ಪೈಲಟ್ ಅಪಾಯದಿಂದ ಪಾರಾಗಿದ್ದು, ಸುರಕ್ಷಿತವಾಗಿದ್ದಾರೆ ಎಂದು ನೌಕಾದಳ ವಿವರಿಸಿದೆ.
ವಿಮಾನ ಪತನಕ್ಕೆ ಕಾರಣ ಏನೆಂದು ತಿಳಿಯಲು ಬಿಒಐ (ಬೋರ್ಡ್ ಆಫ್ ಇನ್ವೆಸ್ಟಿಗೇಶನ್)ಗೆ ತನಿಖೆ ನಡೆಸುಂತೆ ನೌಕಾದಳ ಸೂಚಿಸಿದೆ. ಜಗತ್ತಿನಲ್ಲಿ ಮಿಗ್-21ಕೆ ಯುದ್ಧ ವಿಮಾನಗಳನ್ನು ಬಳಸುತ್ತಿರುವ ಏಕೈಕ ರಾಷ್ಟ್ರ ಭಾರತ. ರಷ್ಯಾದಿಂದ ಐಎನ್ಎಸ್ ವಿಕ್ರಮಾದಿತ್ಯವನ್ನು (ಮೂಲ ಹೆಸರು ಆಡ್ಮಿರಲ್ ಗೋರ್ಶ್ಕೋವ್) ಖರೀದಿಸುವಾಗ ಜತೆಗೆ ಖರೀದಿಸಲಾಗಿತ್ತು.
ಈ ಹಿಂದೆಯೂ ಅನೇಕ ಮಿಗ್ ವಿಮಾನಗಳು ಪತನವಾಗಿವೆ. ಅಪಘಾತ ಸರಣಿಗಳಿಂದಾಗಿ ಮಿಗ್ ವಿಮಾನಗಳಿಗೆ ‘ಫ್ಲಯಿಂಗ್ ಕಾಫಿನ್’ ಎಂದು ಕರೆಯಲಾಗುತ್ತೆ. ಮಿಗ್ ವಿಮಾನಗಳ ಬದಲಾಗಿ ಬೇರೆ ಯುದ್ಧ ವಿಮಾನಗಳನ್ನು ಖರೀದಿಸಲು ಸೇನೆ ಉದ್ದೇಶಿಸಿದೆ.(ಏಜೆನ್ಸೀಸ್)