ಬಾರ್ಸಿಲೋನಾ: ದಾಖಲೆಯ ಆರು ಬಾರಿ ಬ್ಯಾಲನ್ ಡಿ ಓರ್ ಪ್ರಶಸ್ತಿಗೆ ಭಾಜನರಾಗಿರುವ ಫುಟ್ಬಾಲ್ ತಾರೆ ಲಿಯೋನೆಲ್ ಮೆಸ್ಸಿ ವೃತ್ತಿಜೀವನದಲ್ಲಿ 700 ಗೋಲು ಸಿಡಿಸಿದ ಸಾಧನೆ ಮಾಡಿದ್ದಾರೆ. ಅರ್ಜೆಂಟೀನಾ ಮತ್ತು ಬಾರ್ಸಿಲೋನಾ ಪರ ಆಡುವ ವೇಳೆ ಮೆಸ್ಸಿ ಈ ಗೋಲುಗಳನ್ನು ಬಾರಿಸಿದ್ದಾರೆ. ಈ ಮೂಲಕ ಅವರು ಪೋರ್ಚುಗಲ್ ಫುಟ್ಬಾಲ್ ತಾರೆ ಕ್ರಿಶ್ಚಿಯಾನೊ ರೊನಾಲ್ಡೊಗಿಂತ ವೇಗವಾಗಿ ಈ ಸಾಧನೆ ಮಾಡಿದ ದಾಖಲೆ ಬರೆದಿದ್ದಾರೆ.
ಇದನ್ನೂ ಓದಿ: ಧೋನಿ, ಕೊಹ್ಲಿ 10ನೇ ತರಗತಿಯಲ್ಲಿ ಪಡೆದ ಅಂಕಗಳೆಷ್ಟು ಗೊತ್ತೇ ?
ಅಥ್ಲೆಟಿಕೊ ಮ್ಯಾಡ್ರಿಡ್ ವಿರುದ್ಧ ಬುಧವಾರ ನಡೆದ ಲಾ ಲೀಗಾ ಟೂರ್ನಿಯ ಪಂದ್ಯದ ವೇಳೆ ಮೆಸ್ಸಿ 700ನೇ ಗೋಲು ಬಾರಿಸಿದ್ದಾರೆ. ಈ ಮೂಲಕ ಬಾರ್ಸಿಲೋನಾ ತಂಡ ಪಂದ್ಯದಲ್ಲಿ 2-2 ಗೋಲುಗಳಿಂದ ಡ್ರಾ ಸಾಧಿಸಿತು. ಅಥ್ಲೆಟಿಕೊ ಮ್ಯಾಡ್ರಿಡ್ ಜತೆಗೆ ಅಂಕ ಹಂಚಿಕೊಂಡ ಕಾರಣ ಬಾರ್ಸಿಲೋನಾ ತಂಡ ಟೂರ್ನಿಯ ಅಂಕಪಟ್ಟಿಯಲ್ಲಿ ರಿಯಲ್ ಮ್ಯಾಡ್ರಿಡ್ ತಂಡವನ್ನು ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಲು ವಿಫಲವಾಗಿದೆ. ಬಾರ್ಸಿಲೋನಾ ಈಗ 70 ಅಂಕ ಗಳಿಸಿದ್ದರೆ, ರಿಯಲ್ ಮ್ಯಾಡ್ರಿಡ್ 1 ಅಂಕದಿಂದ ಮುಂದಿದೆ. ಲಾಕ್ಡೌನ್ ನಂತರ ಫುಟ್ಬಾಲ್ ಚಟುವಟಿಕೆ ಪುನರಾರಂಭಗೊಂಡ ಕಳೆದ 3 ಪಂದ್ಯಗಳಲ್ಲಿ ಮೆಸ್ಸಿ ಒಂದೂ ಗೋಲು ಬಾರಿಸಲು ವಿಫಲರಾಗಿದ್ದರು.
ಇದನ್ನೂ ಓದಿ: ಟಿಕ್ಟಾಕ್ ಬ್ಯಾನ್ ಆಗಿದ್ದಕ್ಕೆ ವಾರ್ನರ್ ಕಾಲೆಳೆದ ಅಶ್ವಿನ್!
2005ರ ಮೇ 1ರಂದು ವೃತ್ತಿಜೀವನದ ಮೊದಲ ಗೋಲು ಬಾರಿಸಿದ್ದ ಮೆಸ್ಸಿ, ತಾನಾಡಿದ 861ನೇ ಪಂದ್ಯದಲ್ಲಿ 700ನೇ ಗೋಲು ಬಾರಿಸಿದ್ದಾರೆ. ಈ ಪೈಕಿ 630 ಗೋಲುಗಳನ್ನು ಬಾರ್ಸಿಲೋನಾ ಪರ 723 ಪಂದ್ಯಗಳಲ್ಲಿ ಮತ್ತು 70 ಗೋಲುಗಳನ್ನು ಅರ್ಜೆಂಟೀನಾ ಪರ 138 ಪಂದ್ಯಗಳಲ್ಲಿ ಬಾರಿಸಿದ್ದಾರೆ. ರಿಯಲ್ ಮ್ಯಾಡ್ರಿಡ್ ಮಾಜಿ ಆಟಗಾರ ರೊನಾಲ್ಡೊ 700 ಗೋಲುಗಳನ್ನು ಬಾರಿಸಲು 33 ವರ್ಷದ ಮೆಸ್ಸಿಗಿಂತ 112 ಅಧಿಕ ಪಂದ್ಯಗಳನ್ನು ಆಡಿದ್ದರು. ಅಂದರೆ ಜುವೆಂಟಸ್ ತಾರೆ ರೊನಾಲ್ಡೊ 973ನೇ ಪಂದ್ಯದಲ್ಲಿ 700 ಗೋಲು ಬಾರಿಸಿದ್ದರು. 35 ವರ್ಷದ ರೊನಾಲ್ಡೊ 2019ರ ಅಕ್ಟೋಬರ್ನಲ್ಲೇ ಈ ಸಾಧನೆ ಮಾಡಿದ್ದರು. ರೊನಾಲ್ಡೊ, ಮೆಸ್ಸಿ ಹೊರತಾಗಿ ಬೇರೆ ಯಾವ ಹಾಲಿ ಆಟಗಾರರೂ 700 ಗೋಲು ಸಿಡಿಸಿದ ಸಾಧನೆ ಮಾಡಿಲ್ಲ.
700ಕ್ಕಿಂತ ಅಧಿಕ ಗೋಲು ಸಿಡಿಸಿದ ಫುಟ್ಬಾಲ್ ಆಟಗಾರರು:
ಪೀಲೆ (ಬ್ರೆಜಿಲ್): 1279 ಗೋಲು
ಜೋಸೆಫ್ ಬಿಕಾನ್ (ಆಸ್ಟ್ರಿಯಾ): 805 ಗೋಲು
ರೊಮಾರಿಯೋ (ಬ್ರೆಜಿಲ್): 772 ಗೋಲು
ಫೆರೆಂಕ್ ಪುಸ್ಕಾಸ್ (ಹಂಗೆರಿ): 746 ಗೋಲು
ಗೆರ್ಡ್ ಮುಲ್ಲರ್ (ಜರ್ಮನಿ): 735 ಗೋಲು
ಕ್ರಿಶ್ಚಿಯಾನೊ ರೊನಾಲ್ಡೊ (ಪೋರ್ಚುಗಲ್): 728
ಲಿಯೋನೆಲ್ ಮೆಸ್ಸಿ (ಅರ್ಜೆಂಟೀನಾ): 700
PHOTOS | ಭಾರತದ ಕ್ರೀಡಾ ದಂಪತಿ ಸಾಲಿಗೆ ದೀಪಿಕಾ-ಅತನು, ಈ ಪಟ್ಟಿಯಲ್ಲಿ ಯಾರೆಲ್ಲ ಇದ್ದಾರೆ ಗೊತ್ತೇ?