ಮರಾಠಿ ಸಂಸ್ಕೃತಿಯಲ್ಲಿ ವಿಶೇಷ ಸ್ಥಾನ
ಮರಾಠ ಸಾಮ್ರಾಜ್ಯ ಮತ್ತು ಪೇಶ್ವೆಗಳ ಕಾಲದಿಂದಲೂ ಬುಗಡಿ ಮಹಿಳೆಯರ ಅಲಂಕಾರದ ಪ್ರಮುಖ ಭಾಗವಾಗಿತ್ತು ಎನ್ನಲಾಗುತ್ತದೆ. ಮದುವೆ, ಹಬ್ಬ ಮತ್ತು ಧಾರ್ಮಿಕ ಕಾರ್ಯಕ್ರಮಗಳ ಸಂದರ್ಭದಲ್ಲಿ ಮಹಿಳೆಯರು ಇದನ್ನು ಧರಿಸುತ್ತಿದ್ದರು. ಹೀಗಾಗಿ ಬುಗಡಿ ಕೇವಲ ಅಲಂಕಾರದ ಆಭರಣವಾಗಿರಲಿಲ್ಲ. ಕುಟುಂಬದ ಪರಂಪರೆ, ಸಾಂಸ್ಕೃತಿಕ ಗುರುತು ಮತ್ತು ಸಂಪ್ರದಾಯದ ಭಾಗವಾಗಿಯೂ ಇದನ್ನು ನೋಡಲಾಗುತ್ತಿತ್ತು.
ಚಿನ್ನ, ಬೆಳ್ಳಿ, ಮುತ್ತಿನ ಅಂದ
ಸಾಂಪ್ರದಾಯಿಕವಾಗಿ ಬುಗಡಿಯನ್ನು ಚಿನ್ನ ಮತ್ತು ಬೆಳ್ಳಿಯಂತಹ ಲೋಹಗಳಿಂದ ತಯಾರಿಸಲಾಗುತ್ತಿತ್ತು. ಮುತ್ತುಗಳು, ಸೂಕ್ಷ್ಮ ಕೆತ್ತನೆ ಮತ್ತು ಸಾಂಪ್ರದಾಯಿಕ ವಿನ್ಯಾಸಗಳು ಇದರ ಅಂದವನ್ನು ಮತ್ತಷ್ಟು ಹೆಚ್ಚಿಸುತ್ತಿದ್ದವು. ಮಹಾರಾಷ್ಟ್ರದ ಮದುವೆ ವೇಷಭೂಷಣದಲ್ಲಿ ನಾಥ್, ತುಷಿ ಮತ್ತು ಕೊಲ್ಹಾಪುರಿ ಸಾಜ್ ಮುಂತಾದ ಆಭರಣಗಳಿಗೆ ವಿಶೇಷ ಸ್ಥಾನ ಇರುವಂತೆ, ಬುಗಡಿಗೂ ತನ್ನದೇ ಆದ ಮಹತ್ವವಿದೆ.
ಹಾಡಿನಲ್ಲೂ ಬುಗಡಿಯ ಸದ್ದು
ಬುಗಡಿಯ ವಿಶೇಷತೆ ಆಭರಣದ ಪೆಟ್ಟಿಗೆಯಲ್ಲಷ್ಟೇ ಉಳಿದಿಲ್ಲ. ಮರಾಠಿ ಜನಪದ ಸಂಸ್ಕೃತಿಯಲ್ಲೂ ಈ ಆಭರಣದ ಛಾಪು ಕಾಣಬಹುದು. ‘ಬುಗಡಿ ಮಾಜಿ ಸಾಂಡ್ಲಿ ಗಾ’ ಎಂಬ ಜನಪ್ರಿಯ ಮರಾಠಿ ಹಾಡಿನ ಮೂಲಕವೂ ಬುಗಡಿ ಜನಪ್ರಿಯವಾಗಿದೆ. ಹೀಗಾಗಿ ಇದು ಕೇವಲ ಫ್ಯಾಷನ್ ಆಭರಣವಲ್ಲದೆ, ಕಲೆ ಮತ್ತು ಜನಪದ ಸಂಸ್ಕೃತಿಯೊಂದಿಗೂ ಬೆಸೆದುಕೊಂಡಿದೆ.
