ಬೆಂಗಳೂರು: ರಾಷ್ಟ್ರಮಟ್ಟದಲ್ಲಿ ಸದ್ದು ಮಾಡುತ್ತಿರುವ 545 ಸಬ್ ಇನ್ಸ್ಪೆಕ್ಟರ್ ಹುದ್ದೆಗಳ ನೇಮಕಾತಿ ಹಗರಣದ ಕಿಂಗ್ಪಿನ್ಗಳು ಪಿಎಸ್ಐ ಅಭ್ಯರ್ಥಿಗಳಿಂದ ತಲಾ 50 ರಿಂದ 80 ಲಕ್ಷ ರೂ. ವಸೂಲಿ ಮಾಡಿದ್ದಾರೆ. ಆದರೆ, ಪರೀಕ್ಷೆ ಮುಗಿದ ಬಳಿಕ ಅಭ್ಯರ್ಥಿಗಳ ಒಎಂಆರ್ ಶೀಟ್ಗಳನ್ನು ತಿದ್ದಿದ್ದ ಪರೀಕ್ಷಾ ಕೇಂದ್ರದ ಸಿಬ್ಬಂದಿಗೆ ಕೊಟ್ಟಿದ್ದು ಬರೀ 4000 ರೂ….! ಸಿಐಡಿ ತಂಡ ಚಾರ್ಜ್ಶೀಟ್ನಲ್ಲಿ ಈ ವಿಚಾರ ಉಲ್ಲೇಖಿಸಿದೆ. ಕಲಬುರಗಿ ನಗರದ ಬಿಜೆಪಿ ಸ್ಥಳೀಯ ನಾಯಕಿ ದಿವ್ಯಾ ಹಾಗರಗಿ ಮಾಲೀಕತ್ವದ ಜ್ಞಾನಜ್ಯೋತಿ ಇಂಗ್ಲಿಷ್ ಸ್ಕೂಲ್ನಲ್ಲಿ 2015ರಿಂದ ಸೇವೆ ಸಲ್ಲಿಸಿದ್ದ ಕನ್ನಡ ಶಿಕ್ಷಕಿ ಸಾವಿತ್ರಿ ಕಾಬಾ, ತನಿಖೆ ವೇಳೆ ನೀಡಿರುವ ಹೇಳಿಕೆಯಲ್ಲಿ ಸ್ಪೋಟಕ ಮಾಹಿತಿ ಬಹಿರಂಗವಾಗಿದೆ.
2021ರ ಅಕ್ಟೋಬರ್ 3ರಂದು ಜ್ಞಾನಜ್ಯೋತಿ ಶಾಲೆಯಲ್ಲಿ ನಡೆದ ಪಿಎಸ್ಐ ಲಿಖಿತ ಪರೀಕ್ಷೆ ವೇಳೆ ಸಾವಿತ್ರಿ ಕಾಬಾ ಪರಿವೀಕ್ಷಕಿಯಾಗಿದ್ದರು. ಇದಕ್ಕೂ ಮೊದಲು ಆರ್.ಡಿ. ಪಾಟೀಲ್ ಸೇರಿದಂತೆ ತನ್ನ ಗ್ಯಾಂಗ್ ನೊಂದಿಗೆ ಒಳಸಂಚುರೂಪಿಸಿದ್ದ ದಿವ್ಯಾ ಹಾಗರಗಿ ಶಾಲೆಯ ಪ್ರಾಂಶುಪಾಲ ಕಾಶಿನಾಥ್ಗೆ ಅಕ್ರಮ ವ್ಯವಹಾರದ ಬಗ್ಗೆ ಸೂಚನೆ ಕೊಟ್ಟಿದ್ದರು. ಅದರಂತೆ ಪ್ರಾಂಶುಪಾಲರು ಸಾವಿತ್ರಿ ಕಾಬಾ ಸೇರಿದಂತೆ ತಮ್ಮ ಶಾಲೆಯ ಪರಿವೀಕ್ಷಕರನ್ನು ಕರೆದು ‘ನಿಮಗೆ ಕೆಲ ಪಿಎಸ್ಐ ಅಭ್ಯರ್ಥಿಗಳ ರೋಲ್ ನಂಬರ್ ಮತ್ತು ಪ್ರಶ್ನೆಗಳಿಗೆ ಉತ್ತರವಿರುವ ಚೀಟಿಯನ್ನು ಕೊಡುತ್ತೇನೆ. ನೀವು ಆ ರೋಲ್ ನಂಬರ್ ಅಭ್ಯರ್ಥಿಯ ಒಎಂಆರ್ ಶೀಟ್ ತೆಗೆದುಕೊಂಡು ಖಾಲಿ ಬಿಟ್ಟಿರುವ ಉತ್ತರವನ್ನು ಭರ್ತಿ ಮಾಡಬೇಕು. ಅಂತಹ ಅಭ್ಯರ್ಥಿಗಳು, ಒಎಂಆರ್ ಶೀಟ್ನಲ್ಲಿ ಉತ್ತರ ಬರೆಯದೆ ಖಾಲಿ ಬಿಟ್ಟಿದ್ದಾರೆ. ಉಳಿದ ಎಲ್ಲ ಕೆಲಸವನ್ನು ದಿವ್ಯಾ ಮೇಡಂ ಅಧಿಕಾರಿಗಳ ಜತೆ ಸೇರಿ ಎಲ್ಲವನ್ನು ಮ್ಯಾನೇಜ್ ಮಾಡಿದ್ದಾರೆ ಎಂದು ಹೇಳಿ ಶಿಕ್ಷಕರಿಗೆ ಅಭ್ಯರ್ಥಿಗಳ ರೋಲ್ ನಂಬರ್ ಮತ್ತು ಬಾಲ್ ಪೆನ್ ಕೊಟ್ಟು ಕಳುಹಿಸಿದ್ದರು. ಅದರಂತೆ ಪೇಪರ್-2 ಪರೀಕ್ಷೆ ಮುಗಿಯಲು 10 ರಿಂದ 15 ನಿಮಿಷ ಬಾಕಿ ಇರುವಾಗ ಅಭ್ಯರ್ಥಿಗಳು ಒಎಂಆರ್ ಶೀಟ್ ಕೊಟ್ಟು ಹೋಗಿದ್ದರು.
ಪರೀಕ್ಷೆ ಮುಗಿದ ಮೇಲೆ ಎಲ್ಲ ಒಎಂಆರ್ ಶೀಟ್ಗಳನ್ನು ಮುಚ್ಚಿದ ಲಕೋಟೆಯಲ್ಲಿ ಹಾಕಿ ಪೊಲೀಸ್ ಅಧಿಕಾರಿಗೆ ತಲುಪಿಸಬೇಕಿತ್ತು. ಪ್ರಾಂಶುಪಾಲರು ಹೇಳಿದಂತೆ ಶಿಕ್ಷಕರು, ಶಾಲೆ ಸಿಬ್ಬಂದಿ ಕೊಠಡಿಗೆ ತೆಗೆದುಕೊಂಡು ಹೋಗಿ ಭರ್ತಿ ಮಾಡಿ ಆನಂತರ ಸೀಲ್ಡ್ ಕವರ್ ಮಾಡಿ ಪೊಲೀಸರಿಗೆ ನೀಡಲಾಗಿತ್ತು. ಆನಂತರ ಪ್ರಾಂಶುಪಾಲರು ನೀಡಿದ ಬಾಲ್ಪೆಲ್ ಮತ್ತು ಅಭ್ಯರ್ಥಿಗಳ ರೋಲ್ ನಂಬರ್ ಚೀಟಿಯನ್ನು ಹಿಂತಿರುಗಿಸಲಾಯಿತು. ಪರಿವೀಕ್ಷಕರಾಗಿ ಕರ್ತವ್ಯ ನಿರ್ವಹಿಸಿದಕ್ಕೆ ಸರ್ಕಾರದಿಂದ 1 ಸಾವಿರ ರೂ. ಗೌರವ ಧನ ನೀಡಿದರು. ಒಂದು ವಾರದ ಬಳಿಕ ಪ್ರಾಂಶುಪಾಲ ಕಾಶಿನಾಥ್, ಪರಿವೀಕ್ಷಕರಾಗಿ ಮತ್ತು ಒಎಂಆರ್ ಶೀಟ್ ತಿದ್ದಿದ್ದ ಶಿಕ್ಷಕರನ್ನು ಕರೆದು ದಿವ್ಯಾ ಹೆಚ್ಚುವರಿ ಗೌರವ ಧನ ನೀಡಿದ್ದಾರೆ ಎಂದು ತಲಾ 4 ಸಾವಿರ ರೂ. ಪಾವತಿ ಮಾಡಿದ್ದರು ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಪ್ರಿನ್ಸಿಪಾಲ್ ಗುರುತಿನ ಚೀಟಿ: ಪರೀಕ್ಷೆಯಲ್ಲಿ ಅಕ್ರಮ ಎಸಗಲು ಡೀಲ್ ಮುಗಿಸಿಕೊಂಡಿದ್ದ ದಿವ್ಯಾ ಹಾಗರಗಿ ಪೊಲೀಸ್ ನೇಮಕಾತಿ ವಿಭಾಗಕ್ಕೆ ಶಾಲೆಯ ಪ್ರಾಂಶುಪಾಲರ ಮತ್ತು ಶಿಕ್ಷಕರ ಪಟ್ಟಿ ಕೊಡಬೇಕಾಗಿತ್ತು. ಈ ಪಟ್ಟಿಯಲ್ಲಿ ತನ್ನ ಹೆಸರಿನ ಮುಂದೆ ಪ್ರಾಂಶುಪಾಲರು ಎಂದು ನಮೂದಿಸಿಕೊಂಡಿದ್ದರು. ಪೊಲೀಸ್ ಇಲಾಖೆಯಿಂದ ಅದೇ ರೀತಿ ದಿವ್ಯಾಗೆ ಪ್ರಿನ್ಸಿಪಾಲ್ ಎಂದೇ ಗುರುತಿನ ಚೀಟಿ ಕೊಡಲಾಗಿತ್ತು. ಇದನ್ನು ಬಳಸಿಕೊಂಡು ದಿವ್ಯಾ ಲಿಖಿತ ಪರೀಕ್ಷೆ ನಡೆಯುವಾಗ ಕೊಠಡಿ ಆವರಣದಲ್ಲಿ ರಾಜಾರೋಷವಾಗಿ ಓಡಾಡಿಕೊಂಡು ತನ್ನ ಗ್ಯಾಂಗ್ಗೆ ಅಕ್ರಮಕ್ಕೆ ಕುಮ್ಮಕ್ಕು ನೀಡಿದ್ದರು ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
100ಕ್ಕೆ 100 ಉತ್ತರ ಭರ್ತಿ: ಶಾಲೆಯ ಪ್ರಾಂಶುಪಾಲ ಕಾಶಿನಾಥ್ ನೀಡಿದ ಅಭ್ಯರ್ಥಿಗಳ ರೋಲ್ ನಂಬರ್ನ ಒಎಂಆರ್ ಶೀಟ್ಗಳನ್ನು ತೆಗೆದುಕೊಂಡಿದ್ದ ಶಿಕ್ಷಕರು ಬಹುತೇಕ ಎಲ್ಲ ಪ್ರಶ್ನೆಗಳಿಗೂ ಉತ್ತರ ಬರೆದಿದ್ದರು. ಅಂದರೆ, ಹಣ ಕೊಟ್ಟಿದ್ದ ಅಭ್ಯರ್ಥಿಗಳು ನಾಲ್ಕೈದು ಪ್ರಶ್ನೆಗಳಿಗೆ ಮಾತ್ರ ಉತ್ತರಿಸಿ ಉಳಿದವನ್ನು ಖಾಲಿ ಬಿಟ್ಟಿದ್ದರು.