ಬೆಂಗಳೂರು: ಹೃತಿಕ್ ರೋಷನ್ ಮತ್ತು ಕಂಗನಾ ರಣಾವತ್ ನಡುವಿನ ಸಮರಕ್ಕೆ ಮತ್ತೊಮ್ಮೆ ಜೀವ ಬಂದಿದೆ. ತಮ್ಮ ಹೆಸರಿನಲ್ಲಿ ನಕಲಿ ಇ-ಮೇಲ್ ಐಡಿ ಸೃಷ್ಟಿಸಿ ಯಾರೋ ನಟಿ ಕಂಗನಾ ರಣಾವತ್ ಜತೆಗೆ ಸಂವಹನ ನಡೆಸುತ್ತಿದ್ದರು ಮತ್ತು ತಮಗೆ ಕಂಗನಾ ಜತೆಗೆ ಯಾವುದೇ ಅಫೇರ್ ಇಲ್ಲ ಎಂದು ಹೃತಿಕ್, ಮುಂಬೈನ ಪೊಲೀಸರಿಗೆ ನಾಲ್ಕು ವರ್ಷಗಳ ಹಿಂದೆ ದೂರು ಸಲ್ಲಿಸಿದ್ದರು. ಈ ಪ್ರಕರಣವು ನಿಧಾನಗತಿಯಲ್ಲಿ ಸಾಗುತ್ತಿದ್ದು ಯಾವುದೇ ತೀರ್ಮಾನವಾಗಿರಲಿಲ್ಲ.
ಈ ನಿಟ್ಟಿನಲ್ಲಿ ಇತ್ತೀಚೆಗೆ, ಇದನ್ನು ಸೈಬರ್ ಕ್ರೖೆಮ್ನಿಂದ ಕ್ರೖೆಮ್ ಇಂಟಲಿಜೆನ್ಸ್ ಯೂನಿಟ್ಗೆ (ಸಿಐಯು) ವರ್ಗಾವಣೆ ಮಾಡಬೇಕು ಎಂದು ಹೃತಿಕ್ ಮನವಿ ಸಲ್ಲಿಸಿದ್ದರು. ಆ ಪ್ರಕರಣವೀಗ ಸಿಐಯುಗೆ ವರ್ಗಾವಣೆಯಾಗಿದ್ದು, ಮುಂದಿನ ದಿನಗಳಲ್ಲಿ ಈ ಪ್ರಕರಣದ ತನಿಖೆಯನ್ನು ಸಿಐಯು ಮುಂದುವರಿಸಲಿದೆ. ‘ಕ್ರಿಶ್ 3’ ಚಿತ್ರೀಕರಣದಲ್ಲಿ ಜತೆಯಾಗಿ ನಟಿಸಿದ್ದ ಹೃತಿಕ್ ಮತ್ತು ಕಂಗನಾ ನಡುವೆ ಅಫೇರ್ ಶುರುವಾಗಿದೆ ಎಂಬ ಸುದ್ದಿ ಕೆಲವು ವರ್ಷಗಳ ಹಿಂದೆ ಕೇಳಿಬಂದಿತ್ತು. ಆದರೆ, ಕಾರಣಾಂತರಗಳಿಂದ ಅವರಿಬ್ಬರ ಮಧ್ಯೆ ಜಗಳವಾಗಿ, ಆ ಜಗಳ ತಾರಕಕ್ಕೇರಿತ್ತು. ಪ್ರಕರಣಕ್ಕೆ ಮರುಜೀವ ಸಿಕ್ಕಿದ್ದರ ಸುದ್ದಿ ಬರುತ್ತಿದ್ದಂತೆಯೇ, ಹೃತಿಕ್ ರೋಷನ್ ಅವರ ಕಾಲೆಳೆದಿದ್ದಾರೆ ಕಂಗನಾ.
ಹೃತಿಕ್ ಹೆಸರೆತ್ತದೆಯೇ, ‘ಅವರ ಗೋಳಿನ ಕಥೆ ಮತ್ತೊಮ್ಮೆ ಶುರುವಾಯಿತು. ನಮ್ಮಿಬ್ಬರ ಬ್ರೇಕ್-ಅಪ್ ಆಗಿ ಹಲವು ವರ್ಷಗಳಾದರೂ ಜೀವನದಲ್ಲಿ ಮುಂದಕ್ಕೆ ಹೋಗುವುದಕ್ಕೆ ಅವರು ಮನಸ್ಸು ಮಾಡುತ್ತಿಲ್ಲ. ಅವರು ಸಹ ಬೇರೆಯವರೊಂದಿಗೆ ಡೇಟಿಂಗ್ ಮಾಡುತ್ತಿಲ್ಲ, ನಾನು ಸಹ ಜೀವನದಲ್ಲಿ ಸ್ವಲ್ಪ ಮುಂದುವರಿಯೋಣ ಎಂದರೆ ಮತ್ತೊಮ್ಮೆ ನಾಟಕ ಶುರು ಮಾಡಿದ್ದಾರೆ. ಒಂದು ಚಿಕ್ಕ ಅಫೇರ್ಗೆ, ಇನ್ನೂ ಅದೆಷ್ಟು ಅಳುತ್ತಾರೋ ಗೊತ್ತಿಲ್ಲ’ ಎಂದು ಟ್ವೀಟ್ ಮೂಲಕ ವ್ಯಂಗ್ಯವಾಡಿದ್ದಾರೆ.