ನವದೆಹಲಿ: ಕರೊನಾ ರೋಗಿಗಳಿಗೆ ಚಿಕಿತ್ಸೆ ನೀಡಲು ಭಾರತದಲ್ಲಿಯೇ ಔಷಧ ಸಿದ್ಧವಾಗಿದೆ. ಮುಂಬೈ ಮೂಲದ ಕಂಪನಿ ಔಷಧ ಸಿದ್ಧಪಡಿಸಿದ್ದು, ರೋಗಿಗಳ ಮೇಲೆ ಪ್ರಯೋಗಿಸಲು ಭಾರತೀಯ ಔಷಧ ಮಹಾನಿಯಂತ್ರಕರಿಂದ ಅನುಮತಿ ಪಡೆದಿದೆ. ಜತೆಗೆ, ಭಾರತದಲ್ಲಿ ಕ್ಲಿನಿಕಲ್ ಟ್ರಯಲ್ಗೆ ಅನುಮತಿ ಪಡೆದ ಮೊದಲ ಕಂಪನಿ ಎನಿಸಿದೆ.
ಗ್ಲೆನ್ಮಾರ್ಕ್ ಫಾರ್ಮಾ ಈ ಔಷಧ ತಯಾರಿಸಿದೆ. ಕೋವಿಡ್-19 ಕಾಯಿಲೆಯ ಸಾಮಾನ್ಯ ಗುಣಲಕ್ಷಣ ಹೊಂದಿರುವ 150 ರೋಗಿಗಳ ಇದನ್ನು ಪ್ರಯೋಗಿಸಿ ಪರೀಕ್ಷೆ ನಡೆಸಲಿದೆ. ಇದಕ್ಕೆ ಡ್ರಗ್ ಕಂಟ್ರೋಲರ್ ಜನರಲ್-ಡಿಜಿಸಿಐ ಅನುಮತಿ ನೀಡಿದೆ.
ಆಂತರಿಕವಾಗಿಯೇ ಉತ್ಪಾದಿಸಲಾದ ಔಷಧೀಯ ಸಾಮಗ್ರಿಗಳನ್ನು ಒಳಗೊಂಡಿರುವ ಈ ಉತ್ಪನ್ನಕ್ಕೆ ‘ಫವಿಪಿರಾವಿರ್’ ಎಂದು ನಾಮಕರಣ ಮಾಡಲಾಗಿದೆ. ಈ ಔಷಧ, ಶೀತಜ್ವರಕ್ಕೆ ಕಾರಣವಾಗುವ ವೈರಸ್ ವಿರುದ್ಧ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಕಂಪನಿಯ ಕಾರ್ಯಕಾರಿ ಉಪಾಧ್ಯಕ್ಷ ಸುಶ್ರುತ ಕುಲಕರ್ಣಿ ಹೇಳಿದ್ದಾರೆ.
ಕರೊನಾ ಸೋಂಕಿಗೆ ಒಳಗಾದ ಆಯ್ದ ರೋಗಿಗಳ ಮೇಲೆ ಕನಿಷ್ಠ 14 ದಿನ ಹಾಗೂ ಗರಿಷ್ಠ 28 ದಿನಗಳವರೆಗೆ ಚಿಕಿತ್ಸೆ ನೀಡಲಾಗುತ್ತದೆ. ಬಳಿಕ ಇದರ ಫಲಿತಾಂಶ ಹಾಗೂ ಪರಿಣಾಮಗಳನ್ನು ವಿಶ್ಲೇಷಿಸಲಾಗುತ್ತದೆ.
ಫವಿಪಿರಾವಿರ್ ಔಷಧ ಜಪಾನ್ನಲ್ಲಿ ಈಗಾಗಲೇ ಪರಿಣಾಮಕಾರಿ ಎನಿಸಿರುವ, ಫುಜಿಫಿಲ್ಮ್ ಟೊಯೋಮಾ ಕೆಮಿಕಲ್ಸ್ ಕಂಪನಿಯ ಆವಿಗಾನ್ ಮಾತ್ರೆಯ ಜನೌಷಧ (ಜನರಿಕ್) ರೂಪವಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ. ಅಮೆರಿಕ, ಚೀನಾ, ಜಪಾನ್ಗಳಲ್ಲಿ ಈಗಾಗಲೇ ಕೋವಿಡ್-19 ಔಷಧದ ಕ್ಲಿನಿಕಲ್ ಟ್ರಯಲ್ಗಳನ್ನು ನಡೆಸಲಾಗುತ್ತಿದೆ.